Ka Nonanona, Volume II, Number 11, 25 October 1842 — Page 54

54 KA NONANONA. [OKATOBA,

                43. "Olelo Iesu i ka powa mihi, "I keia la o oe pu kekahi me au iloko o ka paredaiso." Ua hoole keia mau olelo ia wahi hoomaemae.
                I. No keaha i kapaia'i ia manao o ka poe pope, he ino a he lapuwale?
                D. 1. No ka mea, aole i hoikeia mai ia manao ma ka palapala hemolele.
                2. Ua hoikeia mai ke koko o Iesu, he mea mana ia e hoopau i ka hewa.

(Aole i pau.)

Lahainaluna Ok 16, 1842.

NO NA DALA MANAWALEA A KO AMERIKA POE I POHO MA KE KULANUI NEI.

                Aloha oe e ka Nonanona, ka mea hoike i na pilikia o Hawaii nei, a me na waiwai poho.
                He nui na dala o ko Amerika poe i poho ma ke Kulanui nei; eia ke kumu o ka poho aha, o ka lilo ana o kekahi poe no ke Kulanui nei ma ka aoao kahiko o Hawaii nei; i ka moe kolohe, a me kela hana ino, keia hana ino, pelapela loa. Ua haule aku kekahi mau haumana a makou no keia mau hewa, a ua like lakou me ka poe make.
                O kekahi poe hoi i aoia maanei a hoi iwaho, ua lilo i ka hewa a me ka lapuwale. Kainoa e hoi aku lakou e hoike aku i ka pono i loaa ia lakou ma ke kula nei; e hoolaha i ka ike, i ka naauao, i kela hana pono, keia hana pono; a e hoomaikai i ko Hawaii nei. Ina pela, pono loa; make pono ko Amerika dala i lilo mai maanei; eia ka! Ua hoi lakou iwaho e hana ino wale. Pela kekahi poe i hanau aku mailoko ae o keia makuawhine maemae. Nolaila kekahi poho nui.
                A o kekahi poe, aole lilo i ka hana kolohe; aka, ua lilo i ka palaualelo, a me ka puniwaiwai. Nolaila lilo ko lakou ike i mea ole; aole lakou i hapai i na hana maikai a e hooikaika malaila. Aloha ino ke dala poho o Amerika! Pehea la e pau ai keia pilikia nui no ke Kulanui nei?
NAOKA.

                E Naoka, auhea oe; Ua loaa ia'u ka mea e pau ai keia pilikia au i hoakaka mai ai. Eia no ka mea e pau ai, "e huli a loaa ia oukou a pau e noho nei iloko o ke Kulanui keia mau mea elua," o ka ike nui, a me ka pono oiaio. E nana ia Iosepa, ia Mose, ia Daniela, ia Davida, ia Wasetona, ia Kuro, ia Solomona; Heaha la ko lakou mea e kaulana'i? Hoaha ko lakou mea i mahalo mau loa ia ai? Eia wale no o ka ike a me ka pono. He nui ka ike, a he nui ka pono. Ina i loaa ia oukou keia mau waiwai elua, o ka pau no ia o ka pilikia. Ina he kanaka ike me ka loaa ole o ka pono, aole hiki ia: a ina hoi he kanaka pono me ka ike ole, he hewa ia. Aia hui keia mau mea elua iloko o ke kanaka, oia ke kanaka makaukau.
                O ka ike, aia no ia iloko o na palapala a me ka noonoo; aka, o ka pono, mai ke Akua mai ia a malaila no e imi ai.

E ka Moi Kamehameha III.
Ke Lii o ko Hawaii Pae Aina.

                Me ke aloha nui a me ka launa makou e palapala nei ia oe e Moi.
                E pono ke minamina oe a me makou pu i ka make ana o ka makou Kahuna no na Luina, o Rev. John Diell—o ka mea nana i hana pu me na missionari e ae i na hana, a nolaila, ua oi aku ka noho ana o kou mau kanaka ma na mea o ka uhane, a me ke kino, a me ka noho maoli ana.
                No ko makou manao ana i ka holo lea ana o kana hana, oia ka mea e maopopo ai ka pono no makou ke hoomau aku i ka oihana nui ana i hana ai a make, nolaila, ua paa ko makou manao e pani i ka hakahaka