Ka Nonanona, Volume II, Number 11, 25 ʻOkakopa 1842 — Page 55

1842.] KA NONANONA. 55

no kona make ana, a nolaila, ke hoouna aku nei makou ma kou pae aina, ia Rev. Samuela C. Damona, a me kana wahine maluna o ka moku Victoria, a ke noi aku nei makou e ae ia mai laua e noho ma kou Aupuni, e ka Moi, a me ka ae ia mai e hana me ke keakea ole ia kana oihana kahuna no na Luina, ma Honolulu kahi e hana nui ai.
                Ke noi aku nei makou i ka hoomalu oluolu ia mai e kou Aupuni nona, a no kona ohana, a ke olelo io aku nei ia oe i ko makou manao e malama oiaio oia i kou mau kanawai i ka wa e noho ai oia malalo iho o kou malu.
                Ke haawi aku nei makou ia ia nei nau e malama, e manaoio ana i kou oluolu a me kou kokua ana mai i ka oihana i manaoia he pono, a ua hoomahuahua aku i ka pono o ko ke ao nei e like me ka makemake o na kanaka haipule.
                Ha mea nui keia lala o ka hana missionari ma ko Hawaii pae aina. Ua akaka keia i ka mea ike i ka hana hewa ana a ka poe holo ma ka moana mamua aku nei.
                Ua kaawale lakou i na kanawai a me na hoalauna e kaohi ana ma ka pono ma ko lakou aina, nolaila, i kekahi manawa, o ka lakou hana ana, he mea ia e hoowahawahaia'i ko lakou lahuikanaka, a e hoinoia'i hoi ka pono o ke Akua a na missionari no ua mau aina la, e hoolaha nei. No ka holo ana o keia hana ma na aina e aku, ke manao nei makou, o ke kukulu ana i ka hale pule pono, a me ka hoonoho ana i kahuna pule no na Luina me kana hana pono aku ia lakou, he mea ia e pau ai keia haunaele ana ma keia hope aku; a e lilo ai hoi ko lakou launa ana me kou poe kanaka i mea e pono ai.
                Ke ake nui nei makou e hooikaika pu me oe a me kou poe alii e hoolaha i ka noho maluhia, a me ka inu ole i na mea ona, a me ka pono o ke Akua no hoi, iloko o kou mau kulanakauhale, a me kahi e ku ai na moku, a i waena hoi o ka poe i holo ilaila no na aina e.
                I ko makou hoouna ana'ku i keia missionari i kou aina e hai aku i ka euanelio i na Luina, aole o makou imi i na mea o keia ao, aole hoi i ka waiwai; o ko hai pono, oia ka makou e imi nei, a ke hai aku nei makou ia oe i ko makou aloha no ko oukou kokua ana i keia mea, o oe a me ou mau alii.
                O ka nui o keia haunaele, a o keia haunaele a pau loa paha, no na mea ona no ia.
                No ka mea, i ka wa inu ole a ona ole hoi, aole paha lahuikanaka i oi aku i na Luina i ka hoomaopopo i ka pono, a me ka ae aku i na mea i kauohaia mai no ka poe noho pono a me ka malu.
                He mea kaumaha ke keakea ana o kekahi lahuikanaka me kona ikaika a me ka olelo, i kau hana aloha e hoopau ai i ke puhi rama, a me ka hoopae ana i ka rama ma kou pae aina. Ke manao nei makou ma kou manao oluolu a me kou kokua ana mai e hiki i ko makou missionari ke hana nui i na hana e pau ai keia mea; a e hookuke mai waena aku o oukou, i keia kumu nui no ka haunaele a me ka hoopaapaa, no ka ilihune a me ka mai, a o keia alakai nui hoi no ka naauao a me ka pono.
                Ua pololei a me ka hoomau ka hana a ko makou poe missionari, aka hoi, ua ike makou, o ka hua maikai o ko lakou hooikaika ana, no kou manao oluolu i ka lakou hana no, a me ke kokua pono ana au a me kou poe alii, oia kekahi mea nui e pono ai ka lakou hana. O na pilikia nui loa