Ka Nonanona, Volume II, Number 20, 7 March 1843 — Page 100

100 KA NONANONA. [MARAKI,

olelo maluna, aole hoi na kekahi kanaka, mawaena o ka wa mai ka la 24 o keia malama a hiki mai ka lohe mai Beritania Nui no na hooponopono ana malaila - ina e hooliloia ka aina aole ia e lilo, aole hoi e kakauia ka inoa o ke Lii a me ke Kuhina.
          EONO, E mau no na olelo ae like o ke Lii Maoli a me ke Kuhina, a e hanaia no e like me ka ole o keia haawina.
Kauia ko'u lima i keia la iwakaluakumamalima o Feberuari, i ka makahiki o ko kakou Haku hookahi tausani ewalu haneri kanaha kumamakolu, ma Honolulu, Oahu, ko Hawaii Pae Aina.
(Inoa,) GEOR GE PAULET, Kapena H. B. M. Moku Carysfort. Ike maka i ke kakau ana, G. P. JUDD, Kakauolelo a me Unuhiolelo no ke Aupuni. ALEX SIMPSON, H. B. M. hope Kanikele.

          Eia kekahi palapala a ke alii i kukala'i imua o na kanaka i ka la i lilo ai ka aina; aole nae i ae like ia keia palapala e na lii a me ke lii manuwa Beritania. Na ke alii a me ke Kuhina o Hawaii nei wale no keia; a ua maopopo ma keia palapala ko laua manao, ua lilo kumu ole ke aupuni, a ua manao no hoi laua, aole lilo loa; e hoihoiia mai no.
          AUHEA oukou, e na Lii a me na kanaka, a me na makaainana mai kuu kupunakane mai, a me na kanaka o ka aina e.
          E hoolohe mai oukou, Ke hai aku nei au ia oukou, ua pilikia wau no ko'u hoopilikia ia mai me ke kumu ole, nolaila, ua haawi au i ke ea o ka aina o kakou, i lohe oukou. Aka, e mau ana no ko'u Alii ana maluna o oukou, a me ko oukou pono, no ka mea, ke lana nei no ko'u manao e hoihoi ia mai ana no nae ke ea o ka aina, ke hooponoia mai ka'u hana ana.
Hoopaaia ma Honolulu, Oahu, i keia la 25 o Feberuari, 1843. Ike maka, JOHN D. PAALUA. KAMEHAMEHA III. KEKAULUOHI.

          Auhea oukou e na kanaka o Hawaii nei; pehea ko oukou manao i keia lilo ana o ke aupuni? Oluolu anei? Eha paha ko oukou naau no ke'lii a me na lii; Ua pono no ia; ua eha pu kakou: aka, ea, mai kakumakena, mai hoohaunaele, mai kulanalana ka manao. E noho malie no ka pono, a e malama i na kanawai o ke aupuni: mai manao oukou ua haule ilalo na kanawai; aole loa, ke kau nei no a paa loa. Haunaele iki o Honolulu nei i kela po aku nei, a eha loa kekahi kanaka i kekahi koa manuwa, a nolaila ua kukala hou ia na kanawai i keia mau la, i pau ke kuhihewa o na kanaka.
          E na kanaka Kristiano o Hawaii nei; mai kulanalana ka manao no ka lilo ana o ke aupuni; no ka mea, aole ma keia ao ko kakou aupuni; he aupuni e aku ko kakou ma ka lani; he aupuni maikai loa ia, lilo ole luliluli ole, maluhia no hoi. Maikai kona alii; malama pono i kona poe kanaka a mau loa ko lakou ola. Pau koke a lilo wale aku na aupuni o keia au, aka, o ke aupuni o Iesu Kristo, aole loa e lilo aku. E imi e aku kakou i keia aupuni a me kona pono, alaila, palekana kakou iloko o na mea kupikipikio o keia ao.

NA MOKU O KE AUPUNI.

            Ua hoololiia na inoa o kekahi o lakou. O Victoria, ua mau no kona inoa, a o ka Hooikaika ua kapaia i keia manawa o Albert, a o ka Paalua ua kapaia o Adelaide.
          Kokoke holo aku ka Hooikaika i Mesiko, e halihali ia A. Simpson a me na palapala i St. Blas. E hoi ana A. Simpson i Beritania.

NA LII.

            Ua hoi aku ke alii a me ke kuhina i Lahaina a hoi koke mai no i keia mau la. Iloko o keia popilikia nui o na lii, aole lalau iki lakou i na mea ona. Aloha ino lakou!

KA HOKU WELOWELO;

            Eia ke kau nei ka hoku welowelo ma ke komohana i keia mau po iho nei; aole nae akaka kona wahi i hele mai ai a me kona wahi e holo aku ai.

Na LIMAIKAIKA, e hoopuka'ku.