Ka Nonanona, Volume III, Number 20, 20 Pepeluali 1844 — Page 103

1844.) KA NONANONA. 103

no hoi ko'u manao, aole lakou he poe haumana io na ka Haku: no ka mea, ina ua lilo io lakou i poe haumana nana, ina ua hoomau lakou ma kana mau hana, ua hoolohe mau lakou i kona leo, a ua pili mau lakou ia ia. Nolaila, ua maopopo ia'u, ua komo hewa lakou iloko o ka ekalesia, ua komo lakou me ka hoomaopopo ole i ko lakou manao e oni paa loa ma na kaua a ka Haku: aole lakou i hooko i na mea a lakou i hoohiki ai, a i berita pu ai hoi me na kanaka o ke Akua.
            E na hoahanau, o ka naau hou wale no ka mea e komo pono ai oukou iloko o ka ekalesia o ke Akua; a oia wale no ka poe ana i makemake ai e komo iloko olaila. Oia no ka mea e pono ai ko oukou noho ana ilaila; a oia no hoi ka mea e komo ai oukou iloko o ke aupuni mau loa o ko kakou Haku e ola'i. No keia mea e imi oukou i naau hou, a e noho oukou mamuli o ia naau hou. Mai noho hou oukou mamuli o ka naau kahiko. A. T.

Kealakekua, Ian. 8, 1844.
          Aloha oe e Limaikaika. He mau mea ma Kaawaloa i manao i ka pope, o Awahua kekahi kane a o Makue kekahi wahine. He mau konohiki laua a he mau hoahanau okiia hoi, a ua haalele o Awahua i kana wahine i mareia, a ke moe nei oia me Makue. Ikaika ko laua manao i ka pope, a aua laua i na keiki, aole makemake e hele i ke kula no ka manao i ka pope.
          Eia hoi; ua hookolokoloia laua i keia mau la e na lunakawai, a ua kaulia ka uku he $75 ia Awahua, a he $65 ia Makue, no ko laua moe pu ana, a no ko laua hoomoe ana i na kaikamahine i na haole holo moku, a he 16 mau mea malalo o laua i ukuia, he $15 ka kekahi, a he $60 ka kekahi, a koe kekahi, aole i hookolokoloia.
            Oia ka hana i pili ai i kela olelo ma ka pope. Na AIWA.

Honolulu, Feberuari 7, 1844.
          Auhea oe e ka mea nona kahi manao i kakau ia ma ka Nonanona, pepa 19, buke 3, no kou hai ana, ua hana kekee na Luna auhau i kau keiki, a ua hoole aku i ka hapaha, aia he dala okoa ko ka Luna manao.
          Eia ka'u ia oe, ma ia mau mea au i hoakaka mai ai ma ua palapala la au mai mua a hope.
          Eia ka mea i maopopo ia'u, ua pono no ka Luna, a ua hana lalau aku oe imua o ka Luna, ua hoole oe i ka olelo ma ka aoao 23, a ua paa loa oe ma ka aoao 18, ua kuhihewa maoli oe. Ka inoa e nana e oe mamua i na wahi a pau o ke kanawai auhau, a maopopo ua hewa ka Luna, alaila hoohewa aku, aole pono ke hoohewa aku me kou pahemahema, a me kou ike ole. Mai hilinai ma ka olelo hookahi o ke kanawai, aka, e leha io ia nei ma na aoao a pau o ke kanawai, a e maopopo ia oe kou kuhihewa.
          Eia hou no. E manao oe e hoohewa i ka Luna ma ka hooponopono ana'ku a ka Nonanona, eia kou hewa, aole oe i hai mai i na makahiki o kau keiki mai ka hanau ana, no ka mea, aia malaila ka auhau ana o na keiki, aka, ua hana mai oe ma ka mea e!
          Ina he manao kou ua hewa keia e palapala hou mai oe.
Wm. P. LELEIOHOKU.