Ka Nonanona, Volume II, Number 24, 9 May 1843 — Page 119

119 KA NONANONA. [MEI,

ia ma ko Hawaii nei ano kahiko. Ua alohaia mai no nae. Na ke Akua ia i hoomalamalama mai, a hoomalule a hoomakaukau e noho iloko o kona aupuni nani mau. I ka hiki ana mai o ka olelo a ke Akua, aole o Papohaku i hoopale loa aku ia ia: hoolohe no, a huli mai ia me kona makemake a me kona ikaika a pau. He 13 paha makahiki o kona noho ana iloko o ka berita. He noho hooikaika kona, he noho hana. Ua ikea kona aloha i ke Akua a me kona aloha i kanaka ma kana hana ana. Aole ona lua ma Kauai. Makemake oia e kokua i na hana maikai a pau; ua ike hoi ka poe hewa i kona ikaika i ke kinai i na mea ino.
                I ka malama o Okatoba o kela makahiki, loohia oia i ka mai, he pehu ma ke poo. Mai pu laua me kana kaikamahine aloha, a make e o Loisa, kanikau kela me ka hoomaikai i ke Akua. Holo aku ia i Koloa, i pono kauka Kamika ke lapaau mai ia ia. Aka, aole pono; mahuahua no ka mai. A haele hou aku la ia i Waimea i kahi mehana. Malaila ia i noho ai me ka hoomanawanui a me ka hoomaikai aku i ke Akua, a hiki i ka la 28 o Ianuari i hala aku nei, a kii mai no ka Haku ia ia. A ke manao nei kakou, ua hele pomaikai aku ia. Aia ke noho la ma ke alo o ke Keikihipa. Iwaena o kolaila puali, oia kekahi e mele ana a e hoomaikai ana i ka mea nana ia i kuai a i hoola.
                Pomaikai io ka poe i make iloko o ka Haku. Ua hala ka pilikia, ua pau ka luhi, ka eha, ka hoowalewaleia mai. Ua pau ka paio ana. Palekana, lanakila loa i ke ao.

HOIKE MA LAHIANALUNA.

                Ua hoike na haumana o ke Kulanui i Lahainaluna, i ka hebedoma mua o Aperila; ekolu mau la i hoike ai. Aole no i hoohilahilaia mai na kumu a me na haumana ma ia hana.
                Mahalo no ka poe i hele mai e ike. Aole i hemahema na haumana, makaukau no e wehewehe i na mea i haawiia mai. Maikai hoi ka oli ana, a me ka hai olelo ana. Ke mahuahua nei ke akamai a me ka ike. Hoike lakou ma ka Helunaau, Hoailona helu, Anaaina, Palapalaaina, Mooolelo Ekalesia; hoike i ka Palapala Hemolele o ka olelo ia a ke Akua, ke Aokiko, a me ka Olelo Beritania. O ka Himeni ana hoi kekahi, a me ka heluhelu ana mai i na manao o lakou iho a lakou i kakau ai, a o ka hai ana aku i ka olelo,
                Hookahi paha haneri haumana o lakou a pau. A e hoi ana kekahi poe o lakou i keia manawa e ao aku ia hai, ma ko lakou mau aina iho; he 18 paha.
                Pomaikai keia pae aina i keia kula. Loaa mai malaila na kumu e ao aku i na kula ma kuaaina, loaa pu no hoi na luna e lawelawe ai iloko o ke aupuni.
                Nohea mai keia pomaikai? No na haipule ma Amerika no: na lakou i kukulu i na hale, a hooili mai i na mea lawa, a kokua mai no hoi i na mea e pono ai i kela makahiki keia makahiki.
                He 30,000 dala i lilo i ke kukulu ana i na hale ma Lahainaluna e pono ai keia kula, a i ke kuai ana i na mea lawa i ke ao ana. Ina he 12 hapa haneri ka uku hoopanee, ua like keia kumupaa me 3,500 dala i kela makahiki i keia makahiki. Ke kokua mai nei no hoi lakou 2,500 dala i kela makahiki keia makahiki, i mea e kuai ai i ai na na haumana a me na mea e pono ai ko lakou noho ana. A o ka uku i na kumu nana e ao aku nei i keia poe haumana kekahi, he 1800 dala ia i kela makahiki i keia makahiki.
                Ina i houluuluia keia mau mea $3,600 ka uku hoopanee o ke kumupaa $30,000 $2500 ke kokua e lako ai na haumana i ka makahiki hookahi, 1,800 ka uku i na kumu i ka makahiki: loaa mai 7,900 dala. Nolaila ua like ke kokua o na haipule ma Amerika i keia kula me na dala 7,900 i kela makahiki i keia makahiki.
                Nolaila hoi, ina hookahi haneri haumana ma ke kula, ua ukuia no kela haumana keia haumana he 79 dala, i kela makahiki i keia makahiki.

PEPA HOPE.

                O ka pepa hope loa keia o ka makahiki lua o ka Nonanona. E ka poe heluhelu, pehea ko oukou manao i keia keiki uuku? Elua wale no kona mau makahiki; ua ulu iki kona mau niho; a ua huli ilalo ke alo; ke kolo nei no, a holo maoli no hoi i kekahi manawa. Aka, o kana hana, a me kana mau olelo, pehea? Naauao anei? Aia no ia oukou ka noonoo mai. Ina mahalo oukou ia ia, a makemake e holo ia i ko oukou wahi e launa pu me oukou, a kamailio pu, a hai aku i na mea hou e hiki no; e hai koke mai i ko oukou makamake i na kumu a e ike pinepine auanei oukou ia ia e komo ana iloko o ko oukou hale.

NA LIMAIKAIKA e hoopuka'ku.