Ka Nonanona, Volume II, Number 12, 8 November 1842 — Page 59

1842.) KA NONANONA. 59

E lohe ana i ka leo o ka luna, "e wiki e wawe e holo,"
Aloha ka wa hana ai o na haumana o ke Kulanui nei,
E lohe ana i ka leo o ka luna,
"Mai hanaino, mai ka pulu, mai kolohe!"
Aloha na hora kike o ka la,
No ka hana hekahi, no ke kulu kekahi; a me na mea e pono ai kekahi.
Aloha ka wa ai o na haumana o ke Kulanui nei,
Pau ka lohe ana i ke kani o na puna a me fora,
Pau ka noho ana maluna o ka papa aina.

KA NONANONA
Honolulu, Tusede, Nowemaba 8, 1842.

Ka Puali Inuwai ma Honolulu nei.

                I ka la 27 o Ok. nei halawai nui na kamalii o keia puali mai Maunalua a hiki i Moanalua, iloko o na hale pule elua ma Kawaiahao a me Kaumakapili, i ka hora 10: a makaukau, hele papalua ko luna poe me na lii nui a me na lii opiopio me na pahukani, ilalo i ka hale pule o Kamika; a piha kela hale i na kamalii. Aole akaka ka nui; ua kokoke nae paha 1400, a keu aku paha. Ua kahikoia na kamalii i ka lole maemae, a noho pono no hoi me na hae he lehulehu e lewalewa ana maluna.
                A maluhia ka hale, o ka pule ka hana mua; pule iho la o Limaikaika, a pau ia, himeni ka poe makaukau,
                "Aole au e imi rama
                Aole inu waina hoi," a pela aku.
alaila, hoike iki aku o Kamika i ke ano o na hae e lewalewa ana. He wahi apana lole ka hae, he keokeo kekahi, he ulaula kahi, me kekahi alelo pokole ano nui i paiia maluna iho, a ua kauia ma na ohe loihi. Maikai na hae, a eia hoi na olelo i paiia maluna iho.
                ALOHA KE LII.
                PUALI INU WAI.
                "HE ALA NUI HOU.
                E HELE AI KAKOU."
                POMAIKAI KA HANAUNA HOU.
                WAI WALE NO, NO MAKOU.
                E MALU KA AINA.
                E LANAKILA NO MAKOU, I OLE E MAKE.
                E PAU NA MEA ONA.
                WAI HUIHUI.
                MAI HOI HOPE KAKOU.
                E LANAKILA KA WAI.
                E KAAWALE KA WAI HEHENA.
                E MALU KA AINA.
                E HOOKANAKA KAKOU.
                E OLA KAUIKEAOULI INU WAI.
                HE MEA HAKAKA KA RAMA.
                HE MEA HOOPAILUA KA RAMA.
                MAI LAUNA ME KA POE KUAI RAMA.
                MAI LAUNA ME KA POE KUAI RAMA. KA HAE INU WAI.
                KAMEHAMEHA III., 1842.
                Pau ka Kamika, ku ae la ke Kuhina, a olelo penei, "auhea oukou e na keiki ua like ko'u manao me ka mea a oukou i lohe iho nei; he ino na mea ona; o ka wai wale no ka mea pono ke inu. Nolaila e ku paa kakou iloko o ka "puali inu wai." Pela ke ano o kana olelo, aole nae pau na hua ma keia pepa.
                Pau kana, ku mai o Kekuanaoa, a olelo hooikaika i na keiki e ku paa e like me ko lakou hoohiki ana; "mai lalau hou i na mea ona, wahi ana; mai hoi hope; mai hoopalaka ma keia hana." Pau kana, ku mai la kekahi haole, o Mi. Leslie, he kahuna pule ia no Oregona, a hoike aku i na kamalii, i ka hana ino a ka rama ma Oregona; Penei kana olelo.
                "No Oregona wau, ma kapa muliwai Kolumebia. Malaila he mau lahuikanaka nunui mamua, a me na'lii nui, a me ke kulanakauhale nui. Noho pomaikai iki lakou me ko lakou naaupo, a me ka hihiu.
                Aka hoi, komo malaila na haole, a me ka rama: aole misionari malaila, nana e ao aku ia lakou e haalele i kela enemi hooke wale. Komo ka rama, a hoolaha aku la i ka mai a me ka make. Hina na kanaka opiopio a me na koa imua ona a pio ia ia. Lanakila ia maluna o na'lii a me ka poe akamai o lakou. Nolaila ke waiho wale nei ko lakou aina maikai, a ua lilo i na haole ko lakou wahi lawaia.
                O oukou nei hoi, ua noho pomaikai, a me ka malu i keia wa, no ka mea, ua hoouna mai ke Akua i na kumu iwaena o oukou, a ua lohe na'lii a me na kanaka i kana olelo.
                Ke hai aku nei hoi au i kuu aloha a me ka mahalo malihini i ke alii, a me na'lii, a