Ka Nonanona, Volume II, Number 10, 11 October 1842 — Page 45

KA NONANONA.
"E ka mea hiamoe, e hele oe i ka nonanona, e nana i kona aoao a o hoonaauao iho." Solomona.
Buke 2. HONOLULU, OAHU, OKATOBA 11, 1842. Pepa 10

KA POE KALAWINA.

                Auhea oe e Limaikaika. He wahi mea ninau ko'u ia oe. I kuu hele ana i Oahu, i kela makahiki, i lohe au i ka poe pope malaila e kapa pinepine ana i na misionari, mai Amerika mai, he poe Kalawina. Ninau au i ke ano o ia hana ana. I mai lakou, o Kalawina ke kumu nana mai ka kakou pule.
                Eia kahi mea hoakaka.—
                1. He kanaha a keu ko'u mau makahiki, aole au i heluhelu i kekahi palapala a Kalawina. Ua lohe nae au ia ia, he kanaka haipule ia a me ke akamai i ka hoakaka i ka ke Akua olelo; aka, o kahi mea ana i kakau ai, aole au i heluhelu.
                2. Eia kahi; 920 buke ma kuu hale palapala; kakauia kekahi e ko Amerika poe, kekahi e ko Beritania, e ko Farani a me ko Geremania; aka, aole kekahi buke a Kalawina i kakau ai maloko o keia mau buke a pau 920.
                3. Manao au, pela kakou a pau. Kakaikahi paha ke kumu, mai Amerika mai, i lawe mai i kahi buke a Kalawina. Ua paiia no kana mau buke ma Europa, ma Amerika paha, aka, he kakaikahi loa kuu ike ana ia mau buke, ia oukou, ma Hawaii nei.
                4. Auhea kahi palapala a Kalawina i hooliloia i olelo Hawaii a hoolahaia e kakou? Ua hoolilo kakou i ka ke Akua olelo i olelo Hawaii, a ua hoolaha aku no hoi; aka, aole paha kahi olelo a Kalawina, ea.
                5. Owai ko kakou mea i hai aku i ka inoa o Kalawina a lohe ko Hawaii nei?
                Haohao au ia olelo a na kumu Farani. A nolaila, eia kuu mea ninau aku ia oe, e Limaikaika, e hai mai oe; mahea ko kakou pili ana ia Kalawina? Ua manao anei kekahi, o Kalawina ka mea mua i hoole i ka pope? Aole loa. Mai ka wa i kukuluia'i ka pope mua, i ka makahiki 606, he nui ka poe hoole ia ia. Mai ka makahiki 1100, a mahope mai, aole e pau i ka heluia ka poe i pepehi wale ia, no ko lakou hoole i ka pope. He hope loa mai Kalawina.
                Eia paha ka mea i kapa mai ai lakou ia kakou, he poe Kalawina; i like pu kakou me lakou la, he kanaka ke poo ekalesia no kakou.
                Eia paha kahi manao; ina Kalawina ko kakou haku, e manaoia kakou, he poe uuku. Ina paha malama oe i na kanawai o Kauikeaouli, aole anei Kauikeaouli kou alii?
                Ina malama kakou i na kanawai o Iehova, aole anei kakou ko Iehova poe? O ka ekalesia hahai i ka olelo hemolele a Iesu, aole anei o Iesu ke poo o ia ekalesia? He akaka loa ia; a, nolaila, heaha la ke ano o keia hoopohihihi ana a ka poe pope? Na BALUINA.
Lahaina, Sep. 23 1842.

HE WAHI NINAUHOIKE
no ka aoao pope.
(E nana i ka aoao 27.)

                Ioane. Heaha ka iwa o ke kuhihewa o ka poe pope?
                Daniela. O ko lakou manao ana