Ka Nonanona, Volume II, Number 8, 13 September 1842 — Page 39

1842 KA NONANONA. 39

aole loa no. Aole pela o Petero, aole pela o Paulo. He hookiekie io no ua kumu la, kuhi paha oia e nalo kana hana ma Niihau e kokua ana i ka wahine moe kolohe. Ma kona manao paha he pelu wale ke kuaaina, he ike ole ka Nonanona. Ua pono kau. Mai hele aku oe i kona wahi e hookolokolo ia e ia. Ina he pono ole kau hoahewa ana ia Hueia, e hiki no ia ia e hoopii i na'lii. Aka, i ka hoopii i na kumu pope, aole; he kupaianaha ia he mea ku ole i ke kanawai o ka aina. Ua lohe au o kela wahine moe kolohe o Hueia he kaikamahine ia na Kahuaunioluolu ka wahine punahele o ua kumu pope la; he aloha paha: aka, ea, e nana'ku kaua i keia hana hooke a na haole, mai huna kaua. Ina no i na'lii ko lakou manao i keia hana. Na'u wale no keia.
Na ka NONANONA.

NA MEA KUPANAHA O KA POE POPE MA MOLOKAI.

                Auhea oe e ka Nonanona. Ke hai aku nei au ia oe i kekahi mau mea kupanaha a ka poe pope o Molokai nei.
                Eia ka mua. O ka makemake i ka hewa ka mea i laha mai ai ka oihana pope manei, aole ka makemake i ka pono. Eia ka mea e maopopo ai. Ua haalele iho nei ka pope wahine nana i lawe mua mai ai ia oihana mai Honolulu mai. Menei kana olelo, "Hele au i Honolulu a lohe au i ke kumu Falani. A i ko'u lohe ana he aoao oluolu ko lakou la, aole hoi he mea kapu ka puhi baka, ka inu rama, ka hana lealea, makemake aku au, a hele koke iho la mamuli o ka pope." A hoi mai la ua wahine pope la i Kalaupapa, halawai ia me kekahi makamaka ona. Hai aku la ia ia i ke ano o ka aoao pope. A lohe kela, aole kapu ka puhi baka i ka oihana pope, aole hoi he kapu loa ka inu rama, a me ka hana lealea, lilo koke ae la ia i haumana pope. A ma ia hope mai, hana hewa ua mau wahine la me ka makau ole no; no ka mea, ma kela aoao, aole he mea e haule ai ka ona, ka moe kolohe, ka lealea. Pela laua i noho ai a hiki i keia makahiki i ka malama o Iulai paha, alaila hoike mai la ke Akua ia laua i ko laua hewa, a ike laua ua hewa loa ka laua hana ana. Haalele loa laua i ka pope. A ke noho mihi nei laua i ko laua hewa. Hai maoli mai laua, aole laua i lilo i ka ka pope no ko laua manao ana he aoao pono ia, no ke kapu ole o ka hewa no, nolaila laua i huli malaila. Nolaila ea, ua akaka loa, o ka makemake i ka hewa ke kumu i hoolahaia mai ka aoao pope ma Molokai, aole o ka makemake i ka pono maoli.
                Eia hoi kekahi. He mea kupanaha ke ano o ke kumu pope ia ia ka hana ma Kalaupapa. He kanaka hooikaika ia, a hiki kona wa i molowa ai i ke komo ole i ka ekalesia, hoohuakeeo ae la ia a lilo i ka pope. Ke kumu nui no ia o ka poe pope malaila. He kumu naaupo loa ia, aole oia i ike i ka heluhelu pono, aole i ike i ke kakau lima, aole ike i ka helu.
                Eia no hoi kekahi. Mahope o kona huli ana i ka pope, a me kana wahine, halawai kekahi mau hoahanau me laua, a hookolokolo ia laua i ko laua haalele ana i kahi a laua i imi ai mamua. Ninauia ae la laua he pono anei keia aoao hou a olua e malama nei? Hoole kana wahine, aole pono, ua hewa no. Ninau hou