Ka Nonanona, Volume III, Number 6, 8 August 1843 — Page 31

1843. KA NONANONA. 31

KA HIHIA ANA O KA NALOPAKA.
E noonoo oukou o hihia auanei.

                "Ma kekahi kihi o ka ipuka aniani kau aku kekahi lanalana i kona punawelewele. Ike aku la au i kekahi nalopaka e lele ana malaila me ka makau ole. Aole liuliu a hihia kona mau wawae a me na eheu i ka punawelewele. Pakaawili iho la ia; emo ole, lele mai la ka lanalana hakaka laua, aka ua hihia ka nalopaka. Ikaika loa ko laua hakaka ana, a eha ka lanalana i ka lanopaka, alaila puiwa ka lanalana a holo iki. Aole nae i pakele ka nalo; ua hihia oia.
                No ka ikaika loa o kona kaawili ana, mai hemo no ia, a lele hou mai ka lanalana maalea a lalau i ka eheu o kona pio: kaawili hou ka nalopaka a hemo kona eheu, aka ua hihia kona wawae. Alaila makau ka lanalana no ka eha i loaa ia ia, a kolo maalea oia a kokoke aku, o aku la ia i kahi manamana a lalau i kekahi wawae o ka nalopaka a huki ikaika a nahu ino la; no ka mea ua hihia ka nalo. Pela i hana pinepine ka lanalana malea a nawaliwali ka nalopaka i ka eha nui. Aloha ino ka nalo! kupaka hou iho la ia, aka ua paa loa i ka hihia: aole hemo. Paki mai la kekahi wai me waimaka la ma kona lae; kapalili iho la ia, o ka make no ia, no ka mea, ua hihia."
                E ka mea heluhelu, aole anei i like kanaka me kela nalopaka? He lealea lakou iloko o ka hewa me ka makau ole. Aole noonoo lakou i ka punawelewele o ka diabolo e hihia ai lakau, a hihia a paa loa iloko o ka hewa. Nui na punawelewele o ka diabolo e kau ana ma kela wahi keia wahi e hihia ai ke kanaka make mau loa. E makau e mamua oukou i ka hoowalewaleia, o lilo oukou a hihia like me ka nalopaka.
ALOHAKANAKA.

NO NA MAKUWAHINE MEA KEIKI.
HELU 1.

                Aloha oukou e na makuwahine o Hawaii nei. Ke manao nei au e palapala iki aku ia oukou no na keiki a ke Akua i haawi lokomaikai mai ia oukou. Pomaikai oukou. He hauoli ka naau o ka makuwahine mea keiki, a ua maopopo loa hoi ia'u ka ehaeha a me ke kanikau a me ka neoneo o ka naau o ka makuwahine mea keiki make.
                Nolaila ke olelo hou aku nei au, i na makua keiki, pomaikai oukou, no ka mea, ua loaa ia oukou ka haawina maikai no ke Akua mai.
                I ka wa e haawiia mai ai i na keiki hou iloko o ko oukou mau lima; he pono ke manao oukou penei, "He waiwai loa keia keiki, he momi makamae, he pua nani. Aole kona kino wale no ka i maikai, aka, he uhane maloko ona, he mea ia e ola mau loa ai ma ka lani me ke Akua a me ka poe pono a pau olaila; ai ole ia, he mea ia e hele a e noho pu me ka poe hewa ma ka po pau ole. Pehea la e hiki ia'u ke malama ia ia, a e alakai ia ia, i ulu maikai kona kino, a e hele oia iloko o ke ala pono a ke Akua i kauoha mai ai?" Alaila e pule aku i ko kakou makua i ka lani e kuhikuhi mai, a e kokua ia oukou e hanai a e malama i keia keiki hou mamuli o kona makemake.
                Ma keia hope aku e palapala hou paha au ia oukou, a e hai aku i kekahi mau manao o'u no ka malama ana i na keiki.
                A ina e manao mai kekahi makua e ninau mai ia'u i kekahi mau mea ma keia hana nui, e palapala mai a e kukakuka pu kakou iloko o ka Nonanona.
                Aloha oukou. Na A. V. KAMIKA.