Ka Nonanona, Volume II, Number 13, 22 Nowemapa 1842 — Page 67
1842.] KA NONANONA. 67
O ke Akua anei me oukou? Mai hoopalaleha oukou i na hana maikai; mai hiamoe wale e like me ka kekahi poe, no ka mea, ua kokoke ka manawa.
O ke Akua me oukou a pau.
Na ko oukou kumu kahiko,
na EMEKONA.
MOKU KIALUA.
I ka la 10 o keia mahina, ku mai kekahi moku kialua mai Bolabola mai. Eia kekahi mea a makou i lohe ia ia.
Aia ma Bolabola i keia wa, he mau moku manuwa, no farani mai, a ua hopu lakou, a lawe pio i kela aupuni.
A lilo mai ko lakou aupuni i ka poe Farani; eia ka lakou makana i ke'lii nui ia Pomare, a me kekahi mau kiaaina, e hooluolu ia lakou. Ua makana aku i elima tausani dala i ke'lii nui no ka makahiki hookahi; a i hookahi tausani dala pakahi no na kiaaina eha. Ua oleloia mai, ua oluolu kolaila poe alii, e noho pio pela. Ae paha. Ua oluolu i keia wa, no ke kuhi hewa, a me ka naaupo; aka, o ka uwe a me ke kanikau paha i koe.
Ua lohe hoi makou i ka popilikia o na kanaka ma Nuuhiva. Eia ko lakou popilikia. Ua lawe pio ko Farani poe i ko lakou aupuni. A e kukulu ana ka poe Farani i ka papu nui e pale aku i na enemi. Aka, aole oluolu na kanaka o Nuuhiva i keia mau alii hou, mai ka aina e mai. Nolaila, ua pepehi lakou i elua mau haole Farani.
A no ia mea, ua kaua koke ka poe Farani ia lakou, a make koke no kekahi poe kamaaina. Aloha ino kolaila mau aupuni.
Na'u na KIAI.
KA NONANONA.
Honolulu, Tusede, Novemaba 22, 1842.
HAUNAELE MA HONOLULU NEI.
I ka poe nei, (Nov. 17,) ike na makai i kekahi luina e noho ana iuka mahope o ke kani ana o na pu elua; kii aku la lakou ia ia e hopu, pale mai ke kapena, o Rogers kona inoa, ia lakou a hiki aku i ka wapo, hakaka maoli lakou, a eha loa ka makai. O ka holo no ia o ua kapena nei, a me kekahi poe pu me ia i kai, a kahea aku iwaena o na moku, e hoomakaukau e hoi iuka. A liuliu iki, holo nui mai na waapa iuka, a ua piha i na luina. Holo mai lakou me na laau hahau, a me kekahi mau pahi kaua, a he pu paha kekahi, a hiki iuka, hoomakaukau lakou e hele hokai a me ka hoohaunaele, O Kap. Rogers ko lakou luna. O ke kaahele no ia o lakou iloko o Honolulu nei me ka wawa nui, a me ka walaau loa, a haunaele loa keia wahi i ka po nei. Komo lakou iloko o na hale kuai rama, a inu a ona kekahi poe, a hana ino loa. Hele aku Mi. Hupa, ke kanikele Amerika, a papa aku ia Kap. Rogers, mai hana me neia; aole hoolohe mai; i aku la ia ia Mi. Hupa, "e hoi oe i kou wahi a hiamoe." Pela wale no a pau wale ko lakou makemake i ka walaau, hoi lakou i ka moku, a hookani i ka pu.
I keia la (18) ua hookolokoloia o Kap. Rogers ma ka papu, a ua hooukuia ke kiaaina i $99,75.
NA MEA HOU MA KALIFONIA.
I keia mau la iho nei, ua loaa mai kekahi palapala no Francisco mai, oia hoi ma Kalifonia, a ua lohe makou malaila i ka lawe ana o Thomas K. Jones, ia Montere, a me kekahi mau moku no Mesiko e ku ana malaila. He Komadore o Thomas K. Jones no Amerikahuipuia, a ua hele aku kona ulu moku i Kalifonia, e lawe i ka aina no ke ku e ana o ko Mesiko i ko Amerikahuipuia. No ke aupuni o Mesiko o Kalifonia, a nolaila, ua laweia. Lawe no o Komadore Jones ia Montere, a mahope lohe oia, ua pau ka pilikia iwaena o Mesiko, a me Amerikahuipuia, a hoihoi aku ia i kela kulanakauhale.
Eia kekahi; ua holo malu mai elima moku kaua no Beritania mai; aole nae akaka ko lakou wahi e holo ai, a me ka lakou hana e hana'i.
HANA AUPUNI.
Ninau mai kekahi kanaka ma Kohala Hawaii, penei, "o na hana hea la na hana o ke aupuni? e hai mai i kela hana keia hana o ke aupuni a me kela waiwai keia waiwai o ke aupuni, a me na mea a pau i kapaia no ke aupuni."
Kainoa ua maopopo ka hana a me ka waiwai no ke aupuni. E nana ma ke kanawai no ka la koele aoao 22, a ua