Ka Nonanona, Volume II, Number 14, 6 December 1842 — Page 72

72 KA NONANONA. [DEKEMABA,

HONOLULU EKALESIA ELUA.

                I ka la Sabati, Dekemaba 4, 1842. Ua malama makou i ka ahaaina a ka Haku. Ua piha loa ka luakini. I keia mau hebedoma i hala ae nei, bapetizoia kekahi poe hou, (170.)
                Ua hoomakaia keia ekalesia i ka malama o Aperila, 1838. Eia ka poe i bapetizoia ma keia ekalesia mai ia wa mai, 1,804. Eia hoi ka poe no na ekalesia e ae mai, 101. Hui, 1,905.
                Eia ka poe i make aku, 136. Eia ka poe i hele aku i na ekalesia e ae, 79.
                Eia ka poe i okiia, aole nae lakou i hoi hou mai, 105.
                Eia ka poe i kapaeia i keia wa, 22. Hui, 342. E lawe i keia poe noloko o ka poe a pau i komo, a 1,563, ka poe hihia ole i keia manawa.
                Eia ka poe hoahanau malihini, i ahaaina pu me makou, (116.) No Hilo 7. No Kohala 14. No Waimea 9. No Kealakekua 16. No Kailua 7. No Kau 2. No Hana. 12. No Lahaina 2. No Molokai 2. No Waialua a me Koolau 15. No Kaneohe 3. No Ewa 26. No Honolulu (1) 1. Hui, 116.
Na L. KAMIKA.

Lahainaluna, No v. 30, 1842.
                E ka Nonanona e, aloha oe. Ua haawi mai oe i kau ninau, ma ka Nonanona 13, aoao 68; eia no ia;
                "Ku mai kekahi moku ma Honolulu me na ee moku he 81; ua palua na wahine i na keiki, a ua pakolu na kane i na wahine. Ehia kane, ehia wahine, ehia hoi keiki maluna o ua moku nei? Nawai e wehe keia? Na na keiki o Lahainaluna paha.
                E hoailona i ka mea ike oleia i m.
                He m = ka nui o na keiki.
                He 2m = na wahine.
                He 6m = na kane.
                Nolaila, m + 2m + 6m = 9m 81.
                A ina ua like ka 9m me 81, alaila, o ka m = 9 ka nui o na keiki.
                He 2m= 18 na wahine.
                He 6m = 54 na kane.
                E houluulu i ikea ka oiaio 9 + 18 + 54 = 81. Na G. H. PAEHEWA.

KA HANA MA KOOLAU.

                I ka la 23, o Novemaba, ua hoomaka no maua me A. B. Kamika i ka hana ma Koolau; a i ka la 27, ka hoopau ana; oia hoi, elima la ka maua hai ana'ku i ka olelo a ke Akua i ko laila poe kanaka. Elua la ko maua hele ana mai kela kau hale i keia kau hale, e ao ana'ku ia lakou; a i ka la 25, ua akoakoa na hoahanau, ma Hauula. He la hooki ai no ia. A i ka la 26, ua kamailio pu no maua me na kanaka; me ka poe hoahanau hihia kekahi; me ka poe hoakakaia kekahi; a me ka poe imi kekahi.
                A i ka la Sabati, ua piha loa ko laila luakini i na kanaka. A i ka halawai ahiahi, he ahaaina na ka Haku. Ina manawa 10, o ka poe i okiia mamua, ua hoihoiia mai i ka ekalesia; 14, o ka poe i hoakakaia e Mi. Emekona. ua bapetizo ia, a ua ahaaina pu me makou; a 20, o ka poe e imi ana, ua hoakakaia, e komo i ka ekalesia ma keia hope.
                Ua hauoli nui kolaila poe hoahanau i keia manawa. Ua launa nui mai hoi na haumana pope. Ua kokoke mai paha ko lakou manawa e hoi nui mai, no ka mea, aole maopopo lea ia lakou ka pono o ka naaupo a me ka hoomana kii. Na L. KAMIKA.

KA BAIBALA.

                Ma na aina ku e i ka pope, 25,000 huikanaka, i hui pu e hai, e unuhi, a e hoolaha aku i ka olelo a ke Akua iwaena o ka poe naaupo. Mahope mai o ka makahiki 1804, ua hoolaha ia na Baibala 25,000,000. Ua hoohalikeia ka Baibala i na olelo e he 164. Iloko o keia mau makahiki 42, ua hoohalikeia ka Baibala i na olelo e he 97.

                Ia oe, e Iehova, e kahea aku ai au, e kuu pohaku, mai hookuli mai oe ia'u, O like auanei au me ka poe iho ilalo o ka lua, ke hookuli mai oe ia'u. Na Halelu.

NA LIMAIKAIKA e hoopuka'ku.