Ka Nonanona, Volume III, Number 1, 23 Mei 1843 — Page 4

4 KA NONANONA. (MEI,

Eia ke kii mua;

            Eia no hoi ke kii hope;

          Heaha la ke ano o keia kii? E ko Lahainaluna, e imi oukou. Aole paha loaa ia oukou ke ano o keia kii: i ko'u manao, aole no e loaa iki ia oukou. Pehea na kaikamahine o ke Kulanui ma Wailuku?

KA MAI.

            He nui ka mai ma Honolulu nei i keia wa; o ke kunu a me ka wela oia na mai: aole nae nui loa ka poe make. Ua holo mai na kumu o Hana ma Maui i ka ahaolelo, a ua pau na kane elua i ka mai; aia no Kone de ma Lahaina me kona mai wela, a ua hiki mai o Rise ma ma Honolulu nei: nawaliwali o R- kane.

HE MAU WAHI MANAO NO KA POE HELUHELU I KA NONANONA.

            Eia no keia pepa 1, o ka makahiki akolu o ka Nonanona. Makemake loa wau e lilo keia pepa i mea e pono nui ai ka poe lawe a heluhelu ia ia. Nolaila penei kuu manao.
          1. E pono e lawe nui ka poe ike i keia pepa; o ka poe ike a pau loa. Mai makau i ka uku, he hapawalu wale no ia; a ua kaa koke i ka poe ikaika i ka hana. O ka poe i lawe i keia pepa i na makahiki elua i hala ae nei, he 2500 a keu aku lakou; aole nae pau ka poe ike i ka lawe a heluhelu. Nolaila ke paipai aku nei au i ka poe lawe ole i keia pepa mamua, e lawe koke ano.
          2. E heluhelu maoli no ka poe lawe i keia pepa. Mai lawe a waiho wale; he make hewa loa ia: poho ka pepa a me ka inika a me ka luhi a me ka waiwai. E lawe a heluhelu no a pau loa me ka noonoo a me ka makaala. O na mea paakiki a me na mea pohihihi na ka poe akamai e wehewehe.
          2. Mai haehae i keia pepa ke pau ka heluhelu ana; e malama no a huipu a humuhumu i mea heluhelu ma keia hope aku. Pela ma na aina naauao, a pela hoi ka pono maanei.

KA PULE.

            "Ka pule ikaika a ke kanaka pono e lanakila nui ia." Elua mea e lanakila ai ka pule; 1. o ka ikaika, 2. O ka pono o ka mea e pule ana. Aole pono ka pule nawaliwali, me ka manao uuku, a me ka makemake uuku o ka naau; aole hoi pono ka pule a ke kanaka hewa; make hewa loa ia.