Ka Nonanona, Volume III, Number 20, 20 February 1844 — Page 102

102 KA NONANONA. (FEBERUARI,

kanawai i hooholoia i ka la 11, o Augate, 1843, aole e hana like me ia.
          EKOLU. No ka mea, ua hooholoia, a ua kakauia i keia la ke Kuikahi hou me maua o ka Moi Wahine Beritania na ke Kanikele nui o William Miller, Esq. i hoike mai, nolaila, ua pau na Kuikahi a me na olelo i hooholoia mamua me na Luna o Beritania, oia hoi ka mea i kakauia 16 o Novemaba, 1836, a me 31 Iulai, 1843; ua lilo i mea ole, aole hoi e hanaia mai ka la aku o ka hoolaha ana o keia palapala.
          Hooholoia ma ko makou hale ahaolelo o ma Lahaina, Maui, i keia la 13, o Feberuari 1844.
(Iona,) KAMEHAMEHA III. (Iona,) KEKAULUOHI.

NO NA HOAHANAU.
HELU 6.

            Eia kekahi manao o'u ia oukou i keia wa. E imi oukou i noho ana hou. He makau ko'u e noho nei ia oukou; no ka mea, aohe pono ko oukou noho ana i na makahiki mamua, a i keia makahiki hoi i kaa hope aku la. Ke manao nei au, ua nui loa na mea o oukou i hele mamuli o ke kino, aole mamuli o ka Uhane. Nui na hoahanau i lilo ma ka hewa, a hewa io lakou i ke kanawai o keia ae, a hooluhiia lakou no ka lakou hana hewa ana. Nui na mea hewa i hoikeia iwaena o oukou, a imua hoi o keia ao, a nui no hoi na mea i hana hewa malu, aole i hoikeia, a ua haumia ke aupuni o ka Haku ma ka lakou hana ana. Penei ka Paulo hoakaka ana no na Iudaio e noho ana iwaena o ko na aina e. Roma 2: 24. "No ka mea, ua olelo inoia'e ka inoa o ke Akua iwaena o kanaka e ma o oukou la, e like me ka mea i palapalaia." Pela no hoi ma keia pae aina, ua olelo inoia ka inoa o ko kakou Haku iwaena o ka poe hoomaloka, ma ko oukou noho ana ma ka hewa, a me ko oukou hele ana mamuli o ka naau kahiko. Ua hoinoia na ekalesia o ke Akua ma ka hana hewa a kekahi poe i kapaia ma ka inoa o Kristo Iesu. Aloha nui ia ka inoa hemolele o ka Haku i hoinoia ma ka hana hewa ana a na hoahanau. Aole nae o ka poe hana hewa maoli wale no i hoinoia'i kona inoa; aole o lakou wale ka poe hewa imua o ke Akua; aka, o ka poe a pau e noho palaka ana, nanea ana, molowa ana, a haalele ana i na hana pono a ka Haku. O lakou ka poe hewa nui loa iloko o na ekalesia mai Hawaii a Kauai. O lakou ka poe nui loa, o lakou na mea keakea i ka pono, a i ke aupuni o ka Haku. Ma na hana a ke Akua i kauoha mai ai ia lakou e hana, ua like lakou me ka poe hookuli, a me ka mea i make. Aohe o lakou oni ma na mea pono, a ma na mea e ulu nui ai na manao oiaio, a me na hana maikai. Ma na la ahaaina, hele nui mai lakou, a akoakoa ma ka papaaina a ka Haku, a ai lakou, a inu pu hoi me na haumana ponoi a Iesu; a pau ka la ahaaina, noho palaka lakou, noho molowa; aohe manao pono i loaa; aohe hana maikai i hana'i lakou. O ka la Sabati ahaaina, oia ka la i ike ai kakou, he nui loa na hoahanau; aka, o na Sabati e ae, uuku wale no ka poe i hele ma ka hale pule o ke Akua; a ma na halawai haipule, a ma na halawai e ae, uuku wale no ka poe i hoomau malaila.
            A pehea la ke ano o ka poe e noho ana pela? He poe kanaka anei lakou no ke Akua i ko oukou manao, a i ko oukou ike ana? I mai paha kekahi o oukou, alaila; aole loa lakou he poe Kristiano oiaio. Pela