Ka Nonanona, Volume II, Number 17, 17 January 1843 — Page 81

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." Solomona
Buke 2. HONOLULU, OAHU, IANUARI 17, 1843. Pepa 17.

                Eia mai kekahi mau palapala no Haalilio mai: olioli paha na kanaka i ka lohe ana ia laua me Mi. Rikeke; ua maikai ko laua holo ana.

Mesiko, Wele tabu, Nov. 2, 1842.

E Dr. G. P. IUDA,
                E ko'u hoaloha, aloha nui oe, a me ko kou hale a pau. Eia no hoi au kou makamaka ke aloha aku nei ia oe. Ua hiki mai maua ma keia wahi i ka la 29, Okatoba, ke kali nei maua i moku no maua e holo ai. Auhea oe, he maikai no wau, aohe maimai; he maikai ko'u ola e noho nei i keia mau la. Aka, aole i ike ia aku ka hiki ana ma na aina anu, oluolu paha malaila, aole paha. Auhea oe, ua hele mai nei maua mawaena o keia aina nui me ka maluhia, aole i hoopilikiaia mai, ua malama maikai ia mai no hoi maua e ka Haku, a hiki mai nei ma keia wahi. Aka, o ka luhi o na kino ka mea i loaa ia maua no ka loihi o ke alanui. Ua nui ka wela o ka la, a me ke anu; ua pulu i ka ua, a me ka hau, ua komo iloko o na mauna, a me na kahawai, iloko hoi o na waonahele loa o Mesiko nei, ua au hoi i ka wai o na muliwai e waiho ana ma ke alo o na kuahiwi, i ka la a me ka po. I ke anu, a me ka wela, ua hoomanawanui no hoi i ka pololi, ua kau i ke kua o na miula a po ka la. Aka, ua maopopo loa ia'u, o Iesu kekahi me maua iwaena o keia aina makamaka ole. A ua hoopomaikai mai no hoi oia ia kakou. Ua malama mai no hoi oia ia maua, aole oia i hoopilikia mai i ko maua mau kino, aole hoi i hoeha mai. Ua haawi mai oia ia maua i na pono a pau. Ua hookipa oia ia maua i kahi o na makamaka pono a pau; malaila, i loaa ai ia maua ka oluolu, a me ka pomaikai no ke alanui a maua i hele mai ai.
                Auhea oe; ua ike au i na kulanakauhale iwaena o keia aina, aole e pau i ka helu, a ua ike hoi au ia Mesiko, ke Kulanakauhale nui o ke 'lii. Ua ike hoi au i na lua dala, a me ka hana ana o ke dala, a ua komo hoi maua iloko o ka hale ahaolelo o ke'lii, a me ka hale o ke alii. Ua hanohano ia mau wahi i ko'u maka ke nana aku. A eia no hoi au me ke ola i keia la e aloha aku nei ia oe, a me kau wahine, a me na keiki; e hai aku oe i kou aloha i na makamaka a pau malaila, a me Hana ma, a me kou poe kanaka a pau a me ko'u pahale, a me ka aina, a me na'lii.
                Aloha kaua, E ola kaua i ka Haku, a halawai hou me ka olioli.
TIMOTEO HAALILIO.

Mesiko, Weletabu, No v.8, 1842.

E. D. P. IADA,
                Aloha nui oe; ua loaa mai kau palapala ia maua i keia la 8, o Nov. 1842. A ua ike hoi maua i na olelo a pau maloko. Nui ko'u aloha ia oe, a ia oukou no hoi a pau. Aloha ino na'lii, aloha ino o Kapihi! Eia maua me ka pomaikai i keia la, i ka ike ana i kau palapala. I nui ke aloha i hiki mai no kakou, a me ka aina. Eia maua ke holo nei maluna o ka manua. Amareka, o Falamaka ke inoa, a Nuolina. Ua ku mai nei kekahi moku ahi manua no Amerika, he moku nui; e 247 kapuai 6 ka loa e 2,400 tona. I ko'u ike ana ia ia e holo mai ana me ka uahi, he mea kupanaha ia'u i ka nana aku, nui kona holo ke nana aku, aole okana mai, o ka mua keia o ka'u ike ana i ka moku ahi, me e ko'u makemake aku ia ia.
                Aloha ino oe, eia no maua me ka malu, a me ke kupaa no hoi ma ka pono a kakou i hoohiki ai.
                Aloha oe. T. HAALILIO.

                Holo laua i Wasetona maluna o ua moku ahi la he manuwa, o Missouri ka inoa a 9 la pae paha ma Wasetona.