Ka Nonanona, Volume II, Number 16, 3 January 1843 — Page 78

78 KA NONANONA. [IANUARI,

i hala ole kekahi, he kane hoi a ka wahine hookahi, he mau keiki manaoio kana." Heb. 13: 4. "E mahaloia ka mare no na mea a pau, a e hoopaumaele ole ia hoi kahi moe; no ka mea, e hoahewa mai ana no ke Akua i ka poe hookamakama, a me ka poe moe kolohe."
                2. O kela hookapu ana i ka mare, he kumu ia no ka haumia he nui loa a me na hana kolohe, e like me ka hookamakama, ka moe kolohe, ka moe aikane, ka pepehi kanaka, a me na hewa e.
                3. O ia hookapu ana a ka poe pope, he hoailona ia no Anikristo. E nana ma 1 Tim. 4: 1, 3. "Ke olelo paka mai nei ka Uhane, a i ka manawa mahope, e haalele ana kekahi poe i ka manaoio, e malama ana i na uhane hoopunipuni, a me ke ao ana a na daimonio; E papa ana i ka mare",

Lahainaluna, Dekemaba 11, 1842.

                E ka Nonanona e; aloha oe. E pono ia oe ke hoakaka aku keia ninau.
                Pehea e loaa ai ka waiwai o keia pae aina, a nui aku; ke lilo na'lii a me na kanaka i poe molowa?
                Aole anei keia o ka lua pau e waiwai ole ai o Hawaii nei? he oiaio, oia ka mu nana e ai ka hale papaa o ko Hawaii nei a pau.
                Auhea oukou e na 'lii a me na kanaka a pau loa, ke ike nei oukou; o ka molowa, o ka palaualelo, o ka nohowale; oia ke kumu e waiwai ole ai keia pae aina.
                E pono ia oe e hahau a e kepa i ka poe molowa e noho ana ma na mokupuni o Hawaii nei; me ka olelo ana, e ala oe, mai kou hiamoe ana; a e hele oe i ka Nonanona e hoonaauao ia oe iho.
                Eia kekahi, o ka make hewa o ka aina i ka poe molowa a me na 'lii imi ole i mea e pono ai ke aupuni.
                O na 'lii o na aina naauao imi nui lakou i mea e pono ai ke aupuni; wae lakou i poe naauao a o lakou ka poe noho pu me na 'lii; aole ka poe naaupo, hoomalimali i mea e hihia ai ke 'lii.
                Pela paha ke 'lii nui o Hawaii nei, ua noho pu paha oia me na kaukau alii naaupo hoomalimali, o ka loaa no ia a ko Hawaii nei o ka hoomalimali.
                O na punahele, o na aikane, o na keiki hookama a ke 'lii nui o Hawaii nei; imi lakou i mea e pilikia ai na makaainana. E i mai paha kekahi heaha ia pilikia? Eia ua pilikia nei; o ka hele ana o lakou e aie i na hale kuai aole nae na lakou i hookaa, na na makaainana no.
                Ke ninau aku nei au ia oukou a pau loa e na makaainana; aole anei oukou i hooluhia e na 'lii, no ka lakou aie ana? ina he oiaio keia e hooakamai ka makaainana i hooluhi ia.
                Eia keia kauoha ia oe e ke alii nui o Hawaii nei; mai noho pu oe me na 'lii naaupo, o lilo kou aupuni i mea ole; a hoohilahilaia oe e na 'lii o na aina naauao no kou noho pu ana me na 'lii naaupo.
                Aloha oe. Na A. I. MAOHEAU.

SILIKA. HELU 2.

                I ka makahiki 1830 hoomakaukau o Mr. Peke laua o Kale e mahi silika ma Koloa, i Kauai, a mahope iho hui ia o Mi. Javisa me laua. Hooikaika no lakou me ka minamina ole i na dala i lilo i holo lanakila ia hana. Kanu koke no lakou i na ilima i loaa maanei e ulu ana. Kii aku no hoi i na anoano ilima ma Kina, lawe mai no hoi i na lala ilima lau nui mai Amerika mai. Kii ia mai no hoi na enuhe mai Kina mai, a mai Amerika mai no hoi kekahi. Holo aku no Mi. Peke i Amerika Huipuia e nana i ka hana silika malaila, a e imi i na mea e pono ai ka hana ma keia pae aina; a hoi mai ia me ka hemahema ole, ua lawa na mea hana, ua lawa hoi na paahana, he paakiki nae ka hana; aole holo. Kamau wale no, a hala kekahi mau makahiki, kiola. Nui wale na tausani dala i poho wale malaila.
                O Kapena ma no hoi kekahi i holo pu mai me Mi. Peke, a hoolimalima i