Ka Nonanona, Volume III, Number 2, 4 July 1843 — Page 12

12 KA NONANONA. (IULAI,

elua, ko Bolabola, a me ko Farani i huipuia me ko Bolabola. Aia maopopo ka manao o na lii o Farani, a me Beritania, alaila hina paha kekahi hae.

                KA MERELANI— I ka la 1 o Iulai nei ku mai ka Merelani (Kialua) mai Mekiko (Mazetlan) mai, a lawe mai hoi i kekahi mau palapala no na lii a me na haole o Hawaii nei. Aole nae he mea hou i loaa mai ia makou ma keia Kialua; o na mea a kakou i lohe ai mamua, oia wale iho no. Aia no Mi. Rikeke laua o Haalilio ma Beritania a me Farani e hoikaika ana i ka laua hana: aole nae maopopo ka holo. Mamuli lohe hou kakou.

KA POULI O KA LA.

                I ka la 17 o Iune nei pouli hapu ka la, e like me ka olelo wanawa a ka Nonanona mamua. I ka hora 7 o kakahiaka ka pouli nui a ma ia hope iho emi aku.

MEA KAMAHAO.

                Eia kekahi mea kamahao i ike maka ia ma Koolau o Oahu nei; heluhelu i keia palapala malalo iho.

Iune 18, 1843.
                E ka nonanona.
                Ua lohe au i kekahi mea kamahao ma Koolau nei, ma Kahuku; Mei 29, oia ka la i puka mai ai o ua mea kamahao nei, he mau la 3 i ka puka hookahi ana: i ka hora 6 i puka mai la ua mau la la ekolu; hookahi la ulaula loa, elua keokeo, hookahi luakalai, elua mau onohi o na la; oia na mea kamahao a'u i lohe iho nei i na kanaka he nui wale ma Koolau nei.
                I ka puka ana mai o ua mau mea la a pau o ka luakalai, oia ka mea maluna iho o na la ekolu; ona onohi ma kela hiki, ma keia kihi o ka luakalai. Na Kaaikaula.

                Make aku nei i ka la 23 o Iune kekahi kanaka ma Koloa i Kauai i ka wiliko o Lada ma. Komo aku no oia ma kahi i papa pinepineia mai na kanaka, aole e komo lakou; komo aku malaila e hookaawale aku ka opala ma kahi e kaho mai ana ka wai o ke ko, a hihia iho la kona kihei iloko o kekahi huila e pili ana i ka wili, hapai iho la i kona lima e hoohemo i ke kihei a paa no ka lima iloko o ka huila, pepe iho la, a hukiia mai iloko o ka huila, a nahae ino kona aoao hema, a puka mai ka hanu ma kahi i nahae ia, a ikea no hoi kona naau, moe iho la me ka eha nui, o po iho make no ia. Aloha ino!

                Ua hakalia iho nei na helu 2 a me ke 3 o ka Nonanona aole i paiia, no ka hemahema o ka hale paipalapala. Ua pau i ka penaia a me ka hana hou ia maloko, a i keia mau la iho nei, holo hou ka hana. Pau keia pilikia. Eia ka pepa helu 2 a me ke 3.

Lahainaluna, Aperila 24, 1843.
                He kanikau no Mahoe, kekahi haumana o ke kulakaikamahine ma Wailuku, i make aku la.
Aloha nui oe e Mahoe,
E ka pua maikai i lawe ia mai loko mai o ke kihapai.
Aole mea e pani i kona makalua,
Pau kou ike ana i ana i ka nani o Inia.
Aka ke ike la oe ia Parataiso mau,
A me kona Alii Iehova ka Moi:
A me kona mau pitimana Gaberiela ma.
Nani kou ike ana ia Ierusalema hou,
A me konna pa he gula maemae.
Ua oi aku kona ala i ka rose o Salona,
A me kona nani mamua o na lilia.
Pau kou lohe ana i na mele o ka honua,
A me kou lohe ana i na haa o keia ao.
Aka ke ike la oe i na mele nani loa,
Maloko o na lira a me na kimepala.
E ka pua maikai o ka rose ala.
Aia hoi oe maloko o kahi hiluhilu.
Nani kou hele ana i ke ala hele loa,
A me kou ike ana i ka mea hemolele:
Ka mea nana e wehe ka puka,
Kahi a kakou i kikeke ai.
E ka mea aloha e Mahoe e!
Pau kou luhi palenaka,
Kuu ke kino hele aku la;
E hele i ke ola mau.
Makou na hoa aloha.
Ka poe e noho nei;
Kai ike i ka pilikia o keia ao.
O oe ka mea hele,
Ka i ike i ka pomaikai;
A me ka hemolele:
O ko ka lani poe.
Pau ka eha pau ia Iesu.
Maha e maha loa. H. K.