Ka Nonanona, Volume II, Number 13, 22 November 1842 — Page 65

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." Solomona
Buke 2. HONOLULU, OAHU, NOVEMABA 22, 1842. Pepa 13

HE WAHI NINAU HOIKE
no ka aoao pope.
(E nana i ka aoao 57.)

                I. Heaha ka umikumamakolu o ke kuhihewa o ka poe pope?
                D. O ko lakou manao ana i ka lakou hana maikai, ua like ia me ke kumukuai e loaa mai ai ia lakou ke kalaia o ka hala, a me ka pomaikai. Nolaila, ua like ke Akua me ka mea aie i ka ke kanaka; a o kona kala ana i ka hewa, a me ka haawi ana i ola mau loa, oia ka mea hookaa ia aie.
                I. Pehea ka manao o ka poe hoolepope ma keia mea?
                D. Eia ko lakou manao; E ukuia mai no ka mea pono, "e like me kana hana ana." Rom. 2: 6. Aka, o ua uku la, aole ia he mea hookaa i ka aie; he mea ia i haawi wale ia mai ma ka lokomaikai wale o ke Akua.
                I. Pehea oe e hoakaka ai ia wahi?
                D. 1. Eia ka manao mua, O na hana pono a pau, ua ukuia mai no ka lokomaikai wale o ke Akua, aole me he aie la. "Nou no hoi, e ka Haku, ke aloha mai, no ka mea, ua uku mai oe i keia kanaka i kela kanaka, e like me kana hana." Hal. 62: 12.—"A ina ma ka lokomaikai, alaila, aole ma na hana. A i ole pela, alaila, o ka lokomaikai, aole ia he lokomaikai. Aka, ina ma na hana, aole ma ka lokomaikai; a i ole pela, alaila, o ka hana, aole ia he hana." Rom. 11: 6. "Aole no na hana pono a kakou i hana'i, aka, ma kona aloha wale, ua hoola oia ia kakou." Tit. 3: 5. "E hoomau i ka lana ana o ka manao, no ke alohaia mai i ka wa e hoikea mai ai o Iesu Kristo." Pet. I. 1: 13.
                2. O ke ola mau loa, he makana ia na ke Akua mai. "O ka makemake o ko oukou Makua e haawi i ke aupuni ia oukou." Luk. 12: 32. "O ka haawina o ke Akua, o ke ola mau loa ia." Rom. 6: 23. "No ka mea, e hoolaia oukou i ka lokomaikai ma ka manaoio; aole hoi no oukou iho keia; he mea haawiia mai ia e ke Akua; Aole no na hana ana, o kaena auanei kekahi." Ep. 2: 8, 9.
                3. O ka poe pono, ua aie lakou i ka ke Akua ma na mea a pau. O na mea pono a pau ia lakou, na ke Akua mai no ia. Nolaila, aole hiki ke hoolilo i ke Akua i na mea aie i ka lakou. "No ka mea, o kakou kana hana i hana'i ma o Kristo Iesu la, no na hana maikai a ke Akua i hoomakaukau e mai ai ia kakou, i haele kakou malaila." Ep. 2: 10. "Pela hoi oukou, aia pau i ka hanaia e oukou ka oukou mau mea a pau i kauohaia'i, e olelo oukou, He poe kauwa makou e waiwai ole aku ai, o ko makou pono wale no ka makou i hana'i." Luk. 17: 10. "Heaha hoi kau mea i haawi ole ia mai nau? A ina i haawi wale ia mai, no keaha la oe e kaena ai ia, me he mea la i haawi ole ia mai. I. Kor. 4: 7. "Aole hoi na oukou iho." Kr. I. 6: 19. "No ka mea, o ke Akua ka mea e hana ana iloko o oukou i ka makemake a me ka hana e like me kona manao." Piil. 2: 13.