Ka Nonanona, Volume II, Number 7, 30 August 1842 — Page 28
28 KA NONANONA. [AUGATE,
na kanaka Farani ma keia pae aina." Pela wale no ke ano o ka olelo, a pau wale. Ua kiia ke alii nui, a hiki mai, ahaolelo me ke alii manuwa, alaila maopopo ka hana.
Eia kekahi, Ua lawe na alii o Farani i kela pae aina i kapaia o Nuuhiwa; ua hoonohoia malaila 500 koa, a me kekahi mau manuwa. Ke olelo mai nei o Kap. Mallet, e holo pinepine mai ana na manuwa Farani i Hawaii nei ma neia hope aku.
HE WAHI NINAU HOIKE NO KA AOAO POPE.
(E nana i ka aoao 24.)
Akaka loa ko lakou wahahee ana ma keia mau mea; no ka mea, i hele oe ma kahi luakini pope ma Roma, e ike oe malaila i kekahi iwi poo, i kapaia ko Petero. I hele hou aku oe i kahi luakini o Sepania, e ike oe malaila i ka iwi poo o Petero; a hele hou aku ma kahi luaikini o Farani, a ike hou oe i ka iwi poo o Petero malaila. Ehia iwi poo o Petero ma na aina pope e aku? Aole paha kakou i lohe. Kupanaha! He lehulehu na poo o Petero; aole like me kakou a pau, pakahi ke poo. Pela no na wawae o ka hoki i holo ai Iesu iloko o Ierusalema; aole pau i ka heluia na wawae hoki i hoikeia e ka poe pope, a kapaia keia wawae kela wawae, he wawae ponoi no ua hoki hookahi la a Iesu i holo ai. Ua loaa ma na luakini pope ma Farani a me Sepania ewalu lima o Mataio, a me kona mau manamana lima he nui loa, no ka mea, kanaha manamana ma na lima ewalu. Ua oleloia, ina hoouluuluia, ma kahi hookahi, na apana a pau o ke kea o Iesu i hoikeia ma na luakini pope, e piha na moku he nui loa. Ua hoikeia, ma Roma, ka papaaina i ai pu ai Iesu i ka pasoa me kana mau haumana, he papaaina okoa, aole i nahaha; aka, ua hoikeia na apana o ua papaaina hookahi nei, ma ia wahi aku ia wahi aku o na aina pope. Pela na mea e, he tausani, a miliona aku paha.
He akaka loa ko lakou wahahee ana ma keia mau mea; aka, olelo ka poe pope, ua pono keia mau wahahee, no ka mea, he mau mea ia e olioli ai kanaka i ka pule pope.
3. O ka hoomanakii. Eia ka mea e akaka ai ko lakou hoomanakii; o ka lakou pule ana i na haipule make, o ka hoomana i ka mesa, (berena ahaaina) a me na kii i penaia, a me na mea liilii i kapaia he koena o ka poe haipule a me ka wa kahiko. Hoomana lakou ia mau mea, aole i ka wa maikai wale no, aka, i ka wa lilo i mea pilau, a lilo i lehu, paapu i na ilo. I mai o Henere, kahi kumu a lakou, "Ina lilo ia mau mea i lepo, a lehu paha, pono e hoomana; aka, i lilo i ilo, aole pono e hoomana aku i ka ilo." Hoole loa aku la o Vaseke, kahi kumu nui a lakou, ia manao o Henere me he manao lapuwale la; a eia ko Vaseke manao, "Ua pono no e hoomana i ka wa ilo; like pu ka pono me ka hoomana i ka wa lehu wale no."
Hoomana no ka poe pope i na anela, a me na kii pena, a me na mea make, a me ka mesa a me na mea e; aka, o ka hoomana ia Maria ka i oi loa aku. Elua tausani makahiki ka palaho ana o kona kino, a ua hala kona uhane i kela ao; aole e lohe i ka pule ma ka honua nei; aka, pule mau aku no lakou ia ia.
4. O ka aoao pope he aoao e make mau loa ai ia. No ka mea, ua hoopau lakou i kumu paa o ka euanelio. I ko lakou kapa ana i ka berena o ka Mesa o ke kino io maoli o Iesu, hoolilo lakou i keia ahaaina