Ka Nonanona, Volume II, Number 13, 22 November 1842 — Page 66

66 KA NONANONA. [NOVEMABA,

"Nolaila, ma ka hana ana ma ke kanawai, aole kanaka e hoaponoia imua ona." Ram. 3: 20.

(Aole i pau.)

Lahainaluna, Nov. 7, 1842.
                Aloha oukou, e kuu mau hoahanau a me na hoalauna ma Waialua a me Koolau i Oahu.
                I keia awakea kuu hoi ana mai Molokai mai. Ekolu o'u mau la malaila e kokua aku ia Mi. Hikikoke ma na hana o ka Sabati, ka ahaaina a ka Haku a me ka hookomo ana i kekahi poe hou maloko o ka ekalesia.
                Elua haneri paha ka poe i hookomoia maloko o ka ekalesia i keia mau la; a he haneri paha a keu aku na kamalii i bapetisoia.
                Nui na mea au i mahalo ai ma Molokai, a ma kekahi mau mea ua kaumaha no.
                Eia na mea au i mahalo ai.
                1. Nui ka poe ma na halawai; nui na kane a me na wahine, a nui hoi na kamalii;—piha ka hale a hu iwaho i kela halawai a i keia halawai.
                2. Aole lakou i hiamoe. Ua umi kuu mau halawai ana me lakou, mai ka poalima a hiki i ka la noa, aole nae au i ike i kekahi mea hiamoe. O na keiki uuku wale no, na mea hiamoe maloko o ka hale pule malaila.
                3. Aole i puka aku ke kanaka iwaho o ka hale i ka wa e halawai ai; o na wahine pilikia me na keiki uuku, oia wale no ka poe i puka aku.
                4. Eia kekahi, ua lohe au, ua like ka nui o na kanaka i ka halawai ahiahi me ka nui i ka halawai kakahiaka o ka la Sabati, ua oi aku ka nui ma ke ahiahi o ka Sabati i hala iho nei.
                5. Ua hele nui na hoahanau i ka ai o ka la; a i kuu lohe ana, ua maa lakou i ka heluhelu paanaau i na pauku ehiku no ka hebedoma.
                6. Eia kekahi; ma ke kula Sabati, nui na kamalii, eha paha haneri, elima haneri paha, aole au i helu. Ua noho makaukau lakou, nui ka poe ike lea i ka ai o ka la.
                7. Eia kekahi mea hou au i mahalo ai; aole au i ike i kekahi ipu baka ma Molokai, aole au i honi i ka mea awaawa i ka baka; aole au i ike i kekahi baka e ulu ana. Pomaikai lakou malaila. Nui na keiki a lakou, aole nae he baka. Oia na mea au i mahalo ai.
                Eia kekahi mau mea au i minamina ai.
                1. Uuku ko lakou hale pule no na kanaka, piha e; a ma ka ahaaina, ua oi aku ka nui mawaho o ka hale i ko ka poe maloko. Aka, ikaika ko lakou manao e kukulu i ka hale hou, a nui ae. Ua makaukau kekahi mau waiwai no ia mea. O ke Akua me lakou malaila.
                2. Ua mai ko lakou kumu, aole nae mai loa, aka, aole ikaika no na hana nui wale; o ke kino wale no ka mai aole ka naau.
                3. Eia kekahi mea hou; ua hele kekahi poe naaupo mamuli o ka pope; aka, aole nui ia poe i auwana aku malaila. Aole kekahi o na mea naauao me lakou.
                4. Ua minamina hoi au i ka lohe ana, ua pilikia na kumu kamalii, aole i kokuaia mai lakou. Ua lohe au na ka lunaauhau ka hoopilikia aku; ua aua ia i ka waiwai pono ia lakou. Aloha ino lakou. Mamuli paha e hana pono ka lunaauhau e like me ke kanawai. Pau ia.
                Auhea oukou, e kuu mau hoalauna; pehea ko oukou noho ana?