Ka Nonanona, Volume II, Number 19, 14 February 1843 — Page 89

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." Solomona
Buke 2. HONOLULU, OAHU, FEBERUARI 14, 1843. Pepa 19.

HE WAHI NINAUHOIKE.
no ka aoao pope.
(E nana i ka aoao 78.)

                I. Heaha ka iwakaluakumamakolu o ka hewa o ka poe pope?
                D. O ko lakou hookapu ana i ka waina ma ka ahaaina a ka Haku; aole haawi i na kanaka.
                I. Pehea ka manao o ka poe hoolepope ma ia wahi?
                D. Eia ka lakou manao; Pono keia mea kela mea, iloko o ka ekalesia, e inu i ke kiaha.
                I. Pehea e akaka ai ia manao?
                D. Penei; I: Ma ke kauoha a Iesu i ka hana mua ana i keia ahaaina. Mat. 26: 27. "Lalau iho la hoi oia i ke kiaha, hoalohaloha aku la, a haawi mai la ia lakou, i mai la, E inu oukou a pau i keia." O lakou a pau ke inu, aole ke kahuna wale no
                2. Ma ka hana ana a me ke ao ana a na lunaolelo--"a inu iho la lakou a pau." Mar. 14: 23.
                3. Aole e hiki i ke kanaka ke malama pono i keia oihana e like me ka olelo a ka Haku, ke ole oia e inu i ke kiaha. E nana ma Kor. I. 11: 26. "I na wa a pau loa a oukou e ai ai i keia berena, a e inu hoi i keia kiaha, e hai aku ana oukou i ka make o ka Haku, a hiki hou mai ia." He olelo keia i na hoahanau a pau o Korineto.
                4. Na kanaka pono a pau, ua holoiia ma ke koko o Iesu; nolaila, pono lakou e inu i ka hoailona o kona koko. Mat. 26; 27, 28; "Lalau iho la hoi oia i ke kiaha, hooalohaloha aku la, a haawi mai la ia lakou, i mai la, E inu oukou a pau i keia, no ka mea, o ko'u koko keia no ke kauoha hou, i hookaheia no na mea he nui loa, i mea e kalaia'i na hala." Luka, 22: 20. "O keia kiaha, o ke kauoha hou ia iloko o ko'u koko i hookaheia no oukou." Kor. I. 10: 16. "O ke kiaha laa a kakou e hoolaa nei, aole anei oia ka mea e pili ai i ke koko o Kristo."
                I. Heaha ka iwakaluakumamaha o ka hewa o ka poe pope?
                D. O ko lakou manao i ka mesa?
                I. Heaha ka mesa?
                D. O ka ka poe hoole pope i kapa ai ka berena ahaaina, oia ka ka poe pope i kapu ai o ka mesa. O ko Iesu kino ia, a lilo ia lakou i mohai maoli no ke Akua. Bell. lib. 1, de missa, cap. I.
                I. Pehea ka olelo a ka poe hoole pope i ka mesa?
                D. Eia ko lakou manao; o ka mesa, he mea lapuwale ia; a, ma ka hana ana a ka poe pope, he hoomana kii ia.
                I. No keaha i lapuwale ai?
                D. He lawa no ka mohai o Iesu ma kona make maoli ona, a nolaila, hiki ke Akua ke hoapono i ka mea mihi Heb. 10:12. "Aka, o keia kahuna mahope iho o kona kaumaha ana i ka mohai mau no ka hewa, noho iho la ia ma ka lima akau o ke Akua."
                I. He mea hoomana kii anei ka ka mesa?
                D. He mea hoomana kii no; no ka mea, hoomana no lakou i ka mesa, a paulele malaila me he mea la e ola'i, e like me Iesu Kristo.
                I. Pehea la oe e hoike ai, aole ka mesa he mohai like loa me Kristo e kaulia'na ma ke kea?
                D. Penei, 1. Ua haawi mai ke Akua i kana keiki i mohai, aole ka mesa.
                2. O ka mesa, aole ia he mea like me Kristo ma ke kea; no ka mea, o ko Kristo kino i hanau na ka wahine puupaa, oia kana mohai; aka, o ka mesa, he apana berena ia. Ma ka make ana o Iesu kahe ke koko; aka, aohe koko o ka mesa.
                3. O ko Iesu kino he ano kanaka ia —o kela mesa, aohe ona ano kanaka.
                I. Aole anei he mau hewa hou aku ko ka poe pope?
                D. He nui loa no; aka, o keia mau hewa i hoopukaia'e nei, ua nui loa no— nolaila, pono na kanaka a pau e hoowahawaha i ko lakou aoao a me ka lakou ao ana.
                I. O Lutera anei ka mea mua i hoole i ka pope?