Ka Nonanona, Volume III, Number 21, 5 March 1844 — Page 108

108 KA NONANONA. (MARAKI,

mai ia kakou i mau umeke ai, a i 10 dala, a i 5 dala, a e hele me na haumana a kakou e ko laau nona, mai manao naaupo kakou, o ka leo o ka luna ia. A olelo mai kekahi luna ia kakou pela, aole ma kona ano luna ia olelo, ma kona ano noi maoli no. Aia no i ko kakou manao ka ae a me ka hoole.
D. B. LAIMANA.

Kaawaloa, Dek. 25, 1843.

POE HOOKAMAKAMA MA KAAWALOA.

            Aloha oe e ka Nonanona, eia keia wahi manao e pai ia iloko ou. Nau e hoolaha 'ku.
          I ka la 21 Dek. he haunaele ko makou wahi nei no ka poe hookamakama, aole o kana mai ka pioloke no ka nui loa: he 23 a pau loa, 18 wahine, 5 kane: Mauka nei a ma ka moku ka hookamakama ana o keia poe, no Kaawaloa kai wale no ka nui; 4 poe wale no no kahi e mai. O na lunakanawai no kela aoao mai, o Kupaka ma; lohe keia poe i keia haunaele nui, o ka ulu pu ana o ke zizania me ka palaoa. O ka rula a ke alii nui i hana ai, (kanawai) oia ka lakou i lawe pu mai ai, hooponopono loa lakou me ka ikaika i na la 3, a pau iho la keia kekee i ka pololei.
          I ka hookolokolo ana, hoole loa ka waha o ua poe hookamakama la, aka, no ka ike pono ia aole hoolohe na luna i ko lakou waha.
          Nolaila, kena ae la na luna e uku, a e paa e like me ke kanawai; aka hoole loa mai la kekahi o lakou, aole e uku no ka hewa ole, e like me ka hoopaapaa ke ano. Aka hoi, ua ikea, aia ma ko lakou mau hale e waiho ana ka waiwai hookamakama. No ka hoole paakiki loa, kena'e la na luna e paa i ke kaula, hopu koke ia'la me ke aumeume, a me ka ikaika o ka hana, a paa iho la; alaila hea ae la kekahi e ku makaikai mai ana, "Pehea kakou e nana wale nei, o ka make no nei," he olelo pepehi keia i na lunakanawai. No ia mea kena ae la na luna oia kahi e uku $20. Hopuhopu koke ia'e la na wahine e like me na kao ke ano, a paa aku la i ka haleao. Pela i paa'i keia poe me ka ai ole; aka, o ko lakou hewa, ua like ia me ke aniani ke akaka.
          A pau keia poe i ka paa; wa iho la na kanaka no ka poe i paa me na luna, i ka pono ole o ka hoopai ana. O na makua, me na kane a keia poe, noho iho la lakou me ka u, a me ka mihi aku, mihi mai, no ka ikaika o ka hoopai o ko lakou poe aloha. Nolaila hoi, ua mihi lakou e like me ka mele a ka poe kahiko; penei;
Aloha wale kakou e mimimihi nei,
Ua mihi aku mihi mai,
Haakulou wale ka noho,
Kalele na lima i ka auwae,
Oia ka haunaele i hana ia maanei.
Ua kaulana mua keia wahi no ka malu, no ka mea, maanei no i hana mua ia'i ka pono, a me ka malu; aka i keia wa la, ea, ua pau ka pono, ua holo ka malu, "Aole malu ma kahi o ka poe hewa." Poino ka aina i keia wa, ua ulu ka ino, ua nalo ka maikai. Nolaila, aloha o Kapiolani, he alii ikaika kela i aa hoomalu, hoomalu ikaika ia i ko Kaawaloa nei. Nani Kaawaloa i ka wa o Kapiolani, nolaila, pomaikai makou ke ala hou mai ia e hoomalu.
Na G. W. LILIKALANI.

Kaawaloa, Dek. 25, 1843.

HE WAHI NINAU.

            Eia keia wahi ninau ia oe e ka Nonanona, no ka mea aia oe imua o na luna, a me na kahukula.