Ka Nonanona, Volume III, Number 12, 31 October 1843 — Page 55

60 KA NONANONA. (OKATOBA,

                3 Eu, na koa kamalii,
                Pale i na enemi,
                Kaua ma ka pololei,
                                Mamuli o ka wai:
                Alu pu a kinai no,
                I na wai hehena a pau,
                I keia la hoouka hou,
                                Aole nauwe ae.

                4 Eia ke hoohiki nei,
                E pau na wai e ona ai,
                Oia mau a make ai,
                                Mamuli o ka wai:
                Luli ole ka manao,
                Kanalua ole no,
                Aole noho pio hou,
                                Ke lanakila nei.
(Kekoaio ka leo.)

                Pau keia, ku iluna kekahi mau keiki elua e paio. Eia ke ano nui o keia paio, he alii kekahi keiki, a he haole kuai rama kekahi. Kii mai ka haole i palapala kuai rama, a hoole loa ke alii me ka hoike aku i ka hewa o ka rama, a kipaku i kela haole. Pau ia, hoike aku o Dr. Babcock no Oregona mai i ka maluhia o Oregona, no ka rama ole, a hooikaika hoi ia i na koa inu wai e hookupaa ma ka hoole i na mea ona a pau.
                Pau e ka manawa, aole pau na olelo: eia nae ka pau ana o ka hana; ku nui na koa iluna e ae like e hoole i na mea ona, alaila, wawa nui mai me na leo nui, UOKI NA MEA ONA. Kani nui mai na pahu kani, a o ka hoi nui no ia. Ua holo mua paha keia hana i keia manawa.

IOANE.

                I ka la 27 e Okatoba nei, hiki mai o Ioane no Waioli me kana wahine a me na keiki i Honolulu nei. Oluolu lakou a pau.

                I ka la 28 o Ok. nei, holo aku kekahi manuwa Beritania, o Hazzard kona inoa, i Mekiko, Mazetlan.

Make.

                Mea e ka make iwaena o makou ma Honolulu nei i keia manawa. I ka la 27 o Okatoba nei, hanau mai ke keiki kane a Katela ma, he hanau make no nae, aole uwe, aole oni ua keiki nei.
                Ia po hookahi no i ka hora 3, make ke keikikane hope loa o Limaikaika ma; o Reubena kona inoa, kokoke 13 malama kona ola ana ma keia ao, a hoi koke aku ia i kona mea nana i hana. O ka ulu ana o na niho maka ke kumu o kona mai e make ai. Eha loa na naau o makou, a me na kaikuaana, a me na kaikuwahine ona; aole nae ino ka manao i ke Akua. Ua pomaikai ke keiki, o makou ka poe poino.
                Eia nae ka make weliweli loa a makou i ike iho nei; O Mi. Loke, ua make ia i ka la 23 o Okatoba. Eha mau la wale no o kona mai ana; he nahu paakiki loa kona mai, aole hemo i ke kahuna lapaau. No ka nui o kona eha, aole nui o kana olelo, a me na kauoha no kana mau kaikamahine ekolu.
                Aloha ino keia mau kaikamahine! Ua nele i ka makuakane a me ka makuwahine; ua pau i ka make. O ke Akua ko lakou Makua i koe; oia ka makua oiaio a me ka luli ole; nana lakou e malama. Pela ka manaolana o na makua i ka wa e ola ana.
                Ua kanuia o Mi. Loke i ka la Sabati nei; ua laweia kona kupapau iloko o ka hale pule i ka halawai ahiahi: ia Kamika ka olelo; oia ke pooolelo ma ke Kahuna 9: 10.
                He oiaio no, e hana ikaika a e hana koke i ka kakou hana, i paa pono, a i makaukau kakou e halawai me ke Akua, no ka mea, me he aihue la ka make; aole akaka kona la e hiki mai ai. Auwe ka poe makaukau ole.

Na LIMAIKAIKA e hoopuka'ku.