Ka Nonanona, Volume III, Number 9, 19 September 1843 — Page 48

48 KA NONANONA. (SEPATEMA BA

nei ia kanawai ia oe, ke noho oe i ke kula.
          K. Heaha la ka uku?
            P. Penei ua kanawai nei. Ina hoouna ole kekahi makua i kana mau keiki i ke kula, alaila, ua kapu na laau a pau o ke kuahiwi ia ia; aole hoi ia e lawaia ma na kai a ke Alii i haawi ai no na makaainana. Ua makemake kela makua i ka naaupo, nolaila, e pili no ia ia kela mau kapu o ka wa naaupo.
          Eia no hoi. Ina he keiki nui ka mea i noho, ua hewa pu ia me ka makua: nolaila, e hele no ua keiki la i ka hana a ke'lii; a me ko ke konohiki.
          K. Aole paha e pili ua kanawai la ia'u, ke noho au.
            P. E pili no.
          K. Nawai e hoopili ua kanawai la?
            P. Na na Lunakula no paha.
            K. Aole paha e pili; no ka mea, ua noho kuu kaikaina mamua aku nei, a ua loihi kona noho ana, aole nae i pili ke kanawai ia ia.
          P. Ua palaka paha na Lunakula. Ina ua malama pono lakou i ka lakou oihana, ua pili no.
          K. I mai na Lunakula, ua palaka lakou no ka loaa ole o ka uku no ka lakou hana.
          P. He wahi uku no hoi, eia no ia. O ka oluolu o ka manao ma ke kokua ana e hoonaauao ai i ke aupuni.
          K. Aole akaka ka oluolu o ka manao malaila, aka, ina he uku kala, ina ua oluolu.
            P. Ka! ua hewa ia manao. Ua pono i kela kanaka keia kanaka ke imi i ka malu o ke aupuni.
          Ua loihi keia wahi olelo a kaua.
            Ea! pehea kou manao, e hele anei oe i ke kula.
          K. Ae paha. He hilahila no paha wau no ka ino o kuu wahi kapa. E nana mai oe, ua weluwelu loa!
          P. Aia loaa ke kapa, alaila hele oe i ke kula?
          K. Ae no paha.
          P. Auwe! E kiko paha wau. Ke hele nei au i ke kula.
          K. Ae, a ke hele nei au iuka. Aloha.

HE MEA KAUMAHA LOA.

            I ka la 17 o Sep. nei ku mai ka moku Kalepa o Diamond kona inoa, mai Oregona mai, mai loko mai o ka muliwai Kolumebia, a ua lawe mai i kekahi mau misionari malaila mai. Eia ko lakou mau inoa, O Mi. Lee me kana wahine; o Mi. Frost me kana wahine a me ke keiki kane; o Mi. Babcock me kana wahine. E hoi loa ana o Mi. Frost ma laua o Mi. Babcock ma, i Amerika: o Mi. Lee paha ka mea hoi hou i Oregona ma keia hope aku.
          Eia nae ka mea kaumaha a makou i lohe ai i keia poe malihini, o ka make ana o kekahi poe o lakou iloko o ka muliwai Willamet. Eia na inoa, o Mi. Rogers me kana wahine, a me ke kaikaina o kanawahine, a me Crocker Esq a me kekahi mau inikini elua. Penei ko lakou make ana. Holo lakou maluna o ka waa ma ua muliwai nei, a hiki i kahi pae iuka; he wahi kokoke loa i ka wailele kiekie, a ikaika loa ke kahe ana o ka wai; lele koke iuka kekahi o lakou o Kauka White kona inoa, o ka hemo koke no ia o ka waa, a holo koke ilalo o ka wai lele, a pau koke lakou i ka make. Aole mea pakele. Ua loaa kekahi kupapau o Mi. Rogers, kokoke eono malama mahope mai, a ua nalowale ka nui.
          He hunona o Mi. Ro gers no Mi. Leslie ke kahuna pule i noho iki ai ma Honolulu nei a hoi aku la i ka malama o Aperila iho nei. Eia kana mau kaikamahine elua maanei, a o kela mau kaikamahine ana i waiho ai ma Oregona, ua pau i ka make. Aloha ino ia! eha loa kona naau i kona wa i hiki aku ai i kona wahi. Ua nalowale na mea ana i aloha ai, a ua neoneo kona hale. Aloha ino ia! Aka, ua lohe makou, ua pale kona eha nui, a ua ae oluolu aku ia i ka mea kaumaha a ke Akua i hooili mai ai maluna ona. Eia kekahi kaumaha nona, o kana kaikamahine nui maanei, he nawaliwali loa; aole emi kona mai, ke mai la no.

MANUWA HOU.

            I ka la 13 o Sepatemaba nei ku mai ka manuwa o Iri (Erie) kona inoa, ma Honolulu nei, no Amerika huipuia keia manuwa, a o Dallas ka inoa o kona alii, he Komakoa oia, a ia ia na moku manuwa Amerika a pau ma keia moana Pakifika nei. Ua kiiia o Komakoa Jones, ka mea i hoi aku nei, e hoi hou mai maanei, e halawai me keia Komakoa hou.