Ka Nonanona, Volume III, Number 14, 28 Nowemapa 1843 — Page 65

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." SOLOMONA.
Buke 3. HONOLULU, OAHU, NOVEMABA 28, 1843. Pepa 14.

KA PALAPALA LUA O SETEPANO MA KAILUA.

            Aloha oe e ka Nonanona.
          Eia wau, ua hemo mai ka halepaahao mai, nolaila e hooakaka aku wau i kuu hihia a me kuu hemo ana.
            I ka poalima, Okatoba 20, alakai, o Kalaumoku laua o Keaweamahi, ko makou lunakanawai, ia'u i Kailua e hookolokolo, no ko lakou manao ua hele au i ka po, aole i ike lakou ia'u e hele ana i ka po; hele mai ka makai o Kalaumoku i kuu hale i ka po, a hoala mai ia'u a i mai ua loaa au ia ia ma Pahoehoe!
          Hookuke aku au ia ia e hoi. Puka makou i Kailua; poalima hookolokolo makou me Naheana e aa kukui i ka po. Hoohiki kuu wahine ma ka Palapala Hemolele ua loaa wau ia ia e hele ana i ka po, ma ke alanui, malia paha ua loaa ia ia kekahi kanaka, kona paa ole ana ka hewa. O ka ekemu ole kekahi hewa, no ka pouli, aole akaka ka ili kanaka, aohe mahina. Hoohiki nae oia owau kela kanaka! Ae o Naheana i ko ka wahine manao. Haawi oia i ka buke hemolele ia'u e honi, honi iho la au a hoole aku au, aole au i hele ia po, no kuu ike ana e moe ana wau ma ka hale, aole owau wale no, eono makou ka poe ma kuu hale e moe ana ia po.
          Aka, hoahewa mai o Naheana ia'u. I mai "e paa oe i ke kaula." I aku au, "Heaha ka hihia?" I mai la kela, "O oe no ka i hopuia i ka po i ka wahine. E paa oe ia'u i ke kaula." I aku au. "Paa koke no?" I mai la kela, "ae, aole e hiki ia oe ke hoopii e ae." I aku au," e aho e hoopii ia Kamehameha III, ka mea nona ke kanawai." I mai la kela he hoino ka oe i ke Kiaaina." I aku au penei. "Nau wau i papa mai, aole e hiki ke hoopii ia Kuakini." I mai la kela e waiho a kakahiaka.
          Kakahiaka ae pii makou i ke alii. I mai ke alii, "O ka poe hihia keia?" Ae aku o Keaweamahi, "ae," Ninau ke alii ia Naheana. "Pehea?" I aku o Naheana, ua hookolokolo makou a ua hewa oia nei; ua hoino ia oe, a e hoopii ana ia Kamehameha III."
          I aku ke alii penei, "Pehea ko oukou manao na luna?" I ae na luna (o Naheana me kona kanaka o Keaweamahi.) "Ua hewa oia nei." I aku au, "E ke alii, e hookolokolo oe i ka hewa, i akaka; mai ae wale oe i ka manao o na luna e like me Dariu e hoolei ia Daniela i ka lua liona." Aole hookolokolo ke alii; kena oia e paa wau i ka hao. I aku au ia ia, "e aho e hoopii wau ia Kamehameha III." Hookuke mai ke alii ia'u. Lalau mai o Naheana i kuu lima a alakai aku ia'u i ka halepaa hao, a hikii i kuu lima a paa loa ma ke kua, ma ka hai lima ke kaula a eha loa wau; eleele loa ka poho o kuu lima, ma ka wawae kekahi kaula. Paa loa na wawae elua i ke kaula, pela wau i waiho ai me ka eha, mai kakahiaka a auwi ka la; puka mai ka hao, mai uka mai, alaila hemo ke kaula, alakaiia aku au i ka halepaa hao iuka. Elima o'u mau la i noho ilaila, paa i ka hao.