Ka Nonanona, Volume II, Number 24, 9 May 1843 — Page 117
117 KA NONANONA. [MEI,
Lahainaluna, Aper. 24, 1843.
Auhea oe e ka mea i kapaia o ka Nonanona. Ua pono ia oe ke hoao mai i keia wahi ai a'u e haawi aku nei ia oe, he puupuu paha, aole paha. Eia ka'u ia oe e haawi aku ai.
HE MELE NO NA MISIONARI A ME KA HANA.
Aloha na elele a ka Mea kiekie loa,
E hoomanawanui nei i ka ino pouli mau,
Hookahi no kuleana i hiki mai ai lakou,
O ke aloha i na uhane o ko onei poe kanaka,
Aia ma ko lakou lima ke kukui mau loa;
Aole e pio a mau, a mau loa aku no,
O ka palapala Hemolele ka mea e mau loa ana,
Ko lakou alakai no ia aole e naue iki;
Aole e huli i o a i o a hana like wale no,
He pahi kaua hoi ia ua oi lua nae,
Aole pahi e ae e like me keia,
Pomaikai ke kanaka ike i keia pahi maikai,
O ka Iosepa pahi keia, aole nae i naue iki,
He poe ikaika keia aole nawaliwali;
Na ko Amerika i lawe mai keia pahi,
Ua lele mai lakou mai hikina a komohana,
Me ka nana mau i kahi pono e kaua ai,
He mau bitimana keia no ke Kamakoa nui loa,
Ke kaua nei lakou i ka pouli o ka make,
Kokoke e lanakila ko ke Alii poe kanaka,
Wehe ae la kumulani ke alaula o ke kakahiaka,
A puka mai la ka la auhee aku la ka pouli,
Ka palapala Hemolele momi nani ano e,
He mea nui no ia no ko ke Alii poe kanaka,
Aole poe e ae e like me keia,
Oluolu na wahine a me na kane no,
Kuikahi ka manao a launa pu,
Aole e hakaka, aole no e hakukole;
E ko Hawaii, e ala, a hoohalike aku,
Me ko Amerika poe, he hilu he ia noenoe,
Ua hana walea no lakou, aole molowa,
O ka ka wahine hana mimo pana kai ole,
Noho mau no lakou ma ka hale, aole holoholo,
Aole no hoi e haule ka lakou eke humuhumu,
Aole noho wale lakou ma ka noho,
He hana no i na mea e pono ai ke kino,
Ua pau loa kona hale i ka aahu kapa maemae,
O keia poe ua like me ke gula maikai,
O ka hana a keia poe, aole kapulu,
Ua kuhikuhi mai keia poe i ke awa o ke ola,
Kahi e ku ai na moku me ka manaolana,
Ke awa a Keristiano i hele malihini aku ai,
A komo pomaikai aku la i kahi maha mau,
A inu aku la i ka wai e pipii ana i ke ola,
Auhea oukou, e na hoahanau a me na makamaka,
E hele kakou i hele malihini ana,
I ike aku kakou i ka nani o kahi maha,
I lohe hoi kakou i ka leo o ka lira.
A me ka leo o na kimebala kani kiekie,
I ka nunulu ana hoi o na kimebala kani haahaa,
E hone ana ka leo o na mea kani iluna ae,
Ilaila i ike aku ai kakou i na puali o ka lani,
A me ko Iesu poe koa i waeia nei,
Ilaila hoi aole he po, he ao wale no,
E na makamaka, a me na hoalauna,
E ala, e eu, e holo i kahi iluna ae,
Malaila e loaa ai ka pahi kaua o ka manaolana,
Aia no hoi malaila ka Ierusalema hou,
Ua hoonaniia i ke gula na alanui ona,
Me na puka momi laa he nani ke nana,
Ahea la e loaa i ko Hawaii keia mea,
E noonoo e kakou i ke ano maopopo,
I like me he aniani la i ko kakou maka,
I hana like kakou me ko ke alii poe kanaka,
Ka poe i wehewehe ae i ka pouli ano e,
Na ohu kuamauna no ua uhi mai i na puu,
Wehe ae la ka La, ka la lama o ke ao,
Kalae na kuahiwi ahuwale na kua lono,
Pela ka moakaka ana o ka ke Akua olelo;
Imua o na maka o na kanaka hookuli,
Heaha la ka ike ole i ke ala e hele ai,
E ka poe auwana hewa make mau,
E hiu i ka heleuma o ko oukou moku,
I holo aku ia i ka holo nani ana,
E na holo moku, e malama i ka hoeuli,
No ko oukou mau moku e hiki aku ai kahi maha,
E nana mau hoi i ko oukou panana,
I kau pono aku ka ihu i kahi i makemake ai,
O ka palapala Hemolele ua panana nei,
O ke alakai kupono keia no kahi alakai ole,
Ka mea mau loa a me ka luli ole,
Ia hanauna aku ia hanauna aku.
Na KAPELA.
AHAOLELO MI SIONARI.
O ka la 10 o Mei nei, oia ka la e hoomaka ai ka ahaolelo misionari ma Honolulu nei: aole nae pau mai lakou; o ka hiki mai koe paha o ko Maui a me ko Hawaii. Inehinei pae mai Mi. Wini.
Koloa, Dek. 13, 1842.
E Nonanona e; Ua loaa mai nei ia makou ka Nonanona, pepa 13, buke elua, me kau ninau mahope loa; "penei, ku mai kekahi moku ma Honolulu me na ee moku he 81; ua palua na wahine i na keiki, a ua pakolu na kane i na wahine. Ehia kane, ehia wahine, ehia hoi keiki maluna o ua moku