Ka Nonanona, Volume II, Number 20, 7 Malaki 1843 — Nolaila, ke kukala nei au, [ARTICLE]

Nolaila, ke kukala nei au,

AKAHI, E kauia ka hae Beritania ma na mokupuni a pau o keia Pae Aina; a e malu na kanaka maoli a pau e like me na kanaka o Beritania Nui. ELUA, E hanaia na oihana o ke aupuni a hiki i ka wa e loaa mai ai i na palapala mai Beritania Nui, penei, Na ke Lii Nui a me na Lii, a me na Luna malalo iho o lakou e hooponopono i na kanaka maoli, a Na ka poe Luna i kohoia e aʻu, oia o Kamehameha III., a i ole ia o kona Luna e kohoia, a me Rt. Hon. Haku Geo. Paulet, a me Dunean Forbes Maekay, Esq. a me ka malama moku o Fere, R. N. e hooponopono ma na mea kupono i na olelo me na aina e (aole nae me ke aupuni o Beritania,) a e hooponopono i na haole e noho ana ma keia pae aina, (koe na kanaka maoli o keia pae aina.) EKOLU, E mau no na kanawai e noho nei, a me na kanawai e hanaia ma ka ahaolelo o ke Lii a me na Lii, (e lohe nae ka poe i kohoia e aʻu;) no na kanaka maoli, a e lilo ia i kumu no na mea i kohoia no ka hooponopono ana iwaena o na haole e noho ana ma keia Pae Aina. EHA, E mau no na Luna e noho nei, e hooponopono i ka waiwai o ke Aupuni e like me ka makemake o ke Lii a me na Lii maoli, a na lakou no e hooponopono i ka uku o lakou no ka makahiki e noho nei; a e mau no na palapala o ke Aupuni ma ko lakou luna: e hoikeia nae na Buke dala i ka poe Luna i kohoia e like me na olelo maluna. Pela no na moku, koe nae ka hana e pono ai, ke Lii Wahine Beritania. ELIMA, Aole kuai, aole hoolimalima, aole haawi aina i ka haole, aole na ka poe Luna i kohoia e like me na

olelo maluna, aole hoi na kekahi kanaka, mawaena o ka wa mai ka la 24 o keia maluna a hiki mai ka lohe mai Beritania Nui no na hooponopono ana malaila--ina e hooliloia ka aina aole ia e lilo, aole hoi e kakauia ka inoa o ke Lii a me ke Kuhina. EONO, E mau no na olelo ae like o ke Lii Maoli a me ke Kuhina, a e hanaia no e like me ka ole o keia haawina. Kauia koʻu lima i keia la iwakaluakumamalima o Feberuari, i ka makahiki o ko kakou Haku hookahi tausani ewalu haneri kanaha kumamakolu, ma Honolulu, Oahu, ko Hawaii Pae Aina. (Inoa,) GEORGE PAULET, Kapena H. B. M. Moku Carysfort. Ike maka i ke kakau ana, G. P. Judd, Kakauolelo a me Unuhiolelo no ke Aupuni. Alex, Simpson, H.B. Ma hope Komikele.

Eia kekahi palapala a ke alii i kukala'i imua o na kanaka i ka la i lilo ai ka aina; aole nae i ae like ia keia palapala e na lii a me ke lii manawa Beritania. Na ke alii a me ke Kuhina o Hawaii nei wale no keia; a ua maopopo ma keia palapala ko laua manao, ua lilo kumu ole ke aupuni, a ua manao no hoi laua, aole lilo loa; e hoihoiia mai no. AUHEA oukou e na Lii a me na kanaka, a me na makaainana mai kuu kupunakane mai, a me na kanaka o ka aina e. E hoolohe mai oukou, Ke hai aku nei au ia oukou, ua pilikia wau no ko'u hoopilikia ia mai me ke kumu ole, nolaila, ua haawi au i ke ea o ka aina o kakou, i lohe oukou. Aka, e mau ana no ko'u Alii ana maluna o oukou, a me ko oukou pono, no ka mea, ke lana nei no ko'u manao e hoihoi ia mai ana no nae ke ea o ka aina, ke hooponoia mai ka'u hana ana. Hoopaaia ma Honolulu, Oahu, i keia la 25 o Feberuari, 1843. Ike maka, JOHN D. PAALUA. KAMEHAMEHA III. KEKAULUOHI.

Auhea oukou e na kanaka o Hawaii nei; pehea ko oukou manao i kela lilo ana o ke aupuni? Oluolu anei? Eha paha ko oukou naau no ke'lii a me na lii; Ua pono no ia; ua eha pu kakou: aka, ea, mai kakumakena, mai hoohaunaele, mai kulanalana ka manao. E noho malie no ka pono, a e malama i na kanawai o ke aupuni: mai manao oukou ua haule ilalo na kanawai; aole loa, ke kau nei no a pau loa. Haunaele iki o Honolulu nei i kela po aku nei, a eha loa kekahi kanaka i kekahi koa manuwa, a nolaila ua kukala hou ia na kanawai i keia mau la, i pau ke kuhihewa o na kanaka. E na kanaka Kristiano o Hawaii nei; mai kulanalana ka manao no ka lilo ana o ke aupuni; no ka mea, aole ma keia ao ko kakou aupunui; he aupuni e ?? ko kakou ma ka lani; he aunpuni maikai loa ia, lilo ole luliluli ole, maluhia no hoi. Maikai kona alii; malama pono i kona poe kanaka a mau loa ko lakou ola. Pau koke a lilo wale aku na aupuni o keia au, aka, o ke aupuni o Iesu Kristo, aole loa e lilo aku. E imi e aku kakou i keia aupuni a me kona pono, alaila, palekana kakou iloko o na mea kupikipikio o keia ao.