Ka Nonanona, Volume III, Number 1, 23 May 1843 — Page 1

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." SOLOMONA.
Buke 3. HONOLULU, OAHU, MEI 23, 1843. Pepa 1.

MANAO MAIKAI.

            I ka la 7 o keia malama, hele aku la au i ka halawai ma ka halepule. He halawai ano e ia. Ua kaumaha pu na haipule, no ka mea, o keia aupuni hou i ili mai maluna o keia pae aina, ua hoolei aku ia i ke kanawai papa i ka moekolohe. Kamailio aku, kamailio mai na hoahanau, a imi pu i ka mea e pakele ai na kanaka i ka luapau e hamama mai ana. Ua ulu iki paha ko lakou ikaika e hapai i ka hana a ke Akua, a e lawelawe ma na mea o kona aupuni. No ka nui o ka poe i ku mai e hai i ko lakou manao, aole i hiki ia'u; nolaila, e na hoahanau o Hawaii nei, eia ko'u manao iloko o keia pilikia. E hoolana kakou, aole i poho ko kakou manao. E lanakila no ka pono o ke Akua: aole hiki i na ipuka o ka po ke hoohiolo i ko ke Akua aupuni a me kana pono. No ka mea, me kakou pu no ka Mea mana. Aole o kakou hilinai i ka lima kanaka, aole i na 'lii o keia ao; ke hilinai aku nei kakou ia Iehova nona ke aupuni a me ka mana a me ka hoonani mau loa ia.
          Kohu like ka hewa me ka pouli, kohu like ka pono me ka malamalama. Hana no na kanaka i na hana maikai i ke awakea a ma kahi akea hoi, aohe o lakou hopohopo, aohe hilahila. Aka, hele ka aihue i ka po. Makemake no ka poe moekolohe e uhi mai ka pouli maluna o lakou, a pee lakou ma kahi mau. I ka wa i noho pouli mai ko Hawaii nei, hana no na kanaka i na mea haumia ma ke akea me ka hilahila ole: aka, i keia manawa, pee wale lakou ma kahi e pee ai. Nokeaha keia? Ua hala ka po, ua wehe mai ke alaula, ua ula na papalina o ka poe hewa i ka hilahila. O oukou, e na hoahahanau, ka malamalama o keia ao. Ua lohe kakou i keia ia Iesu. E noho hemolele kakou. E noho kakou iloko o ka malamalama. E imi mau kakou i maemae ko lakou mau naau, i maemae hoi ka kakou kamailio ana a me ka kakou hana ana. E hoike aku kakou i ko kakou malamalama imua o ke ao nei, alaila, e auhee wale ka poe moekolohe me ka hilahila, a e huli mai na kanaka me ka hoonani aku i ko kakou Akua.
NA KEKAHI HAUMANA.

NA KANAWAI HOU.

            Eia na kanawai a me na olelo ae like, ua hooholoia ma ka ahaolelo o na alii a me ka poe i kohoia i ka halawai ana, e like me ke kumu kanawai. Aperila, 1843.

1. NO NA AINA HOOLIMALIMA.

            No ka mea, ua kauohaia ka poe Luna waiwai no ke aupuni e ohi i na dala o ka aina hoolimalima a uku no ka aie o ke aupuni, e haawi nae i ka mea nona ka aina i hoolimalimaia ai ka palapala aie no ke aupuni a me ka uku hoopanee he umi a me kumamalua keneta;
          Nolaila, i ka ahaolelo ana o na Lii a me ka poe i kohoia, ua hooholoia keia, e unuhi ka poe Luna waiwai i ka hapa umi o ua dala hoolimalima la i mea e uku ai no keia hana ana, a ina paha e hooponoponoia ka hoolimalima