Ka Nonanona, Volume II, Number 8, 13 September 1842 — Page 40

40 KA NONANONA. [SEPATEMABA,

ia, aole anei oe e haalele? ae maoli no ia "e haalele no au, aole au e hana hou ma ia hana." O kona wahahee ana no ia, no ka mea, aole ia i noho a haalele iki i ka ka pope. Ke kupaa nei nae laua ma ka oihana a laua i kapa ai he ino, aole pono. Nolaila, ua maopopo loa no ka hewa o ko laua lilo ana mamuli o ka ka pope, aole no ko laua manao ana he pono.
                Eia no hoi kekahi mea kupanaha o ko Molokai nei poe pope. O ka hoomalu ole ma ke kanawai o ka aina. Ma ka hoomanawanui wale no o na luna ka hele o ka lakou poe kamalii i ke kula, aole loa lakou i ae oluolu aku i ke kanawai kula. A ke hoole nei no hoi lakou, aole makemake e hana i ka hana o ke aupuni.
                Eia kekahi, he mea kupanaha ka huli ole ana o na kanaka noho malia ma ia aoao; aole i huli ma ka pope na mea ike pono i ka heluhelu, ka poe naauao, ka poe noonoo, ka poe koikoi; aka o ka poe naaupo, ka poe makemake i ka lealea ka poe paakiki hoomaloka, a me na kamalii uuku ka i makemake e hele ole i ke kula. O ko nei poe makau i ka hewa, mihi, kuoo, haipule, aole o lakou mea lilo ma kela aoao.
                Eia hoi kekahi. Ua hiki mai ia nei kahi kahuna pope. Aole nui ka makemake o na kanaka ia ia. Eia kona mea kupanaha, o kona hoole ana, aole ona hoomana i ke kii, aole ona pule ia Maria a ia mea make ae ia mea make ae. Akahi a lohe makou i ke kahuna pope pule ole ia Maria. Pela anei na kahuna pope ma Honolulu? Malama paha ua ane huli i ka pono ua kahuna nei, ua haalele ka ia i ka pule ana ia Maria, a me ka hoomana ana i na kii. Ina paha e haalele kekahi haumana pope i ka pule ia Maria, oluolu anei na Kahuna pope?
                He manao ninau kekahi? Pehea ka olelo kuikahi a Kauikeaouli laua me L. Place? Ua ae ia anei e ke alii o Farani! Nau na ka Nonanona e hai mai. No ka mea, aole i maopopo ia'u. Ua lohe pinepine au i ka olelo a ka poe pope. "Ua hai ke kuikahi.,"

HE KUHIHEWA.

                Auhea oukou e na kumu Keristiano. Ua Heluhelu iho nei au i kekahi palapala i paiia e kekahi kahuna pope, a i kuu noonoo ana, ua kuhihewa loa oia; no ka mea, ua kapa aku oia ia oukou, he poe kumu Kalawina!
                I kuu lohe ana i ka oukou hoike ana i ka Euanelio, i keia mau makahiki i hala iho nei, aole au i lohe i ka inoa o Kalawina; o Iesu Kristo, oia ka inoa i hoike pinepineia mai ia makou; oia hookahi no ke Kalahala. Aole oukou i hoike mai, "no Kalawina makou." Owai la o Kalawina? He akua nei? Kainoa, o Iesu Kristo, oia ka oukou kumu, a me ka oukou mea e hilinai aku ai. A ua kapaia oukou, he mau kumu Kristiano.
                Eia ka! ma ke kanaka oukou e hahai ai! No ka naaupo paha, keia hoino ana ia oukou, a no ke kuhihewa. Aloha ino lakou, ka poe huhihewa! He mau makapo lakou, e alakai ana i na makapo. No ke aha la, e haalele ole ai lakou i kela ekalesia hewa; e hoohioloia e ke Akua mana? E na kahuna pope, e mihi oukou, a e manaoio ia Iesu, (aole ia Maria) i Ola oukou. Ua pau. Na'u na, ALOHA.

NA LIMAIKAIKA e hoopuka'ku.