Ka Nonanona, Volume II, Number 11, 25 October 1842 — Page 56

56 KA NONANONA. [OKATOBA,

o keia hana i kinohou, na pilikia aneane pono ole, a kanalua ka manao no ka hiki ole, ua laweia aku, ua pio koke ma ke kokua ana mai o ke alii naauao a me ka pono e manao nui ana i ka pono no kona poe kanaka.
                Malama paha he mea hiki ia makou ke kokua iki aku mamuli o na oihana e noho pono ai, a e holo ai hoi ka pono o ke Akua ma kou aina: ina pela, ea, e hai mai oe i kou makemake ia makou. Pomaikai makou, ke lawe oluolu oe i kau wahi mea uuku a makou e hooili aku nei nou; he hoailona ia o ko makou aloha, a me ko makou makemake e mau ke aloha aku a me ke aloha mai o kakou.
                E ae mai oe i ko makou manao mahalo oiaio, a me ko makou makemake maikai, e ola oe a me ka pomaikai, a e noho pomaikai kou poe kanaka.
                No ka poe kokua i na Luina ma Amerika.
EDWARD RICHARDSON,
Luna nui.

KA NONANONA.

Honolulu, Tusede, Okatoba 25, 1842.

KA HANA KEKEE MA HILO.

                Ua palapala mai kekahi kanaka ma Hilo i ka hana kekee a ka lunaauhau malaila. Ua lawe wale ka luna, wahi ana, i elua mau la o na makaainana no ka la paahao hookohi o ke alii, a ua ku e kana hana i ke Kanawai o ke aupuni. Ua hookapu wale no hoi i na waa ma kela wahi keia wahi; aole nae he waa kapu ma ke Kanawai. Ua hoolilo no hoi i ka hana aha i hana aupuni ka! Heaha la keia hana aha, he pulu niu paha, i mea koko paha? Aka, ea, aole hiki ia'u ke pai i ua palapala nei, no Hilo mai; no ka mea, aole kau ka inoa o ka mea nana i kakau.
                Auhea oukou, e ka poe kakau palapala e paiia ma ka Nonanona; eia ko'u manao hoakaka ia oukou; ina he olelo hoohewa i kekahi kanaka paha, i kekahi alii paha, kekahi luna paha, e kau i ka inoa o ka mea nana i kakau, alaila pono ia'u ke pai iho. Aole pono e pai i ka palapala hoohihia ia hai, me ka huna i ka inoa o ka mea nana e hoohewa ia ia.
                Auhea oukou e na kanaka ma Hilo? Pehea ko oukou lunaauhau? Ua kekee io anei kana ana? Ina i ike oukou ua ku e kana hana i ke Kanawai, e hoakaka mai, a e kau i ko oukou inoa ma ka palapala, a e pai no au. Pono e hahau a e kepa i ka poe hana kekee.

KA MAKE.

                I ka la 9 o Ok. nei make o Martha L. R. Locke ka wahine aloha a Mi. Loke ma Waialua; ua liuliu kona mai ana, a ua lapaauia no hoi, aole nae pono: paa ka manao o ke Akua e lawe aku e noho pu me ia. I kona wa pilikia i ka mai, aole kaumaha kona manao i ka make; moe malie wale no keia wahine aloha iloko o ka lima o kona Haku, e like me ke keiki iloko o ka lima o kona Makua, a make me ka oluolu.
                Hookahi manao kaumaha iki iloko ona, oia hoi no kana mau kaikamahine ekolu e noho nei, o hemahema lakou i ka makuwahine ole. Aloha ino lakou! aloha ino hoi ke kane! Ua kaumaha kona manao e noho nei, aole nae ino, no ka mea, na ke Akua i haawi mai a nana hoi i lawe aku, i kona kokolua a ua hemolele kana hana.

KA MOKU VICTO RIA.

                I ka la 19, o Ok. nei, Ku mai kela moku, a ua lawe mai ia Tatinawahine me kana mau keiki elua, a me Mi. Damona me kana wahine; he Kahuna pule keia na na luina a me na haole o Honolulu nei. Maikai ko lakou holo ana mai, aole wahi pilikia. Nani ka lokomaikai o ke Akua i kona hoihoi ana mai ia Tatinawahine i kana kane e noho mehameha nei, a me kona haawi ana mai i kumu no na haole e alakai ia lakou ma kahi o ke ola!

NA LIMAIKAIKA e hoopuka'ku.