Ka Nonanona, Volume III, Number 19, 6 February 1844 — Page 95

1844.) KA NONANONA. 95

NA KANAWAI HEWA MA HAWAII

            Aloha oe e Kiko, ua ike makou i kau mau olelo i paiia ma ka Nonanona Pepa 18 aoao 87.
          Aole i hanaia e makou, aole no hoi na ke Aupuni, a me ka ahaolelo i hana i na Kanawai o ke Aupuni Hawaii nei, e like me kau i hoolaha mai nei.
          O ka poe i hana pela, na lakou wale no ia; a ua kue maoli no i ke kanawai a me kona ano nui. O ko'u manao no ia.
Na G. L. KAPEAU.
Honolulu, Ian. 27, 1844.

          Aloha oe e ka Nonanona, he wahi ukana kau e hooili aku nei ia oe, a nau e hai aku i na pepeiao o na Lunaauhau ma Hawaii a puni. Ua hai ia i ko makou mau pepeiao e Kiko ma ka Nonanona. I ko makou lohe ana, aole mea e oluolu ai, no ka mea, ua hoouku ia e oukou ka poe i hooluolu ia e ke kanawai.
          Aole i hanaia ma Oahu nei; aole hoi i lohe ia, aka, ma Hawaii wale no. Nani wale ka nui o na kaumaha ma Hawaii no ka oukou hana ana ma ke Kanawai.
          E na makua aloha, mai hana hou oukou i keia mau mea kaumaha; ina e hana hou ia, o ka pau no ia o ko ke Aupuni nini anu i ka wai ma ko oukou mau poo; aka, e baila ke Aupuni i ka wai a wela, a niniia ma ko oukou poo, oia ka ke Aupuni makana i na mea ku e i kona malu a me na pono.
WILLIAM P. LELEIOHOKU.
Honolulu, Ian. 27, 1844.

PULE HOOMAU.

            I ka malama o Dekemaba i hala ae nei, he pule hoomau, ma ka ekalesia elua, ma Honolulu nei. Oia ka hope o ka makahiki ano e ma keia pae aina. Aole kakou makemake i kekahi makahiki hou aku e like me ia, aole loa. He wa haunaele loa no ia ma keia ekalesia.
          Ua lawe pio ia keia aupuni e kekahi malihini, a ua wawahiia kekahi mau kanawai maikai e ia, nolaila ua kuhi hewa kekahi poe hoahanau, a ua lalau lakou i o ia nei me ka pono ole. A ua haalele kekahi poe i ka manao ma ka pono; ua kapae lakou i ka pule, a me ka mihi, a me ka heluhelu ana i ka ke Akua olelo, a me ka halawai ana i ka la Sabati; ua hoopunipuniia lakou e ka poe hoowalewale, a ua ili ko lakou manaoio ma ka pohaku hoomaloka, a nahaha loa, o ka make no ia o ko lakou manao ana ma ka pono.
          Alaila hapai lakou i ka ka Diabolo hana ana me ka ikaika loa, a ua haumia lakou. Moe kolohe, hookamakama, hoolimalima i ko lakou hale i ka poe hookamakama, inu rama, inu awa, puhi baka, aihue, piliwaiwai, lealea, hakaka, ia mea aku, ia mea aku. Nolaila, ma keia ahaaina i hala ae nei, ua oki aku makou i hookahi haneri a keu aku, e like me ke kauoha ma ka palapala hemolele; "Ke nonoi aku nei au ia oukou, e na hoahanau, e nana aku i ka poe hoomokuahana a me ka hoohihia, ma ka mea ku e i ka olelo a oukou i aoia'i, a e hookaokoa ae mai o lakou ae. No ka mea, ke malama ole nei ua poe la i ka Haku ia Iesu Kristo, aka, i ko lakou opu iho no." Roma 16: 17, 18.
          Eia hoi. "Ke kauoha aku nei hoi makou ia oukou, e na hoahanau, ma ka inoa o ko kakou Haku, o Iesu Kristo, e hookaawale ia oukou iho, mai kela hoahanau a me keia hoahanau e hele hokai ana, aole mamuli o ka haawina i kauohaia'ku ai e makou." Tesalonike II. 3; 6.
            Eia hoi kekahi. Ua mihi mai kekahi