Ka Nonanona, Volume III, Number 21, 5 Malaki 1844 — Page 107

1844.) KA NONANONA. 107

pomaikai ka poe noho naaupo, a hahai mamuli o na kii. He nui kana, "E hoonui ia ana ka eha o ka poe hahai i ka mea e." Ua hoakaka io ko lakou ano ma ka Baibala. Aia ma ka palapala a Paulo i ko Roma poe. Mokuna 1: 21-32. Aloha ino ka poe ike ole ia Iehova! Nui na mea i olelo ia no ko lakou ano ma ke kino, a ma ka manao, a ma ka uhane, aole nae i pau ka hapalua o ko lakou poino i ka hai ia mai. E nana kakou i ke kino o ua pegana la: Ua kakau nui ia; Ua paapu i ka lepo, a me ka mai, a me na uku kapa; aole uhi pono ia i ke kapa he mea e pale aku i ka wela o ka la, a me ke anu o ka po; i kekahi manawa, aneane e make ana ia i ka pololi, a i kekahi manawa, aneane e make ana ia i ka pakela ai ana. E nana kakou i kona helehelena maka, i kekahi manawa he ano hihiu huhu loa, a i kekahi manawa he ano palaka loa me kona holoholona maoli. E nana kakou ia ia e haalulu ana no ka makau aole i kona holo ana i na kuahu o na kii lapuwale e hooluolu aku i ko lakou huhu! E nana kakou i ka hua inoino o kona noho ana, o ka pepehi kanaka, moe kolohe, aihue, powa ana, kuamuamu a me na mea like he nui loa. Oia ka lua hohonu inoino, pilau loa, kahi i poho ai ka poe ike ole ia Iehova! Ua ike anei oukou, e na hoahanau, aia eono hapawalu o kanaka e noho ana iloko o keia popilikia - aole o lakou Akua - aole lana ko lakou manao, he poe kauwa huhu o Satana, a e poho pinepine ana iloko o ka make mau loa? Ina ike oukou, pehea e hiki ia oukou ke hoomaha a hoounaia na misionari i na aina a pau o ka honua, i lohe koke lakou a i ola?

NO NA KUMU AO KULA MAI HAWAII A NIIHAU. HELU 1.

            Auhea oukou e na kumu ao, he wahi manao aloha ko'u ia oukou, a he manao paipai hoi. E pono ia kakou e hoomaikai i ka kakou oihana. E hana naauao, maikai a pono hoi i ka kakou hana a pau, i makemakeia ka kakou hana e na 'lii a me na kanaka pono a pau.
          E hoomaikai aku i ke 'lii. Mai hoowahawaha i na mea hana i na oihana luna a pau. E hoolohe i ka ke 'lii maluna iho. Ma ko oukou noho malie ana, me ke akahai, a me ka hoolohe, e ao aku i ka oukou mau haumana i mea pono a pau.
          Mamua lohe au, "he poe pakike, kolohe, hoole i ka leo o na 'lii, na kumu ao kula." Pela ka olelo a kahi luna. Ina me ia ka hana ana a kekahi kumu, he hewa nui ko ua kumu la. Ma ka maluhia o ke aupuni malaila ka malu o na kula, a me ko kakou pomaikai. A pehea la e malu ai ke malama ole ia na kanawai? Pehea la hoi e lanakila ai ke kanawai, ke lilo na kumu i poe ku e i ke kanawai, me ka pakike aku i na luna e imi ana e hooko i ke kanawai? Pono no e pau koke ka noho kumu ana a ka mea hana pela. Ma na mea a pau a na 'lii, na luna, na konohiki, a me na kahukula e olelo mai ia kakou e like me ke kanawai, e hoolohe koke no kakou.
          Eia hoi kekahi, ina ilihune paha, a pilikia kekahi o lakou, mai noho kakou me ka opuinoino ia lakou, i ko lakou noho luna ana me ka pilikia. E aloha a e kokua maoli aku no, noloko o ko kakou lako, e like me ka kakou hana ana i na mea ilihune a me na pilikia a pau. E kokua me ka oluolu no. Ina no nae lilo kekahi mea o lakou i ka noi wale