Ka Nonanona, Volume III, Number 14, 28 November 1843 — Page 66

66 KA NONANONA. (NOVEMABA,

Alaila, i mai ka luna ia'u. "Olelo mai Naheana e hoi oe, a e uku i na kala ehiku." I aku au penei, "Nokeaha?" Hai mai kela, "aole no kou moekolohe; no kou paakiki no i ke Alii." Iho ae la maua i ke Kahukula, no ka mea, aia no ia ia na kala o kuu uku no ke kula ana i na keiki. Ae mai ke Kahukula, a lilo ia Naheana kuu mau kala $7. Nolaila ua hemo mai nei au.
          Eia kuu ninau. Heaha la kuu hala i paa ai au i ka hao a poalima a lilo hoi kuu mau kala ehiku?
          Olelo Naheana, o kuu "paakiki," ka hala. Paakiki pehea? No kuu ae ole ana i ka hewa me ka hihia ole, oia anei?
          Malia paha ua hewa au i kona manao no kela olelo, e "hoopii ia Kamehameha III." Ina ua hewa ia hua, no ke akaka ole ia o ke kanawai, ma ka aoao 13 a ma ka aoao 71, pauku 20.
          Ina ua hewa paha ia hua; ku anei ia i ka paa loa i ka hao i na la elima, a uku no hoi i na kala 7. Pohihihi ke kanawai ia makou na kanaka ma kuaaina. Aole au i hoino, aole au i pakike i ke alii, no ka mea, ua i mai ka olelo a ke Akua, e hoomaikai aku i ke alii, aole au e hiki ke hoino. Manao au ua paa makehewa au i ka hao, no ka ukiuki o Naheana laua o Keaweamahi, aole no ka hewa maoli. Manao au aole no ke alii kuu paa i ka hao, aka, no ka halihali ana o Naheana i kela hua imua ona, a olelo ua hoino aku au i ke alii, a puni ke alii ia Naheana.
          E ka poe ike ma kahi malamalama, e hai mai oukou, ua hewa io anei au?
          Ina ua hewa kuu hoopii ana ia Kamehameha III, aole pela i ka wa a Paulo i hoopii ai, aole kela i hoopaiia, no kona hoopii ana ma ka Oihana, mokuna 25: 19, 12.
          Ina aloha oe e ka Nonanona ia makou na kanaka i hookaumahaia ma kuaaina, pono oe e hoomanawanui e pai i kuu mau manao. Pau keia, hookahi koe. SETEPANO
          Kumukula ma Kaohe. Okatoba, 28, 1843.

KA PALAPALA A TATINA I NA HOAHANAU.
HELU 2.

            E na hoahanau mai Hawaii a Kauai:
          Eia no kekahi mea maopopo i na kanaka oiaio o ke Akua, he hewa ke noho mamuli o ke kino. "Ina e noho oukou mamuli o ke kino, e make no oukou."
          Pela ka Paulo olelo i na hoahanau ma Roma. "No ka mea, o ka poe mamuli o ke kino, manao lakou i na mea o ke kino; aka, o ka poe mamuli o ka Uhane, i na mea o ka Uhane." Ua maopopo loa keia i ka poe i hoohanau hou ia a i Hoomaikaiia hoi e ka Uhane o ke Akua.
          Ua akaka ia lakou, he makapo ka naau o na kanaka a pau e hele ana ma ko ke kino, a e noho ana mamuli o ka naau hewa, a ma ka makemake o ke kanaka kahiko; a e hiki no i na kanaka ma ka Uhane, ke hoomaopopo aku i ka helehelena o ua naau makapo la, a me kana mau hana, a me kana mau manao, no ka mea, ua kaakaa na maka o ka naau o na haipule io o ke Akua, a ua ike lea lakou i ke ano o ka poe e hele ana ma ko ke kino manao, a mamuli hoi o na mea a ka naau kahiko i makemake ai.