Ka Nonanona, Volume III, Number 21, 5 Malaki 1844 — Page 105

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." Solomona.
Buke 3. HONOLULU, OAHU, MARAKI 5, 1844. Pepa 21.

NO NA HOAHANAU. HELU 7.

            Eia kahi ano o ka poe naau hou, o ka ae io.
          Ua ae lakou ma ka ke Akua. Aole lakou i ae mamuli o ka pono, a mahope iho, hoole i ua pono la a lakou i ae ai. Ua ae lakou me ka ae oiaio. Aole lakou i ae hookamani, hoopunipuni, a me ka wahahee; aole. Ua ae lakou me ka oiaio maloko o ko lakou naau. Like me ka ae ana o ka waha imua o kanaka, pela no ko lakou ae ana imua o ke Akua. Ua ae io lakou i na la a pau. Ua ae loa lakou e hele mau, a e hana mau hoi mamuli o ka olelo a ke Akua. Ua hooia lakou i kana olelo a pau. Olelo mai o Iakobo ma kana palapala i na hoahanau, 5: 12. "E hoolilo i ko oukou ae i ae io, a me ko oukou hoole i ole io, o haule oukou i ka hoohewaia mai." Pela no ka ae, a pela no hoi ka hana a na hoahanau pono iloko o ka Haku. Kupaa mau lakou ma na mea a lakou i ae ai. Aole lakou i ae i kekahi la, a i kekahi mai, hoole. Aole pela lakou i ae ai, ua ae mau loa lakou i kela la i keia la, i kela hebedoma, i keia hebedoma, i kela malama i keia malama; i kela makahiki i keia makahiki, ae lakou i na manawa a pau o ko lakou noho ana ma keia ao, a hiki i ka manawa e make ai. Ua ae lakou e hana mau i na hana pono, a e olelo mau i na olelo pono, a e manao mau hoi i na manao pono. Ua like ko lakou manao me ka mea a Davida i hoakaka mai ai ma ka Halelu 61: 8. "E hooko aku i keia la i kela la i ka'u mau mea i berita ai." Pela i hana mau ai na haipule oiaio; pela ko lakou helehelena i ko lakou noho ana ma keia ao. Ae io lakou ma ka aono pono, a kupaa mau lakou ma na mea a lakou i hoohiki ai imua o ke Akua, a imua hoi o keia ao. Pela na mea a pau i loaa ka naau hou. Pela no ka hana ana a ka poe a pau i komo pono maloko o ka ekalesia. Ua ae io lakou, a ua hana io no hoi lakou mamuli o na kauoha a pau a Iehova.
          E na hoahanau, pehea oukou? Pela anei ko oukou ae ana? Pela anei ka oukou hana ana? Ua ae io anei oukou mamuli o ka aoao pono, a mamuli o ka ke Akua olelo? Ua ae no ko oukou waha; ua akaka no ia; ua lohe ko ke ao nei, a ua lohe ke Akua i ko oukou ae. A pehea ko oukou naau? Ua ae io anei ko oukou naau? Ua ae anei oukou me ka hookamani ole, me ka hoopunipuni ole, a me ka wahahee ole? Ina ua ae io oukou pela; ua hana mau oukou mamuli o na mea a oukou i ae ai. Ma ka oukou hana i akaka ai ka oiaio o ko oukou ae ana. Ua hooko anei oukou i kela la i keia la i na mea a oukou i hoohiki ai? Ina i hana ole oukou pela, ua hoopunipuni oukou ia oukou iho, a ua puni na kumu ia oukou; aka o ke Akua, ea, aole loa ia i puni ia oukou. Ua ike pono ia ko oukou helehelena; a ua akaka loa ia ia ko oukou ano maloko a mawaho, a me na mea a pau o ka naau. Ina ua nele oukou i ka ae io o ka naau, mai manao oukou, ua komo iloko o ke aupuni o Iesu Kristo; aole oukou i komo; aia no oukou iloko