Ka Nonanona, Volume II, Number 18, 31 Ianuali 1843 — Page 85

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." Solomona
Buke 2. HONOLULU, OAHU, IANUARI 31, 1843. Pepa 18.

HE WAHI NINAUHOIKE no ka aoao pope.
(E nana i ka aoao 78.)

            I. Heaha ka iwakalua o ka hewa o ka poe pope?
          D. O ko lakou hoole ana, aole hiki i ka poe haipule ke hoomaopopo i ko lakou manaoio. Eia ka lakou o ko ka poe haipule manao, he maopopo ke kalaia o ko lakou hewa, he mea lapuwale ia, a ku e i ka ke Akua.
          I. Pehea ka poe hoole pope ma keia mea?
          D. Eia ko lakou manao; oia kahi pomaikai i haawiia mai i ka poe haipule, o ka hoomaopopo i ko lakou manaoio; nolaila, pono lakou e hooikaika i maopopo loa ke kalaia mai o kO lakou hala. "E na hoahanau, e hooikaika loa oukou, i hooiaio ko oukou heaia mai, a me ko oukou koho ana." Pet. II. 1: 10.
          I. Pehea e akaka'i ka pono o keia hooikaika ana?
          D. 1. Oia ka mea i haawiia mai ka palapala hemolele, i alakai, a i kumu hoi e maopopo ai ka oiaio o ko kakou pono. Rom. 15: 4. "No ka mea, o na mea a pau i palapala e ia mamua, ua palapalaia i mea e ao mai ai ia kakou, i loaa ia kakou ka manao lana ma ke ahonui, a me ka hooikaika ana mai o ka palapala hemolele." Ioane I. 3: 19-21. "I keia mea e ike ai kakou, no ka oiaio kakou; a e hooiaio aku kakou i ko kakou mau naau imua ona. Ina e hoohewa ole mai ko kakou naau ia kakou iho, alaila, ua loaa ia kakou ka wiwo ole imua o ke Akua."
          2. Eia kekahi; ua loaa ka maopopo o ka manaoio i ka poe haipule kahiko, Ioba, Davida, Paulo, a me na mea e. Ioba 19: 25. Tim. II. 4: 7. 8.
          I. Heaha ka iwakalua kumamakahi o ke kuhihewa o ka poe pope?
          D. O ko lakou hoonui ana i na oihana ekalesia.
          I. Heaha ka oihana ekalesia?
          D. He oihana ia i haawiia mai e Kristo; eia nae ke ano o ka oihana ekalesia, ua hoikeia mai ka manao o Kristo ma kahi hoailona i ike maka ia.
          I. Ehia oihana ekalesia ma ke kauoha hou?
          D. Elua wale no, ka bapetiso ana a me ka ahaaina a ka Haku.
          I. Heaha na oihana elima e ae a ka poe pope i hookui mai?
          D. Eia, 1. Ka Penitenia. 2. Ka Ukione. 3. Orinatio. 4. Makerimonio. 5. Kopirimatio.
          I. Aole anei e pono ke kapa ia mau mea elima he mau oihana ekale sia, e like me ka bapetiso a me ka ahaaina a ka Haku?
          D. Aole loa e pono, no ka mea, aole i kupono kekahi o ia mau mea i ka inoa oihana ekalesia. Ma ka hana ana ia mau mea, he nui loa na mea lapuwale a ka poe pope i hookui mai me ka ke Akua olelo. He hewa nui ia o lakou. Solomona 30: 6. "Mai hui ae oe i kekahi mea me kana mau huaolelo, o ao mai oia ia oe, a e lilo oe i mea wahahee."
          I. Heaha ka iwakaluakumamalua o ke kuhihewa o ka poe pope?
          D. O ko lakou manao ana i ka be rena ahaaina, o ke kino maoli ia o Iesu; a o ka waina, oia ke koko maoli o Iesu.
          I. Pehea ka lakou olelo i keia?
          D. Eia ka lakou ao ana; Ma ka ke kahuna hoolaa ana i ka berena, pau ke ano berena a lilo iho la i io maoli o Iesu; pela no ka waina, pau ke ano waina, a lilo i koko o Iesu. Eia ka olelo ma na palapala pope a pau, "O ka berena, o Kristo okoa no ia, ke kino a me ka Uhane; pela ka waina, he Kristo okoa no hoi ia, ke kino a me ka uhane."
          I. Auhea na pauku o ka palapala hemolele a lakou i kuhikuhi ai no keia manao o lakou?
          D. Ioane 6: 51-56. Kor. I. 11: 24.