Ka Nonanona, Volume III, Number 19, 6 February 1844 — Page 93

1844.) KA NONANONA. 93

a me na keiki kane a me na kaikamahine. Pono ka auhau ana o na luna i na kane he dala hookahi, a o na wahine he hapalua; aka i ke kau ana i ka auhau i na keiki kane ua hala na makahiki umikumamaha, haalele na luna ia pauku, a huli ma ka 23 a auhau mai la lakou i na keiki kane mamuli o ke kanawai i kauia no na makua mea keiki lehulehu, a ma ia kanawai okoa lakou i auhau ai na keiki kane a pau o ka aina. Ua ku i ka hapaha kekahi poe keiki; a ua ku i ka hapalua kekahi poe, a ua ku i na hapaha ekolu kekahi poe. Ma ka aoao 18 o ke kanawai, ua maopopo loa he hapaha wale no ka auhau ma ke kino o na keiki kane, ua hala na makahiki 14. Oia kanawai ma ka aoao 18, ua ku ia i na keiki o na makua he lehulehu na keiki, a ia lakou wale no. No keaha i lalau na luna i kela pauku o ke kanawai a haalele i ka pauku maopopo loa? I nui aku paha ke kala o ke aupuni, ea. Pono iki, ina i auhau i na kanaka makua a pau mamuli o ia pauku, a haalele loa ia kanawai ma ka aoao 18, alaila pau na kanaka makua i ke kau ole i ke kala o ke kino, aka, aole na luna i hana pela o emi mai ke kala o ke aupuni.
          Nui ke kala i loaa mai i na luna auhau, no ko lakou lawe wale ana i ke kanawai i manaoia no na makua keiki lehulehu, a kau wale ana maluna o na keiki a pau.
          Auhea oukou e na haumana akamai i ka helu. E imi oukou, a hai mai, i ehia kala e ohi wale ia ma keia lalau o na luna.
          Mai Hawaii a Niihau 4 paha tau sani keiki, ua hala ka makahiki 16, 4 paha tausani, ua hala ka makahiki 18, a 3 paha tausani, ua hala ka makahiki 20. Ina e auhau ia lakou a pau ma ka aoao 23, ehia dala i oi aku i ko ka auhau ana ma ka aoao 18 o ke kanawai.

BATIMEA PUAAIKI.

            Niele. No ke aha oe i noi mai ai e hookomoia iloko o ka ekalesia?
          Ekemu. No ka mea, ke aloha aku nei au ia Iesu Kristo, a ke aloha aku nei au ia oe; a ke makemake aku nei e noho pu me oe iloko o ka pa hipa o Kri sto, i hui pu ia au me oe i ka ai ana i ka berena hemolele, a i ka inu ana i ka waina hemolele.
          N. Heaha ka berena hemolele?
          E. O ke kino o Kristo no ia, ka mea ana i haawi mai i ola ka poe hewa.
          N. Ua ai anei kakou i ke kino o Kristo?
          E. Aole, aka, ua ai kakou i ka berena i hoailona o kona kino, a e like me ka kakou ai ana i make ole ko kakou kino, pela, ua aloha ko kakou poe uhane ia Iesu Kristo, a lilo mai oia i mea ola i make ole lakou.
          N. Heaha ka waina hemolele?
          E. O ke koko o Kristo no ia, ka mea i nininiia ma Kalevari i Ierusalema, ma ka aina o Iudea, i mea ola e ola'i kakou ka poe hewa.
          N. Ua inu anei kakou i ke koko o Kristo?
          E. Aole, o ka waina, he hoailona ia o kona koko, e like me ka berena he hoailona ia o kona kino; a o ka poe a pau i hele io Kristo la, a hilinai maluna ona, e pau auanei ko lakou hewa i ka holoiia i kona koko, a e ola mau loa ko lokou poe uhane ma ka lani.
          N. No ke aha la oe e manao ai, he mea pono nou e komo iloko o ka ekalesia mamua o na kanaka e ae?