Ka Nonanona, Volume II, Number 9, 27 September 1842 — Page 41

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." Solomona.
Buke 2. HONOLULU, OAHU, SEPATEMABA 27, 1842. Pepa 9.

NO KA MOE KOLOHE.

                Ma ka Nonanona, pepa 4, aoao 14, ua hoakakaia kekahi mau mea a oukou e hana'i, i pakele oukou i ka moe kolohe. Aole nae i pau malaila. Ke hai hou aku nei au i kekahi mau mea e pono ai oukou ke malama.
                4. Eia keia; E imi pono i ke kapa maikai no ko oukou kino.
                Elua hewa i ikeia ma keia pae aina. O ka hoohanohano ana i ke kino, a o ka noho ana me ke kapa uuku.
                Pehea ka mua o keia mau mea e hihia ai na kanaka? He hewa kahiko ia. Ua heluhelu kakou ma Solomona 7: 10, menei, "Halawai pu me ia kekahi wahine, ua kahiko hookamakama ia."
                Pela i keia manawa ma kekahi mau aina. Pehea maanei ma keia pae aina? Aole anei i kahiko kekahi poe no keia mea? Aole anei i komo kekahi poe i ke kapa maikai i hiki ia lakou ke hoowalewale aku ia hai? Pehea ka lei, aole anei ia he mea e hihia ai? Aole anei i hookiekie kekahi poe wahine i ko lakou mau poo i mea hoowalewale i na kane? Ina pela ka oukou hana, e ka poe heluhelu i keia pepa, ua oki oukou. Mai hana hou pela. Ua haawi ke Akua i ke kapa i mea e pono ai ke kino, i mea e oluolu ai. Aole ona makemake e hoolilo kanaka i kona makana maikai i mea e hihia ai. Mai komo i ke kapa no ka lealea, no ka makemake e howalewale aku ia hai. Mai nana hoi i ke kapa o ka wahine, a o ke kane paha me ke kuko wale aku i ua wahine nei. E malama oukou ia oukou iho malaila o hihia auanei.
                Eia kekahi. Mai noho oukou a komo ole iloko o ke kapa.
                I ka wa i hana ke Akua i ke kanaka ma kona ano iho, ua hiki no ia ia ke hele me ke kapa ole, aole hemahema, aole mea e hihia ai, no ka mea, aole komo ka hewa ia manawa, iloko ke ao nei. Penei ka olelo, Kinohi 2:25, "Aole kapa o laua a elua o ke kane a me kana wahine, aole hoi o laua hilahila." Aka, i ko laila haalele ana i ke Akua, a lilo i ka hewa, ua loaa koke ia laua ka hilahila, alaila pee iho la laua. No ia mea, ua olelo ia, Kinohi 3: 21, "Hana iho la o Iehova ke Akua i na kapa ili no Adamu a no kana wahine, a hoaahu iho la ia laua." Pela ko ke Akua makemake i na kane a me na wahine a pau, ma na aina a pau loa. I komo na kane a me na wahine i ke kapa i uhiia kahi huna, a me ka umauma, a me na uha a me na wawae, oia ka pono; oia kekahi mea e hiki ai ke pale aku i ke kuko, a me ka hoowalewale ia mai. Ke manao nei au, ua hihia pinepine na kanaka i ka hiku o ko ke Akua kanawai, no ka hele ana o na kane a me na wahine me ke kapa ole, a ike ia ko lakou wahi huna, a ikeia ka umauma o ka wahine a me kona uha! Pehea keia? Aole anei e pono oukou e hana me na lima ikaika, a me ka palaka ole, i loaa ia oukou ke kapa maikai, i ole e hele wale, a noho me ke kapa uuku? Ahea pau ka moe kolohe, ke noho oukou