Ka Nonanona, Volume II, Number 7, 30 August 1842 — Page 32

32 KA NONANONA. [AUGATE,

ma ka moena. I mai la ke kahuna pope i ka lunaauhau, "I hele mai nei au e kamailio pu me oe no ka ai o ka makou haumana." I aku la o Pipi, "ina hoi aole e hoouna mau ka makua i kana keiki i ke kula, e hooukuia kona aina."
                Ku mai la ke kahuna pope me ka leo nui; me ka puupuu o kona lima i ka maka o Pipi, i ae la, "Pono ole ke Kalawina! pono ole ke Kalawina, hoino i ka makou haumana." I aku la ka lunaauhau ia ia, e noho ilalo oia, me ka leo oluolu. Olelo ke kahuna pope, "ua loaa mai ia'u ka palapala na Kuakini mai e kuikahi ke aupuni."
                I ae la ka lunaauhau, "nau no ia palapala, aole na'u, no ka mea, aole ko'u inoa maloko." Alaila ku mai la ka pope me kona huhu nui, i mai la, "he kumu nui au, i hoouna ia mai nei au e ke Alii, he kumu wau ma Kau nei: Aole pono ke Kalawina." Alaila noho iho la ia ilalo i aku la i ka lunaauhau. "No keaha kou oki ana i ka aina o na makua mea keiki?"
                I aku la ka lunakanawai. "Aole na'u, na ke kanawai no." Ku hou mai la ke kahuna pope me ka leo nui me ka huhu loa ke ano, olelo ae la, "Aole pono oe e na lunaauhau, ke hoole i ka palapala a Kuakini, no ka mea, owau no ke kumu nui ma Kau nei, pela mai o Kuakini, owau no ke kumu nui, pela mai Kamehameha III. Hewa loa oe e na lunaauhau hoole i ka palapala a Kawaikini a Kawaikini, pau aku la kou noho luna ana." A no ka huhu loa aole i maopopo na hua olelo o ka inoa o Kuakini i kona waha. Waikine, Paikini a pela aku kana olelo.
                Ike o Pipi i ka pono ole no ka huhu loa o ua pope la ku mai la oia a hookuke mai la ia ia me kona lima e hemo iwaho. Alaila olelo mai la kekahi haumana pope, no Kapalilua no Hoopuloa, o Mahi kona inoa, i mai la, "he lima ikaika mai la oe i ke kahuna a ke Alii i hoonoho mai ai maluna o ka aina. Pau aku la kou noho luna ana, ke ike aku la au, ke lima ikaika mai la oe i ke kahuna a ke Alii."
                I aku la o Pipi, "No ka mea, ua hoopunipuni mai olua ia'u i keia palapala, Owai ka mea hoike?" I mai la ke kanaka, "o maua no ka mea hoike," I aku la o Pipi, "no keaha la oe i huna ai, aole ou hai mua mai ia'u."
                Hoi aku la lakou me ka huhu loa a me ka hooino i na Kalawina, Pela ko'u ike ana'ku i na kumu pope a me na haumana pope ma Kau nei. Hookiekie loa ke ano o ka noho ana mai. Hookano; kapa lakou na Kauikeaouli ko lakou noho ana mai, i kuhi na kanaka ua makemake ke Alii nui ia lakou. Aole pela ka makou kumu i hookiekie ai a kaena ai, a hoopunipuni ai. Ma Waiohinu nei ma Kau keia mau mea i hana ia ma ka malama o Aperila, 1842.
                Eia hoi kekahi mea au i ike ai o ka hoowalewale ana o na pope i na kamalii ike o ka makou kula a bapetemaia, aole lakou i hoi mai i ke kula, nui na keiki a lakou i hoowalewale pela, a ua haalele loa lakou i na kula, nolaila ua haunaele makou nei. Ke ninau aku nei au ia oe e ka Nonanona, Aole anei kela he aihue? Mamuli pono ole keia aupuni.
                Na KEMA MAMAKELUA, ke kumu kula ma Waiohinu.

NA LIMAIKAIKA e hoopuka'ku.