Ka Nonanona, Volume III, Number 14, 28 Nowemapa 1843 — Page 68

68 KA NONANONA. (NOVEMABA,

A kupu mai la ka manao iloko o'u, o ka puka ka ko laua mea i pilikia ai.
          Kahea aku la au, "Eia ka puka," "Eia ka puka." A ku mai la o Punia me ke keiki pu no iloko o kona poli, a ua aa ia ke kapa. Hoomau aku la au i ke kahea i ka puka, a loaa wale laua ia'u, puka iwaho.
          Nani ka pilikia o keia pakele ana! Na ka Haku lokomaikai i kokua mai ia makou iloko o keia pilikia nui.
          A o ko'u makuawahine ka i ola mahunehune, ua wela nae ka lima akau a me ke kua, ua pau ka ili, aole nae i make. O ko makou mau kino wale no ka i puka wale iwaho, aohe wahi kapa komo, aohe kekahi wahi mea iki, pilikia loa makou e noho nei i keia mau la, nui ka hemahema.
          Eia kahi mau hale wela. O ko ka haole puhi ko, o ko Emilia mau hale elua, o ko Kapiu. Ola mahunehune na kanaka, aohe waiwai lawe, o na kino wale no ka i pakele mai. Na keia kanaka hookahi no i puni keia mau hale eono, no kona hoomauhala. O ka Kahookui wahine wale no ma ko laua hale me na keiki eha, hookahi keiki nui, a o Kiikii aono. Pakele ko laua pahu me ka ipu kukui, oia wale no na waiwai i pakele mai.
          Eia hoi ka mea i puhiia'i ko ka haole puhi ko, o ka huhu ia ia.
          A o ko Elia, o ke kuamuamu ana a kahi kanaka o laua i ka pupule o ua wahi kanaka nei. Pela ko Kapiu hale i wela ai, o ka nailiili a kekahi kanaka o lakou i ka pupule, a he hewa e ae kekahi. Nui ko makou huhu i keia wahi kanaka lokoino. O Kanekoa ka inoa o keia kanaka hana ino. Ua hoopupule nae, a mahope pupuhi i na hale, ke paa nei oia i ka hao. Ua ninau pono au ia ia, a ua hai pololei mai ia makou, i kana puhi ana i ke ahi. Hoohuahualau aku au ia ia, i maopopo ia'u kona pupule loa, aole hewa iki kana olelo, pololei no, aole kekee, e like no me ka makou ike, a me ko makou lohe.
          Aole pau loa i ka hoakaka aku.
KAELEMAKULE.

KII KAHIKO O HAWAII NEI.

            Makemake au i mau wahi kii kahiko; na kii i hoomanaia ma keia pae aina mamua. O ka poe mea kii, e lawe mai a kuai au.
LIMAIKAIKA.

PALAPALA AINA HOU.

            Ua hanaia e Aneru ma Lahaina i palapala aina hou; he poepoe nui ka mea i hanaia a paa. O ka poe makemake e kuai, pono no e palapala koke aku ia Aneru a loaa koke no.

KA MAI.

            He nui wale ka mai ma Honolulu nei i keia manawa; no ke anu paha, no ke aha la? O na haole kekahi poe mai, a ua make kekahi mau haole malihini i keia mau la. He Kapena moku okohola kekahi haole i make iho nei, no Jeremania ia moku, a o Otto ka inoa o ke Kapena.
          Eia no kana wahine ma Honolulu nei me ke keiki hou. Aloha ino ia! Ua pilikia loa.

KA HANA A KE AKUA MA KANEOHE.

            Ke palapala mai nei o Pareka, ua makaala kolaila kanaka i keia wa ma ko ka Uhane. Piha loa na hale halawai haipule, a ua nui ka poe imi i ke ola. He oiaio paha ko lakou imi ana, aole paha. Ma ka hua e akaka ai, ma ke ku paa, noho pono, hoomau a hiki i ka hopena. Aole anei i hiki mai ka manawa e hoomaikai hou mai ke Akua i na ekalesia a pau o Hawaii nei? Ina e ala mai na hoahanau a kahea aku i ka Haku, hiki no.

MAKE MA KINA.

            I keia mau la iho nei, lohe makou ua nui loa ka make ana o na haole ma ka mokupuni o Hongkong, kahi i lilo iho nei i ko Beritania, a ua kokoke loa i Kanetona. He nui na haole mai, a he nui ka poe make; O ke alii Beritania malaila, o Pottinger kekahi mea mai loa, a ua make o Morrison kekahi haole kaulana malaila. Nolaila, ke hoi nui nei na haole i Makao.

Na LIMAIKAIKA e hoopuka'ku.