Ka Nonanona, Volume III, Number 12, 31 ʻOkakopa 1843 — Page 54

1843.) KA NONANONA. 59

PUALI INU WAI.

                O ka la 26 o Okatoba nei; he la nui ia ma Honolulu nei. Halawai nui na kamalii "puali inu wai" mai Maunalua a Moanalua, e hauoli pu, a e hooikaika pu i keia hana maikai. Akoakoa na kamalii o kela kula, keia kula ma na hale pule elua, i ka hora 10, a makaukau, hele like aku ko luna poe koa inu wai ilalo i ka luakini o Kamika; hui pu me ko lalo poe koa, a o ka hele pu no ia iwaena o keia kulanakauhale me na pahu kani, a me na hae e kapalili ana maluna, a me na hoailona hou, e kau ana ma na papale. Maikai ka hele ana; lealea na kamalii; papalua ka hele ana; makai o ke alanui kekahi lalani, a mauka kekahi.
                Hele mua Kekuanaoa me kona kahiko koa, a me kona aho hanohano; a mahope iho ona na keiki alii, o Liholiho ma. Oia na alakai o keia puali. Aole akaka ia'u ka nui o na koa inu wai i hiki mai; i ko'u manao nae he kausani a keu aku; he 1200 paha.
                Eia ke ano o ka hoailona hou no keia makahiki. Ua kaulia ma na papale.

UOKI NA MEA ONA.
PUALI INUWAI.
WAI WALE NO.
I HOOKUMUIA, MARAKI 15, 1842.

                He hae hou ko na keiki alii; he hae maikai loa; na kekahi haole inu wai ma Honolulu nei i hana. Ua penaia maluna o ua hae nei he wai lele a me na mea maikai e ae. Ua mahalo nui ia keia hae.
                He mau haole kekahi i komo iloko o keia hana; o ka Akemarela kekahi, a me na manuwa e ae.
                A hiki nui mai ka puali iloko o ka hale pule pohaku ma Kawaiahao, kani nui na pahu kani a pau ka walaau, alaila pule makou i ke Akua; pau ia, mele aku ka poe mele, penei,
                "I kela wa kahiko la,"
                "Ka wa i hala ae nei,"
a pela aku; a pau ia; ku iluna ke Kiaaina, a hoike aku i kona manao hookupaa ma ka inu wai, a e waiho i na mea ona. A pau kona, ku iluna o Demana, a olelo; he maikai kana olelo, paipai no ia i na koa inu wai e hapai i ka wai me ka leo nui, o ke kahea nui mai no ia o lakau a pau me ka leo hookahi, WAI WALE NO, WAI WALE NO, WAI WALE NO. Akolu kahea ana; aole okana o ka walaau. Lealea na kamalii i keia. Pau ia, ku iluna o Dibela, a olelo me ka ikaika a me ka pololei, a aa mai na maka o na kamalii i kana olelo. Hoakaka'ku ia i na mea hihia pau ole i ka helu ia iloko o na mea ona. Nolaila mai hoopa aku, e waiho loa.
                Pau ka Dibela, hoike aku au i ka manao o ka Ademarela; he manao olioli loa kona i keia hana, a me ka mahalo, a i mai ia, e hai aku no ia i keia hana maikai i na'lii o Beritania. Pau keia, hoi aku ka Ademarela, no ka mea, he hana kana ma ia hora. A kaawale ia, hookanikani maikai mai kekahi haole hoahanau, o Mi. Boardman, ka hana wati, ma kekahi pahu kani. He leo maikai kona, a ua olioli na kamalii i ka lohe aku.
                Pau ia, mele hou Kamika ma i keia mele inu wai hou, akahi no a hoopukaia'ku.
                1 Eu, na koa inu wai,
                E ka poe kau ka hae,
                Ala like, hoopaipai,
                                I ko kakou manao:
                E ku like no kakou,
                Aole inu rama hou,
                Pau na mea ona a pau,
                                E inu wai kakou.

                2 E na haole, e na lii,
                Kamahao ka inu wai,
                Nani no ka pomaikai,
                                I keia hana e:
                Ola ko Hawaii nei,
                Pau ka inu o na lii,
                Ola ke aupuni nei,
                                Ke inu i ka wai.