Ka Nonanona, Volume III, Number 20, 20 Pepeluali 1844 — Page 101

1844.) KA NONANONA. 101

            PAUKU VI. O ka waiwai Beritania, ua maopopo he mau mea no ke kauwahi mai o ko Beritania Aupuni, aole e hookapuia kekahi o ia mau mea, aole hoi e oi aku ke dute o ka lawe ana mai mamua o elima hapa haneri ma ke ano o ke kuai ana.
          PAUKU VII. Aole e hooukuia kekahi moku Beritania, a me kekahi waiwai i laweia mai ma luna o ko Beritania mau moku, ua oi aku i ka hoouku ana i na moku a me ka waiwai o ka aina i hoopomaikai nui ia.
          PAUKU VIII. E manaoia na kanaka o ke'lii o ko Hawaii Pae Aina ma ka lakou kuai ana, a me na mea e ae o ka lakou hana ana me Beritania Nui, ua like lakou me ko ke Aupuni i hoopomaikai loa ia.
          Hoopaaia ma Lahaina, Maui, i ka la umikumamalua o Feberuari, hookahi tausani ewalu haneri a me kanaha kumamaha.
(Inoa,) KAMEHAMEHA III. (Inoa,) KEKAULUOHI. (Inoa,) WM. MILLER.
Ke kakauia imua o
G. P. JUDD, Kakauolelo no ko na aina e.
R. C. WYLLIE, Kakauolelo no ke Kanikele nui.

Ka palapala a ka Haku A BERDEEN, ke Kakauolelo no ko na aina e, o ke Aupuni Beretania.
Ma ka Hale oihana no ko na aina e, Ladana, Sep t. 23, 1843.

            AUHEA OE; Ua loaa mai i ke Aliiwahine o Beritania, o ko'u alii no hoi ia, na palapala akolu au i palapala mai ai ia ia; hookahi ma ka la 8 o Aperila, 1842, a elua hoi i ka la 10 o Maraki, 1843.
          Ua pau i ka hooponoponoia na pilikia poino i kupu mai ai iwaena o ke aupuni Beritania a me ke aupuni Hawaii: na na luna au i houna mai ai, a me na luna o ke Aliiwahine hanohano i hooponopono iho. No ka makemake nui o ke Aliiwahine hanohano, o Victoria, e hooluolu aku ia ia, nolaila, kauoha mai ua Aliiwahine hanohano nei ia'u e hoakaka'ku ia oe, ua hooliloia o Wilama Mila i Kanikele nui nona, no ko Hawaii pae aina, a no na aina moku e aku ma ka moana Pakifika. A eia ko'u manao nonoi aku ia oe ke alii, e paulele oe i na mea a pau a Mi. Mila e hoike aku ia oe; a e kokua pono aku no hoi oe ia ia i na oihana a pau i kauohaia ia ia. Eia kekahi hana nui ana e hana'i, o ka imi i Kuikahi hou e like me ka ke Aliiwahine kauoha, e hoike aku ia oe, a e kau iho i kona inoa ma ka inoa o ka mea Hanohano, o ke Aliiwahine.
          Na Mi. Mila e haawi aku i keia palapala ia oe, i ka mea Hanohano, a e hooiaio no hoi ia oe i ka makemake o ke Aliiwahine, e pomaikai a me ke ku okoa ke aupuni Hawaii. Ua hauoha mai no nae ke Aliiwahine, kuu Moi, ia'u e olelo hou ae ia oe, ua makemake ke aliiwahine Hanohano e nana pono oe i na mea a pau a ke Kanikele nui e hoike aku ia oe no na kanaka Beritania; ua manao kanalua ole ke Aliiwahine, kuu Moi, e hana pololei oe ia lakou i na manawa a pau.
          Me ka makemake nui i kou ola a me ka pomaikai, he nani ko'u i ka noho i kauwa haahaa a me ka hoolohe nau.
A BERDEEN
          No Kamehameha III., ko Hawaii pae aina.

OLELO HOOLAHA.

            I lohe oukou, e ko maua mau kanaka aloha a pau loa, a me na mea e ae he kuleana ko lakou ma keia mau olelo.
          No ka mea, o ko makou makemake Alii, i keia la e kakauia keia e hooholo a e kakau i ka olelo Kuikahi me "ka Moi, Victoria ke'Lii Wahine o Beritania Nui, a me Irelani ke kokua o ka manaoio" i hoikeia e William Miller, Esquire, ke Kanikele nui ma ka inoa o ka Moi Wahine. A no ka mea, ua kauohaia ko maua mau Luna e hooponopono pu me ke Aupuni o ka Moi Kristiano, Louis Phillippe, ke Lii o ko Farani no kekahi mau hoololi ana o ke Kuikahi me Farani i kakauia Iulai 17, 1839, e like me ko makou makemake e pono ai ko makou mau kanaka.
          Nolaila, ke hoolaha aku nei makou.
          AKAHI. O ka ahaolelo i manao ia e akoakoa ma Lahaina ma Aperila aku nei, aole halawai ia wa, aka, e hoopanee ia no a hoi mai na Luna, alaila, hoike ia ka manawa a me kahi e halawai ai, a lohe pono na mea a pau o na hale elua o ka ahaolelo.
          ELUA. E pau no ka pauku elua o ke