Ka Nonanona, Volume III, Number 5, 25 Iulai 1843 — Page 24

24 KA NONANONA. (1843.

                Ua hiki mai ka moku kalepa, o Delaware kona inoa, mai Bosetona mai. Ua ku oia ma Tahiti, a i ka la 23, o keia malama ua hiki mai ma Oahu nei.
                Ua lawe mai oia i kekahi waiwai na makou, a me kekahi mau palapala; aole nae na mea hou he nui wale. Eia kekahi mea hou ana i lawe mai nei, mai Tahiti mai, he wahi palapala hoolaha no ke Kamakoa Beritania, i mea e hooluolu i kolaila poe pio; a ua pai ia ma keia pepa. E heluhelu oukou me ka hauoli a me ka hoomaikai i ke Akua. Aneane pau paha ka noho pio ana o ko Tahiti poe Alii, a me ko lakou poe kanaka. "E hauoli pu me ka poe e hauoli ana."
                Eia hoi kekahi palapala hoolaha na ke Kamakoa Amerika; o Kamakoa Kearney kona inoa. Eia no ma Oahu nei i keia manawa.

                Ua hiki mai o Kamehameha III. mai Lahaina mai, i ke kakahiaka nei.

HOIKE.

                I ka la 19 o Iulai nei, he hoike kula kamalii ma ka anaina elua ma Honolulu nei. Hapa wale no o na haumana i launa mai i keia hoike. Ua haalele maoli kekahi poe i na kula, a ke auwana nei lakou i o ia nei me ka lealea a me ka uhauha. Hele ole mai kekahi poe i ka hoike no ke kapa ole. Ke ike nei lakou i ko lakou olohelohe, nolaila ua pee lakou no ka hilahila.
                Heaha ke kumu o ka emi nui ana aku o na keiki i hele mamua i na kula? No ka palaka o na kahu kula anei? No ka palaka o na luna kula paha? No ka palaka o na makua anei? No ka palaka o na kumuao paha? No na haole anei? No na kanaka maoli paha?
                I ka makahiki 1842. he lehulelu na haumana i hele i na kula i kela la keia la; lehulehu hoi i hele mai i na kula hoike, i na kula ahaaina; a ua maikai ke kapa komo ua maikai na papale, ua maikai na hae, he ikaika ka manao e imi i ka naauao, a ua kokua lokomaikai na makua i ka lakou mau keiki ia wa. Aka, aole pela keia makahiki.
                Nolaila ke ninau hou aku nei au, heaha ke kumu o keia emi ana ihope o na haumana kula? Heaha ke kumu o ka palaka, a me ka lokomaikai ole mai o na makua i ka lakou mau keiki i keia makahiki? Ke ike nei anei lakou i ka naauao he mea ino ia? Ke mahalo nei anei lakou i ka naaupo? Ua mai anei lakou? Ua hemo anei ka aina? He wa wi anei keia?
                Heaha la ke kumu o keia hoi ana i hope? He ano e keia makahiki. Aole pela i keia mau makahiki he umi i hala ae anei. I keia makahiki ua molowa loa na kanaka ma kela hana keia hana e pono ai. Ua popilikia na haole kalepa, no ka mea, aole nui na kanaka e kuai ana me lakou i keia wa.
                I kela makahiki he nui ka hana aupuni; nui ka hana no na'lii; nui ka hana no na makaainana, nui ka hana hoolimalima; a me ia hana aku ia hana aku. He nui hoi ke kuai aku, a me ke kuai mai. Aka, aole pela i keia makahiki.
                I keia makahiki, he kaumaha ka naau o kekahi poe; he molowa maoli kekahi poe; he uhauha kekahi poe; he hoowahawaha, kekahi poe i ka ike, a me ka naauao, a me ka haipule, a ke hele nui kekahi poe i ka hookamakama a me ka moe kolohe. O ka mea i ike i ke kumu o keia mau mea ino, e hai koke wiwo ole mai, i imi pu kakou i na mea e pono ai.
Na L. KAMIKA