Ka Nonanona, Volume III, Number 18, 23 January 1844 — Page 84

84 KA NONANONA. (IANUARI,

ikaika o kona uhane; no ka maopopo a me ka maikai o na mea ana i hoi aku ai, a no ka haahaa o kona naau, ua akaka lea ia, aole he malihini oia ma kahi pule. O kona kukuli ana; o kona kau ana i kona mau lima ma kona umauma, o kona alawa ana i kona mau maka paa i ka lani; o ke ano e o kona hea ana i keia olelo, "e Iehova;" o kona leo oluolu, a me kona ikaika ma ke noi ana; o keia mau mea a pua, he mea ia e maopopo ai, aole e pule ana oia i ke Akua ma kahi mamao aku, aka, i ke Akua ma kahi kokoke, iwaena konu o makou. Aole hiki ke hoopoina i kana pule. Ua pili pono ia i ko makou poe uhane, a i ko makou manao, ua pili no i ka poe a pau i ike i ke ano o ka pule. Hookahi hora me keia, hookahi mea hoike i ka mana o ka oiaio e wehe i na maka o ka poe makapo, a "e hoohuli mai ka pouli mai i ka malamalama, a mai ka mana o Satana i ke Akua," he uku pa umi ia, no ka makou hana a pau loa; a he mea ia e hiki ai makou ke hana oluolu hou aku, a ke hoomanawanui i ka luhi, a me ka ilihune, ke kaumaha, a me na mea e ae he lehulehu, na mea e poho ai ko makou manao oluolu, a e make ai ke kino o na misionari ma na aina pegana. Ina, e hiki ke hoopau i na moana, a me na aina puni ole, na mea e kaawale ai makou mai ka maka o na kanaka o ke Akua aku, i ike mai lakou i keia mau mea, ua manao koke lakou, ua uku nui ia lakou no ko lakou haawi ana i ka waiwai, a me ka lakou hana a pau ma na mea e hoolahaia'i ka euanelio ma na aina naaupo: a ua olioli lakou i ka hana hou aku, a i ka hana mau a hookaumahaia ko ke ao a pau loa. Ina o Puaaiki, ke kanaka ilihune la, a me ka makapo, oia wale no ka mea o keia lahuikanaka e hiki ke hookokoke aku i ke Akua, ina oia wale no ka i ike i ka olelo aku me ka oiaio, "e Aba ka makua," ina he mea uuku i haawi ia mai e ko Amerika poe ekalesia, he mea e ola'i keia uhane hookahi." I ka malama Aperila, 1825, Ua palapala aku la, Mr. Rikeke penei. "Ua hele mai o Kauawahi a me Puaaiki e like me kau olelo ia laua i kela Sabati. I ike oukou i ka naauao i loaa mai i keia kanaka makapo, ma na mea e pili ana i ka aoao Kristiano, e haawi aku au ia oukou i kekahi mau mea a'u i niele aku ia ia, a me na mea ana i ekemu mai ai ia'u."

NO KA MAHIAI.

Wailuku, Nov 1, 1843.

                Auhea oe e ka Nonanona; he wahi manao ko'u ia oe; ina manao oe e hoakaka'ku, oia ia oe; a i manao oe, 'Aole,' oia ae la no.
            No ka mahiai ko'u manao e hoakaka'ku, nei.
            Eia nae kekahi mea hoakaka e mamua. I ka poe ikaika i keia olelo, aole i ka poe palaualelo. E pono ka mea e manao ana e malama i keia olelo e haalele e i ka palaualelo. No ka mea, "O ka palaualelo ka mea e poho ai i ka hiamoe nui. A o ka uhane hoomolowa e pololi no ia." Sol. XIX: 15.
            Aole e kohu iki ka palaualelo i ka hana e poho ai. Pau ia.
            O ka mahiai he hana ia e waiwai ai.
            1. Oia no ke kumu e waiwai ai ko keia pae aina. Nolaila mai ka ai. O na lahuikanaka ai i ka mea ulu wale, a me ka holoholona hihiu, he pomaikai ole lakou. Uuku kahi