Ka Nonanona, Volume III, Number 8, 5 Kepakemapa 1843 — Page 43

1843.) KA NONANONA. 43

neenee aku la ia i kana kane, a olelo aku la ia ia. "Na ke Akua no i haawi mai, a nana no i lawe aku." Ala koke mai ka makuakane, a i mai la, "He oiaio no, "a e hoomaikaiia kona inoa." Alaila kulou iho la laua, a pule hoomaikai aku i ke Akua; a maha ko laua naau. A. W. K.

Papu Augate, 25, 1843.

NO KEKAHI HANA ANO E I HANA IA.

            O kekahi kanaka, o Kamauoha me kana wahine, ua alakai mai laua i kekahi mau kanaka no ka anaana ia laua, a ua hookolokoloia e ke Kiaaina a me na Lunakanawai, a ua hoopai ia laua no ka hoopunipuni.
          A i kekahi la ae, lawe hou mai no ua Kamauoha nei i kekahi kanaka e ae me ka manao ua anaana aku no keia kanaka ia ia, no ka mea, he keiki oia na kekahi o na kanaka ana i alakai mai ai mamua. A nolaila paha kona kuhihewa a lalau aku me kona mau lima, a nakinaki i ke kaula, a alakai mai ma ka Papu nei. A i ka hookolokolo ana, aole i loaa ka hihia i kela kanaka. A ua kauoha aku na Lunakanawai ia Kamauoha, mai hana i ka hana e like me keia, i ka lalau a hoopaa wale aku i ka mea hewa ole, a ua ae mai no ua Kamauoha nei; aka, i kona hoi ana ma kona wahi, ohi oia i mau kamalii he umi paha lakou a keu aku, me ke kapa ana'ku ia lakou he poe manuwa, o ka poe manuwa o Lord Geoge, a kapa aku no hoi ia lakou he poe koa. Ua paikau pinepine lakou me ka poai ana i ka hale o ko lakou alii o Lord Kamauoha me kana wahine.
          No ka uku ia'ku o keia poe keiki i ka ai a me ka ia, nolaila ko lakou hoopili mea ai, e ae aku i ka hana lapuwale a Kamauoha. Ua olelo ia, ekolu hapaha i lilo no ka lakou ai i ka la hookahi. Pela ka noho ana o keia poe keiki malalo iho o Kamauoha, a hiki i ka la 17 o keia malama. Ua hoonoho oia i ua poe keiki nei e like me ka hoonoho ana o na koa kaua; o kekahi mau keiki maluna o ka lio; mamua lakou, a kapa aku o kona kaua lio; a o na keiki malalo, mahope aku. A o kekahi kanaka, o Pala ka inoa, he kaiko oia, ua kii aku o Kamauoha ia ia e hele pu me ia i kona kaua, a kapa aku ia ia o kona Kamakoa, a haawi no hoi ia ia i ka pahi, me ka i aku, o ka pahikaua keia a Lord George. O ka wahi wale no ka ia Lord George, a eia no ia'u ka pahikaua. Oia, e hele kakou e kii aku i ka lawehala. A hele aku la lakou a hiki i ka hale, e kui ana kekahi kaikamahine i ka lei, kena aku la o Kamauoha i kona Kamakoa, lalau ia ka lei ahi, hoole aku la kela, alia, e hooponopono ae au, lalau ia'ku, i mai la kela, alia, i aku la o Kamauoha, unuhi ia ka pahi kaua; unuhi ae la ua Kamakoa nei, kau ia'ku ka pahikaua i ka puu, kau aku la no hoi ua kanaka nei me ka hoohele ana i ka pahi ahi ilalo, alaila, makau loa ke kaikamahine, manao iho la ia o ko'u make no paha auanei keia; o ke aha la hoi ko'u hewa?
          A ku mai la ka makuakane o ua kaikamahine la, a hoike mai la i ka laau kaiko, a ike o Kamauoha, makau iho la oia, a hoi aku la lakou a hiki i ka hale, kukulu iho la i na hae ulaula a puni ka hale, a kiai iho la na koa kamalii ona a ao ia po.
          A hiki i ke kakahiaka, ua lawe ia mai ma ka Papu nei me na kini lehulehu, a ua hoopai ia ma ke kanawai. Nolaila heaha la ke ano o keia