Ka Nonanona, Volume II, Number 7, 30 August 1842 — Page 25

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." Solomona.
Buke 2. HONOLULU, OAHU, AUGATE 30, 1842. Pepa 7.

KA LUNAAUHAU MA MOLOAA, KAUAI.

                Ma ka Nonanona 19 o kela makahiki ua hoakakaia ka hana kekee a Kauakahi ma Moloaa. Eia kona hewa, o ka hooluhi wale i na kanaka o ka aina e halihali i ke kukui auhau i Koloa. Eha o ko lakou la i poho malaila. Eia no nae kana olelo hoole i kona hewa.

MALOAA, Aperila 6, 1842.
                Auhea oe e Limaikaika, i kou ike ana i kela olelo e haawi aku oe i ka Nonanona, nana no ia e olelo kino ole aku a me ka waha ole, i o'u mau hoalauna ma Koolau nei. A penei no hoi au e hoakaka aku ai, no ka mea, ua kauohaia. I ka malama o Novemaba i ka la paahao mua, olelo aku la au i na konohiki a me na makaainana o Koolau, "o ka poalima ea, aole a kakou hana ia la e like me ke kanawai auhau 3, aoao 22, pela ka'u i olelo ai ia lakou. O ka poe i loaa ke dala ma Moloaa e hookupu ai, a o ka mea dala kukui, ma Kahulihuli ke ala e hele ai ma Koloa e hookupu ai, e like me ke kanawai auhau o ka aina i ka makahiki 1841, aoao 69, pauku 7. A hiki i ua poalima nei hele mai la na konohiki i makaukau i ke dala me na makaainana o kona aina iho. O kekahi mau konohiki hele mai me na dala 2, o kekahi mau konohiki aole i hele mai i ua la paahao nei. Nolaila olelo lakou a pau, "i ko makou mau la no e lawe ai," pela kalakou olelo ana mai ia'u. E ka mea nana i kakau? auhea oe? Ua kuhihewa loa oe, aole i lohe pono, aole i ike maka, aole loa no. Ua hewa loa kau olelo ana. KAUAKAHI.

HALE PULE A ME KA HALE KULA I PAU I KE AHI MA MOANALUA

                I ka la 3 o Aug. hele malaila kekahi pupule o Puou kona inoa, olelo aku la ia i na kamaaina, e hele a pau loa i ka halawai; a hiki mai ka mea nana e hai i ka olelo, hana aku la no ia e like me ke ano pupule; akaaka na kanaka ia ia; hele aku la ia i kekahi hale, wawahi aku la. Makau na kanaka oloko, aole puka iwaho ae; holo aku no ka pupule ma ke kala mauka o ua hale nei, pupuhi ae la i ke ahi, a wela, holo hou ae la me ke ahi a ka hale kula puhi ae la. O ka pau no ia o ua mau hale nei, pau pu me na palapala aina, a me na papa kahakaha, a me na buke iloko.
                Eia kekahi; i ka pau ana o ua hale kula nei i ke ahi, nonoi aku ke kumu i kekahi hale kaawale, aole mea maloko, he holoholona wale no, malaila e kula ai. I mai la ka mea nona ka hale, "ina e komo ke kula malaila, e uku!" Nolaila, ua kukuluia kekahi, lanai, a malaila makou e kula nei me ka hoomanawanui.
KAPAHI.

                He lokoino maoli kela kanaka nona ka hale kaawale. Haawi wale ka! i kona hale i ka holoholona, a aua i na keiki mea uhane.

KANAKA MALAMA OLE I KA LA SABATI MA HILO.

                He hoahanau mamua, a ua haule. Pii aku la i ke kalaiwaa, noho iuka a hiki i ka la 27 o Feb. Oia no ka la Sabati, manao oia e hoi i kai, no ka pololi. Lawe iho la ia i kekahi