Ka Nonanona, Volume II, Number 21, 23 March 1843 — Page 106

106 KA NONANONA. [MARAKI,

O ka loihi o kona huelo.
Oia na mea au imi ai e hoouna aku ia oe e hoolaha aku.
Me ke aloha ia oe,
Na S. M. KAMAKAU.

                Aole akaka loa ka pono o keia, hana a K amakau, e nana oukou ka poe ike i ke ao hoku, e iini i ka hewa o keia hana; a e hoakaka mai. He hana maikai keia na na keiki ma Lahainaluna.

                E na hoahanau na Lahaina; E nana oukou i keia palapala malalo iho. Aloha ino na hoahanau ma Lanai. Pilikia io ka lakou hana ana i hale pule no lakou. Aole a nei e hiki i na hoahanau ma Lahaina ke kokua ia lakou? E nana ma Gal. 6:2. "E halihali kekahi o oukou i na mea kaumaha a kekahi, pela oukou e malama'i i ke kanawai o Kristo." Heaha ke ano o keia olelo? E Davida Malo, e Timoteo, Kuakamauna, e na hoahanau a pau na Lahaina, aole anei pono ia oukou e halihali i kau wahi kaumaha a na hoahanau ma Lanai?

Lanai, Feb. 1, 1843.

NO KA HEMAHEMA O KEKAHI LUAKINI MA LANAI.

                Auhea oukou e ka poe kukulu, luakini o keia pae aina, e nana mai oukou i ka makou hana ana i keia luakini; o ka ha keia o ka makahiki o ka hana ana o keia hale, aole i paa, ua hiolo kekahi aoao, ke hana hou nei nae makou, ke halihali nei makou i ke one; ua moa ka puna; o ka uhau hou koe.
                I ko'u nana ana ma keia hana, nui ka hemahema: eia ka loihi o kahi o ka wai i waiho ai, hookahi mile a me ka hapa ka loihi o ka wai.
                Eia ka loihi o ka puna a me ke one, eha mile a me ka hapa ka loihi ma ka aoao komohana, pela no hoi ke kii aku i ke one ma ka aoao hikina.
                Eia ka loihi o ka pohaku, elua mile ka loihi.
                Eia ka pohaku kokoke he kohi ilalo e like me ka ai, pela e loaa'i ka pohaku, nui ka hemahema o ka makou hana.
                Ke ake nei ko makou manao e paa ko makou luakini, kahi e hai ia ai ka olelo a ke Akua. Aole no hoi e pono loa ka hale maoli ma keia wahi, no ka nui o ke anuanu, aole e pono na malihini ke hele mai me kahi kihei wale no: eia ka pono me ke kapa mahuahua ka pono.
                Nolaila o keia hale pohaku ka pono loa no keia wahi. Eia no keia hemahema, o ka laau ole, he kakaikahi ka laau loloa loa: aia eha kaloa, a me ka iwilei alaila hiki.
                Nui ko makou makemake e paa ko makou luakini i keia makahiki.
                Aka, aole i ikea ka manawa. O kekahi poe o makou i hana i keia hale, ua hele aku kekahi poe.
                Ua make kekahi mau hoahanau ekolu i ai i ke kino o ka Haku; hookahi i hoakakaia o komo i ka ekalesia, ua hoi aku lakou i ke Akua ola.
                O kekahi luakini o makou, aia ma ka aoao hikina o keia aina, aole hemahema loa e like me keia hale; ua kokoke no ka puna a me ke one, a me ka pohaku, a me ka wai, hookahi wale no mea hemahema, o ka wahie, oia wale no ka mea kii aku i kahi loihi.
                Eia kahi olelo ninau, ina i manao oukou i kuu hoike ana i ka hemahema o keia hale, he pono paha, he hewa paha keia hoike ana a'u.
                Na'u na KALILIAAMOKU.
                Kumu ao Kihamaniania.

KA ILIO.

                Mahalo kuu manao i keia olelo a ka hoahanau ma Lanai. He olelo ku