Ka Nonanona, Volume III, Number 21, 5 March 1844 — Page 109

1844.) KA NONANONA. 109

            Ua holoi ia anei kela mau hua ma ke kanawai kula, aoao 75 pauku 5, penei;
          "Aole hoi lakou e hookupu dala o ke kino i ko lakou wa e malama ana i ke kula, pela no hoi ka lakou wahine."
          Auhau ia makou i keia makahiki, a ua hookaa aku $1.50 na ke kane me ka wahine.
          Pela anei oukou ma Oahu me Maui; kanalua ka manao, no ka hai ole ia mai e ke Kanawai. Aloha oe, Na G. W. LILIKALANI.

Feb. 20, 1844.
          Aloha oe e Nonanona.
          Eia ka'u wahi makana ia oe, he mau wahi hua olelo pohihihi; a nau e ninau aku i ka poe maiau, noiau, akeakamai e hoakaka mai i ke ano i maopopo ke ano ia kakou. Eia ua mau wahi hua olelo pohihi nei.
          Opikananuu, Kaniaau, Nawenawe, Hoeneku, Nipolo, Ulupehupehu, Kulolia, Hakanene, Kukuhela, Kupela, Nonohiuli, Hikialoale, Kapuleloleloula, Papaukiuki, Pauniniu, Palalakaimoku, Laumaewa, Kaakalolo, Nianiau, Kupololoi, Nonohua, Haohaoalani, Uhauhalale, Nounounea, Alewalewa, Hoalalahia, Lolopua, Lolohua, Lelehuna, Kukuwawa, Lawaaeae, Kukaulalapa, Punonohuuula, Ponakaiaua, Koliliu, Kaekeloi, Lokai, Kaipopolohuamea, Meamea, Iliau, Kaioolelopa, Pakinahua, Kolokio, Kolokolokai, Lelewawalo, Lelepio, Ponahanaha.
          E huli mai oukou e na elemakule a me ka poe maiau, noiau, a me ka poe akeakamai a kakau pono i ke ano o kela huaolelo o keia huaolelo; a hoakaka koke mai, i ike koke kakou. E aloha oukou.
Na S. M. K.

Ianuari 5, 1844.
          Aloha oe e ka Nonanona. Eia wau ke hooakaka hou aku nei ia oe, i ko'u noho ana. Hoi mai au mai Kailua mai, hookahi o'u hebedoma ma ka hale, imi o Keaweamahi i hewa no'u. Hele kela i ka wahine ana i manao ai, laua me Kalaumoku. I aku "e hai mai oe a na'u oe e uku aku i na dala, a e hoi wale oe i ka halepaahao e noho wale a o ko kane ke uku nui." Hoole aku ka wahine, "aole maua i moekolohe me Setepano." Hooweliweli o Keaweamahi, penei, hoi mai Setepano, hoopii kela ia Kamehameha III., pau loa oukou i ka hihia. I aku ka wahine, "Pono ia, ina ua moe maua, ae aku au i ka hewa". No ka ae ole o ka wahine i kona manao, imi ikaika kela i hihia e ae no'u. Hele pinepine oia me Kalaumoku i ka hale o ka wahine e hooweliweli ia lakou e uku i na kala $25.
          I ae la na makua, aole maua i ike i ka hewa o ke keiki e hai aku ai ia olua. Pela lakou i ha hahana ai me kuu lohe ole. Ma Kealakekua au ia hebedoma i ke kula. Hoi aku au a Honaunau, malaila o Naheana, kii mai kona luna ia'u, i mai e pii kaua mauka. Alaila pii koke aku maua i ka hale o Malo, ilaila o Naheana. Liuliu au ilaila aole olelo mai Naheana. I aku au, "e pono oe e hoakaka mai i keia hewa o'u." Aole i ekemu mai Naheana: olelo no ka luna, "ua hewa ko wahine." I aku au "ua ae oia, ua moe kolohe maua?" Hoole mai la ka luna, "aole, ua hoohewaia ma ka olelo a ka makuakane." I aku au ia Naheana, "e hoakaka mai oe i kuu hewa i akaka." Olelo mai kela, "he kapu wau, ua kohoia au e ke kiaaina i lunakanawai; aole e hiki ia'u ke hookolokolo