Ka Nonanona, Volume III, Number 19, 6 February 1844 — Page 92

92 KA NONANONA. (FEBERUARI,

keia mea opala, i mea kipulu. Mai puhi wale i kekahi mea i ke ahi. E hoiliili i ka opala a pau, ka mauu, ka lepo, ka lehu ahi, ka opala ko, ka lau helelei, a pela aku - i ahu hookahi, i popopo. Alaila i hui aku ia me ka lepo o ka holoholona, ka bipi paha, ke kao, ka hipa, ka puaa, ka lio, ka pelehu, alaila e hui aku ia lepo me ka lepo o ka honua kahi e kanu ai i na mea kanu.
          Mai kiola wale i kekahi mea opala, a me ke koena holoholona.
          6. E waeia na hua maikai i mea kanu, a me na kumulau maikai o na holoholona.
          Mai kanu aku i ka hua o ka mea ino, he liilii paha, he mimino paha.
          Mai ai aku i na mea i oi ka maikai. A pela na holoholona.
          E malamaia na mea kanu. Ina e kanuia ka mea ino, e ulu mai no ia he ino, a e emi mau ka maikai.
          Pela na holoholona. E pepehiia na mea ino, aka e malama i na mea maikai, na mea laka hoi i mea hoolaha. Na'u na PELE.
          Auhea oe e ka Nonanona: -
            He wahi pilikia ko'u, a ke hoopii nei au imua ou. E hoolohe mai oe i ka maua me ka Lunaauhau o ko'u wahi, me he lunakawai la oe. Nolaila, ea, e hoolohe mai a hooponopono iho.
          Eia ko'u. He keiki ka'u; haawi aku au ia ia i kahi hapaha, i aku la au ia ia, eia ke kala no kou kino e lawe aku oe a haawi na ka luna, a kaa kou aie. Lawe aku la kela a haawi aku la, aka, hoole ka luna, aole lawe; i mai la ia he kala okoa ka pono.
          Hoi mai la ke keiki, a hoihoi mai ia'u i ka hapaha, i mai la, aole o ka luna i lawe, he kala okoa ka! kona makemake. Kahaha iho la au; kainoa ua pai ia ma ke kanawai he hapaha ka auhau a ke keiki, ke kau nei ka ka luna i kala okoa.
          Mahope halawai maua me ka luna nei. I aku la au ia ia he kala okoa anei ka uku a ka'u keiki? ae mai kela "ae, kala no." I aku la au. Kainoa he hapaha. I mai la oia nei, no kau keiki haalele ana i ke kula, ua lilo ia i makua, a nolaila o ka hookupu kala okoa ka pono.
          Ano la, e ka Nonanona, ka lunakanawai pono paewaewa ole. Ua lohe anei oe i ka maua. E hooponopono oe iwaena o maua. Ua huli iho nei au i ka buke kanawai o ke aupuni, aole i loaa iki ia'u kahi kanawai a ka luna i olelo mai nei, o ke keiki haalele kula e hookupu ia i ke kala okoa.
          E ka Nonanona. Malama paha, ua huli hewa paha wau. O oe kekahi e huli ikaika mai mua a hope o ke kanawai, a i loaa ia oe ua kanawai nei, pono. Aole au e hoole i ka uku; aka ina aole i paiia ma ka pepa, aole au e uku aku. Nui wale na keiki kane hele ole i ke kula, a ina paha e kau ka luna i kala okoa, maluna o lakou a pau, pono anei? Nau no e wehe ae i keia pilikia.
          Eia kekahi pilikia. Nau na ka Nonanona e olelo mai i kou manao mahope o ko lohe pono ana. Ke hoonele wale ia mai nei na kuaaina, a me ka poe makaainana naaupo e na luna auhau, aole nae i hoopaiia ia mau luna e like me ke kanawai.
          Penei ka hana ana o na luna auhau. I ko lakou kau ana i ke kala o ke kino, aole o lakou hele pono ma ke kanawai. Aoao 18: Mok. 3. Pauk. 1, Ke ana pono ia o ka auhau ana i na kane, a me na wahine