Ka Nonanona, Volume III, Number 19, 6 February 1844 — Page 89

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." Solomona.
Buke 3. HONOLULU, OAHU, FEBERUARI 6, 1844. Pepa 19.

NO WAIMEA HAWAII. HELU 3.

            3 Ke ano o na kanaka. Elua lahui kanaka olaila, he lahui kanaka maoli, a he lahui kanaka haole.
          1. O ka noho ana o na kanaka maoli. O kekahi poe ke noho la lakou ma ka pono. Ua kapaia lakou he poe hoahanau. Ke hele la lakou i na halawai Sabati, a me na halawai e ae, ke kokua la lakou i ke aupuni o ke Akua. Ua uuku nae ko lakou kokua ana no ka nui o ko lakou pilikia, no ka nele maoli kekahi, a no ka uuku paha o ke aloha kekahi.
          Eia nae kekahi hewa o lakou, ua i mai ke kumu, aole lakou i launa pinepine me ia, aneane like kekahi poe me ka poe hihiu laka ole mai. Aole hoi lakou i kokua nui ia ia. Kokua iki mai no kekahi, he mau hua moa paha, he wahi ia paha. Aka, o ka nui o kana ai a me ka wahie, ua pau no i ke kuai ia.
          Nui no na hoahanau mamua. Aka, i keia manawa, ua hooemi ia mai no ka nui o ko lakou hewa. Elua haule nui ana i keia makahiki i hala iho nei. Kai noa e hoi mai ana lakou i ka mihi. Pela ko ke Akua makemake a me kana kauoha. Aka, aole pela ko lakou makemake. Ua mihi no kekahi poe, aka, ua pau ka nui i ka hoohua keeo loa ma ka aoao hewa. Ina kii aku ia lakou e hoi mai, hoole mai lakou, aole makou e hoi aku, ko makou manao no, e hoomau ma ka hewa. Ina hiki mai ka la Sabati, hele mai kekahi o ua poe nei i ka halawai kakahiaka, aka o ka halawai ahiahi, aole loa lakou e ikeia malaila. A o kekahi poe hoi, ua hele lakou i ka halawai Katolika, a o kekahi poe hoi, aole hele iki i na halawai a pau. Ina he halawai ma ko lakou wahi; pau lakou i ka holo ma kahi e; ina ike kekahi i ke kumu e kokoke ana, wikiwiki lakou e pani i ka puka o ka hale. Pela ka noho ana o na hoahanau a me ka poe i haule. O kekahi poe hoi o na kanaka maoli, aia no ia mawaho, mamuli o ko keia ao. Aole lakou i huli mai mamua; ua mau no ko lakou noho ana pela. Aole lakou i lilo loa i ka haunaele. Makau iki no ka nui o lakou i na kanawai o ka aina. A hiki i ka la pule, hele no kekahi o ia poe i ka luakini o Iehova, i ke kakahiaka, aole nae i ke ahiahi. Paakiki nae lakou: nui ko lakou lohe i ka ke Akua olelo, aole nae lakou i huli. Imi no ke kumu i na mea e pono ai ko lakou uhane, aole loaa. Makemake no oia e halawai pinepine me lakou, aka, aole lakou makemake, aole hiki mai. Aloha ino lakou! Auwe ko lakou hopena. He hapa wale no ka poe i huli mai i keia makahiki. Aole like me na makahiki mamua aku. Aole haule mai ka Uhane Hemolele e like me kela manawa. Ua panoa ka aina, ua maloo na kumu wai, ua lanakila ka enemi. Pehea la e haule hou mai a ka Uhane.?
          2 Ka noho ana o na haole. He nui ka lakou mau hana ma ke kino, he hana ili, he hana kamaa, he puhi ko, he hanohano, a me na kaula waha, he amala, he kamana, he hale kuai, he hana kahi, he olo papa, he mahi ai, he hanai bipi, me ka hana