Ka Nonanona, Volume II, Number 22, 11 April 1843 — Page 109

1843.] KA NONANONA. 110

na." "Aole no keia ao ko'u aupuni."
                Ua holo aku au i kekahi aina Pope, ma Paniolo, a komo au iloko o kekahi hale pule a lakou. A, malaila ike au i ke ano o ka lakou hoomana ana. Aole hoomana lakou i ke Akua mana, e ola'i; aole, kuhikuhi lakou ma ka umauma; a kulou lakou imua o kekahi kii wahine, a namu iki me ka leo uuku, a me ka maka e makaleha ana i ke kii, a oia wale no. Aole mea e hooike mai i ka ke Akua olelo; aole. Aole lakou i lohe i na olelo o Iehova; aole i lohe, ma ka manaoio ia Iesu, e ola'i na lawehala. Kulou iki lakou imua o na kii, a hele wale aku no, me ka akaaka, a me ka walaau. Ko Iesu aupuni anei keia?
                A pela no ma ka la Sabati. He la lealea loa ia ia lakou. O na kahuna kekahi, lealea pu lakou, me na kanaka. Hoohakaka bipi kekahi lealea; hakaka moa kane kekahi; heihei lio kekahi; a pela aku no, "E hoomanao i ka la Sabati, a e hoano ia la," wahi a Iehova. Pehea keia mau hana? Ua manao anei lakou i ke Akua, maloko o kela mau hana lealea? Ua poina loa paha. "O ka mea e aloha ole mai ia'u, aole ia e malama i ka'u mau olelo." Aole anei akaka; ma ke ao nei ka lakou kaua ana? Aole mamuli o Iesu Kristo.
                Aloha oukou, e na hoahanau, a me na kanaka a pau oonei; mai hahai oukou i keia holoholona; o make na uhane o oukou.
Na'u na ALOHA.

O KA MANU NUNU HALIHALI.
Oia, o ka nakui a me ka hoomau i ka kakou hana.

                Ua ike mai oe i ka manu nunu? Nani ka hinuhinu o kona ai! Okana mai hoi ka hiki wawe o kona lele ana!
                Aia i kekahi mau aina, he manu i kapaia ka manu nunu halihali, no ka mea lawe no ia i na palapala mai kekahi wahi a i kekahi wahi aku.
                I kekahi manawa, lele aku keia manu he kanaha mile iloko o na minute he kanaha, me ka palapala i hikiikiiia i kona ai! "Pehea la i loaa ia oe keia hiki wawe loa?" wahi a kekahi hoahanau ona. "I kuu hele pololei aku" wahi a ka manu nunu. Aole o'u kali ma ke alanui: aole nana aku i ka lima akau a i ka hema: koho no au i ke ala pokole, me ka hoomaunauna ole i ka manawa."
                Pela ua pono i na kamalii ke hana i ka lakou hana. I ka huli palapala ana, aole hoomaunauna i ka manawa, I ka hele lawelawe ana, e hele pololei aku. A i ka hana ana i kela hana keia hana, e hoohalike me ka manu nunu, huli ole i ka lima akau a i ka hema, koho i ke ala pokole, a e hana i ko lakou mau haawina me ka nakui.

HE NINAU HELU.

                Kauoha mai la o Hiero, ke 'lii o Surokuse, i kona paahana, e hana i papale alii gula nana, i 63 auneke kona kaumaha. Manao iho la ka paahana e aihue i ke kau wahi gula, a e pani i kona hakahaka me ke kala. Hana iho la ia pela, a paa ka papale, haawi aku i ke alii. Haupu iho la ke'lii ua hewa, aole nae i maopopo, no ka mea, ua pono no na auneke, ua 63 no. Haawi iho la ia i ka papale ia Akimede, (he kanaka akamai ia) e huli a maopopo.
                Hookomo aku la o Akimede i ua papale gula nei iloko o ka wai, a ike iho la, ua pii ka wai 8,2245 iniha paailiono ka pii ana; hoomaopopo hoi ia i ke kaumaha o kekahi iniha paailiono i ka gula 10,36 aune-