Ka Nonanona, Volume II, Number 9, 27 September 1842 — Page 43

1842. KA NONANONA. 43

holoholona maluna o ka aina, he waiwai no ko ke alii ma na holoholona, a me makou, aole makou e hoole i ke dala a ke alii ma ke kino, aka, o ko makou mau lima, aole e hana aku i na la paahao, a me ko ke konohiki, hoolilo makou ia makou i kuewa, o ka manao nui no ia o na kanaka o Waimea nei.
                Auhea oukou, e na kanaka o Waimea: Ua hoike aku au i ka oukou palapala i na'lii, a i mai la o Kuakini, no oukou ka ka hewa! aole oukou i hana i ko oukou mau la i paa ka pa o ka aina. Ua kokua ke lii nui a me ke Kiaaina, a no na makaainana ka molowa, a nolaila paa ole ka pa. Pela kana.
                Eia kekahi; aole pono e hooluhi i na kanaka o Kohala i kela hana; he aina okoa o Kohala. Pela mai ke Kiaaina.
                Eia no nae ko'u manao ia oukou; i hemo ole ko oukou pilikia, e hoopii i ka ahaolelo o na lii i ka malama o Aperila, 1843. Malaila paha e pono ai.
                Eia hoi kekahi pono, e alu oukou a e hana me ka ikaika loa a paa ka pa. Ina ikaika oukou, ea, alaila kokua hou na'lii, a o ka paa no ia o ka pa. NONANONA.

KA NONANONA.
Honolulu, Tusede, Sep. 27, 1832.

                I ka la 21 o Sep. nei ku mai ke Kialua, o ''Sara Abigal" ka inoa, me kekahi mau misionari hou mai Amerika mai. Eia ka lakou mau inoa o G. B. Rowela (kahuna pule) me kana wahine, a o J. W. Kamika (kahuna lapaau) me kana wahine. He maikai wale no ko lakou holo ana ma ka moana; aole i loaa ia lakou kekahi pilikia a hiki wale mai maanei. Nani ka lokomaikai o ke Akua ia lakou a me kakou hoi! Ua halihali mai oia i keia mau kumu hou maanei e kokua i na hana maikai, i ola pomaikai na kanaka o Hawaii nei. Pinepine kona kokua ana mai pela, i keia mau makahiki i hala ae nei, no ka mea, he nui kona aloha i na uhane auwana ma keia pae aina. E hoomaikai aku kakou ia ia, a e malama i ke ola nui ana i hoike mai ai ma kana keiki aloha.
                E na kanaka o Hawaii nei, e nana oukou i keia hana lokomaikai a ke Akua ia oukou. He nui hoi ke aloha o na hoahanau ma Amerika ia oukou. Pau ole ko lakou aloha; iini maoli ko lakou naau, e ola oukou. Nolaila haawi wale lakou i ka waiwai i loaa ia lakou ma ka luhi e kokua i na kumu nana e ao ia oukou. A pehea oukou? Aole anei nui ko oukou aie? Pehea la e kaa ai?--penei, e huli nui i ke Akua a e malama i kana mau kauoha. E haalele i ka hewa, a e hapai i na hana pono a pau; oia ka mea e olioli ai ka naau o na hoahanau ma Amerika a me ka naau o ka Haku kekahi. Pela no e kaa ai ka oukou aie.
                Eia kekahi: i ka la 9 o Aug. haalele keia moku ia Valeperaiso, e ku ana malaila ka Victoria me Mi. Tainawahine a me kana mau keiki elua; aole akaka ka holo pololei mai maanei; holo mua paha i Komelewa, e hoolei i ka ukana a me ka poe e holo ana ilaila, alaila holo mai ia nei.

Ke dala pepa ma Kauai.

                Ke lohe nei makou, ua pau ka hoole ana o na kanaka ma Kauai i ke dala pepa. Ua noonoo hou lakou a ua makemake hou.

                Ka pilikia o na kanaka lawelawe i ka moku ili ma Waimea Kauai.
                Ua pau kela pilikia: ua pau na kanaka i ka ukuia, e like me ka olelo, a ua maemae na'lii o Kauai malaila.
Pela mai o T. MANONO.

He manao maikai.

                I mai kekahi kanaka ma Hawaii, "he nui paha ka poe imi ikaika e wehe i kela ninau no ke kanaka mea kao a me ka ilio a me ke kakipi, i mea e hiki aku ai ma kela kapa o ka muliwai; aole nae lakou e imi i mea e pae aku ai ko lakou uhane ma kela kapa o ka muliwai o Ioredane. Oia ka pilikia nui? Pehea la kakou e komo ai iloko o Kanaana? Pomaikai ka poe ike a hana no hoi." He wahi manao maikai keia.

                O ka mea hoike wahahee, e make no ia; o ke kanaka hoolohe, oia ke olelo oiaio.
                Aohe akamai, aohe noonoo, aohe hoi oleloao e hiki ai ke ku e aku ia Iehova.